މިދިޔަ އަންގާރަ ދުވަހުން ފެށިގެން މުދަލު ޒަކާތުގެ ނިސޯބެއްގެ ގޮތުގައި 5،777.45 ރ. ކަނޑައެޅުމަށް އިސްލާމިކް މިނިސްޓްރީން ނިންމައިފި އެވެ.
މުދަލު ޒަކާތުގެ ނިސޯބުގެ އަދަދަށް ބަދަލު ގެނެސް އެ ކަން ހާމަކޮށްފައިވަނީ އެ މިނިސްޓްރީން މިދިޔަ ބުދަ ދުވަހު ނެރުނު އިއުލާނެއްގަ އެވެ.
އިސްލާމިކް މިނިސްޓްރީން ބުނި ގޮތުގައި އެ އަދަދަށް ބަދަލެއް ގެނައީ، އެ މިިނިސްޓްރީން އަމަލު ކުރަމުން އަންނަ މުދަލު ޒަކާތުގެ ނިސޯބު ކަނޑައެޅުމުގެ އުސޫލުގެ ދަށުންނެވެ.
މީގެ ކުރިން މުދަލު ޒަކާތުގެ ނިސޯބެއްގެ ގޮތުގައި މިނިސްޓްރީން ކަނޑައަޅާފައި ވަނީ 6878.20 ރ. އެވެ.
މުދަލު ޒަކާތް ކުރިން ދައްކަނީ އިސްލާމިކް މިނިސްޓްރީއަށެވެ. ނަމަވެސް 2016 ވަނަ އަހަރުން ފެށިގެން މުދަލު ޒަކާތް ބަލައިގަތުން ވަނީ މީރާއަށް ބަދަލު ކޮށްފަ އެވެ.
މުދަލުގެ ޒަކާތަކީ އެމީހެއްގެ މުދަލުގައި ނިސޯބު ހަމަވާތާ އަހަރެއް ފުރިފައިވާ ކޮންމެ މީހެއްގެ މައްޗަށް އޮތް ދީނީ ވާޖިބެކެވެ. އެގޮތުން އަހަރުގެ ކޮންމެ ދުވަސްވަރެއްގައި ވެސް މުދަލުގެ ޒަކާތް ދެއްކޭނެ އެވެ.
ޒަކާތަކީ އިސްލާމްދީނުގެ ތިންވަނަ ރުކުނެވެ.
މުދަލު ޒަކާތުގެ ބެހެނިވެރިންގެ ގޮތުގައި އަށް ބައެއް ކީރިތި ގުރުއާނުގައި ﷲ ކަނޑައަޅުއްވާފައި ވެއެވެ. އެއީ
- ފަގީރުން
- މިސްކީނުން
- އާމިލުން (ޒަކާތް ނެގުމާއި ބެހުމުގެ މަސައްކަތުގައި އުޅޭ މީހުން)
- އަލަށް އިސްލާމްވާ މީހުން
- އަޅުން މިނިވަންކުރުން
- ދަރަނިވެރީން
- ﷲ ގެ މަގުގައި (ޖިހާދުކުރުމަށް)
- ދަތުރު މަތީގައި ހާލުގައި ޖެހޭ މީހުން
