ރައީސް އިބްރާހިމް މުހައްމަދު ސޯލިހު، ސިފައިންގެ ތަރައްގީ އާއި ކުރިއެރުމަށް އަދި ސިފައިންގެ ގާބިލުކަން އިތުރުކުރުމަށް ދެއްވާ އަހަންމިއްޔަތުކަމުގެ ސަބަބުން ގިނަ ކަންތައްތަކެއް ހާސިލުކުރެވިފައިވާ ކަމަށް ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެ އެވެ.
ދިވެހި ސިފައިންގެ 130 ވަނަ އަހަރީ ދުވަހުގެ ހާއްސަ ޖަލްސާގައި މާރިޔާ ވިދާޅުވީ ރައީސް ސޯލިހް ވެރިކަމާ ހަވާލުވެވަޑައިގަތުމުގެ ފަސް އަހަރު ކުރިއާ އަޅާބަލާއިރު، މިދިޔަ ތިން އަހަރާއި ބައިގައި ދިފާއީ ދާއިރާގެ ތެރެއިން މިންތީގެ ހަމަހަމަ ކަމަށް ގިނަ މަސައްކަތަކެއް ކުރެވިފައިވާ ކަމަށެވެ.
މިންތީގެ ހަމަހަމަކަމުގައި ރައީސް ސޯލިހަކީ ހަމައެކަނި ބަސްބުނެފައި ނިންމާލައްވާ ވެރިއެއް ނޫންކަން ފާހަގަކުރައްވާ މާރިޔާ ވިދާޅުވީ މިދިޔަ ތިން އަހަރާއި ބައިގެ ތެރޭގައި އަންހެން ސިފައިން ރެކްރޫޓްކުރެވުނު ނިސްބަތުން 25 ޕަސަންޓު އިތުރުވެފައިވާ ކަމަށެވެ. އަދި އަންހެން ސިފައިންނަށް މަގާމުގެ ކުރިއެރުން ލިބުނު މިންވަރު 50 ޕަސަންޓު އިތުރުވިއިރު، ސިފައިންގެ ބޯޑުތަކާއި ކޮމިޓީތަކުގައި އަންހެނުންގެ ހިއްސާ 120 ޕަސަންޓު އިތުރުކުރެވިފައިވާ ކަން ވެސް އޭނާ ފާހަގަ ކުރެއްވި އެވެ.
އިތުރަށް ވާހަކަ ދައްކަވަމުން މާރިޔާ ވިދާޅުވީ ސިފައިންގެ އިދާރީ ނިޒާމުތަކަށް ވެސް މި ސަރުކާރުގައި ބޮޑެތި ކުރިއެރުންތަކެއް ލިބިފައިވާ ކަމަށެވެ. އޭނާ ވިދާޅުވީ ސިފައިންނާ ގުޅޭ ގޮތުން ހުށަހެޅޭ މައްސަލަތަކުގައި މީގެ ކުރިން އޮންނަނީ ޗީފް އޮފް ޑިފެންސް ފޯސް ނުވަތަ ސިޔާސީ ވެރިން ގޮތް ނިންމަވާ ގޮތަށް ކަމަށެވެ. އެގޮތުން، މައްސަލަ ރައްދުވާ ސިފައިންގެ މީހާއަށް އޭނާގެ އަމިއްލަ ދިފާއުގައި ބަހެއް ބުނެލުމުގެ ފުރުސަތު ވެސް ނުލިބޭ ކަމަށް މާރިޔާ ވިދާޅުވި އެވެ.
"ދެ ފަރާތުގެ ވާހަކަޔާ، ހެއްކާ ގަރީނާޔާ، ބަޔާންކުރެވިފައިވާ އުސޫލުތަކާއި އެއްގޮތަށް ހިނގާ އަސްކަރީ އަދުލުގެ ނިޒާމެއް ގާއިމުކުރުމަށް އަޅުގަނޑުމެން ފެށި މަސައްކަތް ވެސް މިއަދުވަނީ ކާމިޔާބުކަމާއެކު ނިންމާލެވި ތަންފީޒުކުރަން ފަށާފައި," އަދުލު އިންސާފާއި ހަމައަށް ލީނިކުރާ ފަރާތްތަކަށް މިއީ ބޮޑު ކާމިޔާބީއެއްކަން ފާހަގަކުރައްވާ މާރިޔާ ވިދާޅުވި އެވެ.
ރައީސް ސޯލިހް ވެރިކަމާ ހަވާލުވެވަޑައިގަންނަވަމުން ވެވަޑައިގެންނެވި ވައުދުގެ ހަނދާން އާކުރައްވަމުން, މާރިޔާ ވިދާޅުވީ ދިވެހި އަސްކަރިއްޔާ ސިޔާސީ ނުފޫޒުން އެއްކިބާކޮށް، ސިފައިންގެ ގަބިލުކަން އިތުރުކޮށް، ރައްޔިތުންގެ އިހުތިރާމާއި ލޯތްބާއި، އިތުބާރު ލިބިފައިވާ އަސްކަރިއްޔާއެއް ދިވެހި ރައްޔިތުންނަށް ބިނާކޮށްދެއްވުމަށް ރައީސް ވައުދުވެ ވަޑައިގެންނެވި ކަމަށެވެ.
"މިއަދުގެ ސިފައިންނަކީ ރައްޔިތުންގެ ލޯބި ލިބިފައިވާ، ރައްޔިތުންގެ އިހުތިރާމް ލިބިފައިވާ، ރައްޔިތުން އިތުބާރުކުރަ، ރައްޔިތުންނަށް ޖަވާބުދާރީވާ، ޑިމޮކްރެޓިކް ނިޒާމަށް އަހުލުވެރި ބައެއް," ފަހުރުވެރިކަމާ އެކު މާރިޔާ ވިދާޅުވި އެވެ.
މާރިޔާ ވިދާޅުވީ ސިފައިންނަށް މޮޅު ހޯދޭނީ ގައުމަށް ހުރި ނުރައްކާތަކާއި ގޮންޖެހުންތައް ދެނެގަނެ އެކަންކަމަށް ޕްރޮފެޝަނަލް ބާރެއްގެ ގޮތުގައު ދެމިތިބެ ހައްލު ހޯދައިދީގެން ކަމަށެވެ. އަދި ސިފައިންނަކީ ގާނޫނީ ހަމަތަކުގެ ތެރެއިން ރައްޔިތުން އިންތިހާބު ކުރާ ސަރުކާރަށް އެއްބާރުލުންދީ ގާނޫނީ އިމުގެ ތެރެއިން ސަރުކާރު ދަމަހައްޓާ، ސަރުކާރުގެ ސިޔާސަތުތައް ނަގަހައްޓާ ބަޔަކަށްވުމަށް މާރިޔާ ވަނީ އިލްތިމާސްކުރައްވާފަ އެވެ.
