ގައުމީ އެއާލައިން މޯލްޑިވިއަނުން ބައިނަލްއަގުވާމީ ދަތުރުތައް ކުރަން ބޭނުންކުރާ އެއާބަސް އޭ-321ގެ ލީސް މުއްދަތު އަންނަ އަހަރުގެ މާޗު މަހަށް ހަމަވާނެ ކަމަށާއި ލީސް އެއްބަސްވުމުގެ މުއްދަތު އިތުރު ނުކުރާނެ ކަމަށް އައިލެންޑް އޭވިއޭޝަން އިން ބުނެފި އެވެ.
އޭ-321 މަރުކާގެ މި މަތިންދާބޯޓަކީ 200 ފަސިންޖަރުންގެ ޖާގައިގެ ބޯޓެކެވެ. މި ބޯޓު މޯލްޑިވިއަންއިން ކުއްޔަށް ނަގާފައިވަނީ 2015 ވަނަ އަހަރުގެ ޖެނުއަރީ މަހުގެ ތެރޭގައި އަށް އަހަރާއި ދެ މަހުގެ މުއްދަތަކަށް ކަމަށް އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ "އަދަދު"އަށް ވިދާޅުވި އެވެ.
"ކުއްޔަށް ނަގާފައި އޮތް ބޯޓެއް އެއީ، އަންނަ އަހަރު މާޗު މަހަށް ހަމަވާނެ އެއްބަސްވުމުގެ މުއްދަތު،" ޖެނިފާ ވިދާޅުވި އެވެ.
ޖެނިފާ ވިދާޅުވި ގޮތުގައި ލީސް އެއްބަސްވުން އާ ނުކުރަން ނިންމީ އެ ބޯޓަކީ ވަރަށް ބާ ބޯޓަކަށް ވުމުން، މެއިންޓެނަންސަށް ދާ ހަރަދު ބޮޑުވުމުންނެވެ. އަދި އެކަމުގެ ސަބަބުން ވާދަވެރިކަމަށް ވެސް އަސަރު ކުރާ ކަމަށް ވިދާޅުވި އެވެ.
ކުންފުނިން މަސައްކަތްކުރަމުން އަންނަނީ ދުރު މަންޒިލްތަކަށް ދަތުރުކުރެވޭ ފަހުގެ މަތިންދާބޯޓު ގެނައުމަށް ކަމަށް ވެސް ޖެނިފާ ވިދާޅުވި އެވެ.
މޯލްޑިވިއަންގެ ދުވަސްވީ ފްލީޓު ބަދަލުކުރަން އައިލެންޑް އޭވިއޭޝަނުން އަންނަނީ މަސައްކަތް ކުރަމުންނެވެ. އެގޮތުން މޯލްޑިވިއަންއަށް މި އަހަރު އޭޓީއާރުގެ ތިން އެއާކުރާފްޓެއް ގެނައުމަށް ވަނީ ނިންމައިފަ އެވެ.
މިހާރު ކުރިއަށްދާ ވިއަވަތި ކޮންފަރެންސްގައި އެ ކުންފުނީގެ މެނޭޖިން ޑިރެކްޓަރު މުހައްމަދު މިހާދު ވިދާޅުވި ގޮތުގައި އޭޓީއާރު 600-72 ދެ ބޯޓާއި އޭޓީއާރު 600-42 ބޯޓު މި އަހަރު ނިމުމުގެ ކުރިން ގެންނާނެ އެވެ.
