ތިލަމާލެ ބްރިޖުގެ މަސައްކަތްކުރަން ބޭނުންކުރާ ސެލްފް އެލެވޭޓިން ޕްލެޓްފޯމެއް ވިލިމާލެ ފަރަށް އުރިގެން ލިބުނު ގެއްލުން ބެލުމަށް މިއަދު ސާވޭ ކުރަން ފަށައިފި އެވެ.
އެންވަޔަރަމެންޓް ޕްރޮޓެކްޝްޝަން އެޖެންސީ (އީޕީއޭ)ގެ ޑިރެކްޓަ ޖެނެރަލް އިބްރާހިމް ނައީމް ވިދާޅުވީ, މިއަދު ސާވޭކޮށް ނުނިންމުނު ކަމަށާއި ޑައިވްކޮށް ބެލިއިރު ބޮޑު ސަރަހައްދަކަށް ގެއްލުން ލިބިފައިވާ ކަމަށެވެ.
"ފަރުގެ ވަރަށް ބޮޑު ސަރަހައްދެއް މިއަދު ސާވޭ ކުރެވުނު. ނަމަވެސް އެއްކޮށް ނުނިމޭ. މިހާރު ބެލި ސަރަހައްދުގެ ބޮޑު ބަޔަކަށް ވަނީ [ޕްލެޓު ފޯމް އުރުމުގެ ސަބަބުން] ގެއްލުން ވެފައި. ސާވޭ އެއްކޮށް ނިމޭނީ މާދަމާ،" ނައީމް ވިދާޅުވި އެވެ.
މި ދަގަނޑު ޕްލެޓުފޯމް ފުން ކުރެވުނީ ފަރަށް އުރުނުތާ 12 ދުވަސް ފަހުން، އޯގަސްޓް 27 ވަނަ ދުވަހު އެވެ.
ޕްލެޓު ފޯމު އުރިފައި ހުރިއިރު ރާޅުގެ ބާރުގައި ދެފަރާތަށް ތެޅުވުމުގެ ސަބަބުން، އޭގައި ހަރުކޮށްފައި ހުރި ގަދަނޑު ހޮޅިތައް ބިންދައިގެން ގޮސް މޫދަށް ވެއްޓުނެވެ. ޕްލެޓު ފޯމް ފުންކުރި ނަމަވެސް، އެ ހޮޅިތަކާއި ޕްލެޓްފޯމުން މޫދަށް އެޅުނު ތަކެތި ނަގައި ފަރު ސާފުކޮށް ނިންމީ މި މަހުގެ 4 ގަ އެވެ.
ތިމާވެށި ރައްކާތެރި ކުރުމުގެ ގާނޫނުގެ ދަށުން ފަރަށް ލިބޭ ގެއްލުމުގެ ބަދަލުގެ ގޮތުގައި 100 މިލިއަން ރުފިޔާއާ ހަމައަށް ޖޫރިމަނާ ކުރެވޭނެ އެވެ.
ވ. އަތޮޅުގައި އޮންނަ ފަޅެއް ކަމަށްވާ މާގުޅީ ފަރަށް އެރި ބާޖެއް 100 މިލިއަން ރުފިޔާއިން މި މަސްތެރޭގައި ވަނީ ޖޫރިމަނާކޮށްފަ އެވެ.
