ރައްޔިތުންގެ މަޖިލީހުގެ 19 ވަނަ ދައުރުގައި ސަރުކާރު ހިންގާ އެމްޑީޕީއަށް ލިބިފައި އޮތް ސުޕަ މެޖޯރިޓީގެ ބޭނުން ނަހަމަ ގޮތުގައި ހިފާ ކަމަށް ބުނެ، އިދިކޮޅުން ކަންބޮޑުވުން ފާޅުކޮށްފި އެވެ.
އިދިކޮޅުން މި ކަންބޮޑުވުން ފާޅުކޮށްފައިވަނީ މަޑުއްވަރީ ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ ގައުމީ ސަލާމަތާ ބެހޭ ބިލު ބަލައި ނުގަތުމަށް އެމްޑީޕީ ޕާލިމަންޓަރީ ގުރޫޕުން ނިންމުމާ ގުޅިގެންނެވެ.
"ބިލު ބަލައިގަނެ، ކޮމިޓީ މަރުހަލާއަށް ފަހު ބިލު ފާސްކުރިނަމަ ރާއްޖޭގެ ގައުމީ ސަލާމަތް ދިފާއުކޮށް ރައްކާތެރިކޮށް، ލާދީނީ ފިކުރާއި ހަރުކަށި ފިކުރުގެތެރެއިން ދިވެހިންގެ މެދުގައި ބައިބައިވުން އުފެއްދުމަށް ކުރަމުންދާ މަސައްކަތް މަދު ކުރެވި، ބޭރު ގައުމުތަކުގެ ސިޔާސީ، އިގްތިސޯދީ، އަސްކަރީ ނުފޫޒުތަކުން ރައްކާތެރިވުމަށް މަގުފަހިކުރެވުނީހެވެ." ކަންބޮޑުވުން ފާޅުކުރައްވައި އާދަމް ޝަރީފް ރިޔާސަތަށް ފޮނުއްވި ސިޓީއެއްގައި ބުނެފައިވެ އެވެ.
ސިޓީގައި ވަނީ ބިލަށް ވާހަކަ ދެއްކެވި ހުރިހާ މެންބަރުން ވެސް ބިލުގެ މުހިންމު ކަން ފާހަގަ ކުރެއްވި ކަމަށާއި އެފަދަ ބިލެއްގެ މުހިންމުކަން ފާހަގަކުރެއްވި ކަމަށް ބުނެފަ އެވެ.
އެހެން ނަމަވެސް، އެއްވެސް މަގުބޫލު އުޒުރެއް ނެތި ބިލު ބަލައިނުގަތުމަށް އެމްޑީޕީ ޕީޖީ ގުރޫޕުން ނިންމި ނިންމުމަކީ ބަލައިގަނެވޭނެ ނިންމުމެއް ނޫން ކަމަށް ބުނެފައިވެ އެވެ.
"[މިއީ] މަލްޓި ޕާޓީ ޑިމޮކްރަސީގެ ހަމަތަކާއި އަގުކުރާ ކަންކަމާ ނުހަނު ބީރައްޓެހި، ސަރުކާރާ ވާދަވެރި މެންބަރުންގެ އަޑު ކަނޑުވާލުމަށް ހިންގި ނާތަހުޒީބު އަމަލެކެވެ. އަދި ރޫލިން ޕާޓީގެ ޕާލަމަންޓަރީ ގްރޫޕްގެ ލީޑަޝިޕަށް ގެނައި ބަދަލުތަކާއެކު، މިހާރަކަށް އައިސް ރައްޔިތުން ކަންބޮޑުވާ ބޮޑެތި މައްސަލަތައް ބަލައިނުގަންނަކަން ހިތާމައާއިއެކު ފާހަގަ ކުރަމެވެ. މިކަމުގެ ސަބަބުން ސަރުކާރު ޖަވާބުދާރީ ކުރުމުގެ ޒިންމާ އަދާކުރުމަށް ހުރަސްއެޅޭ،" އާދަމް ޝަރީފް ވިދާޅުވެފައިވެ އެވެ.
އާދަމް ޝަރީފް ވިދާޅުވި ގޮތުގައި މި ބިލު ހުށަހެޅުއްވީ ރާއްޖޭގެ އަސްކަރިއްޔާގައި ތިއްބެވި ގާނޫނީ ވަކީލުންގެ އިސްނެންގެވުމާއެކު، ދުނިޔޭގެ ގިނަ ގައުމުތަކެއްގެ ގައުމީ ސަލާމަތާބެހޭ ގާނޫނުތައް ދިރާސާކޮށްގެން ކަމާ ބެހޭ މުވައްސަސާތަކުގެ ލަފަޔާއެކުގަ އެވެ.
ގައުމީ ސަލާމަތާ ބެހޭ ބިލުގައި ހުރި ކަންކަން
އާދަމް ޝަރީފް ހުށަހެޅުއްވި "ގައުމީ ސަލާމަތާ ބެހޭ ބިލު" ގައި ވަނީ ގައުމީ ސަލާމަތަށް ނުރައްކާ ވާނެ ފަދަ ކަންކަން ބަޔާންކޮށް، އެ ކަމަށް އަދަބު ކަނޑައަޅައިފަ އެވެ. އެ ބިލު މިހާރު އޮތީ އިބްތިދާއީ ބަހުސް މަރުހަލާގަ އެވެ.
އެ ބިލުގައިވާ ގޮތުން ރައްޔިތުންގެ މަޖިލީހުގެ ހުއްދަ ނެތި އެއްވެސް ގައުމެއްގެ އަސްކަރިއްޔާއިން ރާއްޖޭގައި ތިބުމަކީ ގައުމީ ސަލާމަތަށް ނުރައްކާ ވާނެ ފަދަ ކަމެކެވެ. އަދި ރިޔާސީ އިންތިހާބު އޮޅުވާލުމާއި ސަރުކާރާ ދެކޮޅަށް ބަގާވާތެއް ކުރުމާއި ސަލާމަތީ ހިދުމަތްތަކުން ސަރުކާރާ ދެކޮޅު ހަރަކާތް ހިންގުން ފަދަ ކަންކަމަކީ ގައުމީ ސަލާމަތަށް ނުރައްކާވާނެ ކަންކަމެވެ.
ގައުމީ ސަލާމަތަށް ނުރައްކާއެއް ކަމަށް ބިލުގައި ކަނޑައަޅާފައިވާ އިތުރު ކަންކަމަކީ:
- ދީނާއި ގައުމުގެ މިނިވަންކަމާއި އިސްތިގާލަލަށާއި ތިމާވެއްޓާއި ސިޔާސީ ހަރަކާތްތަކަށް ނިކަމެތިވާ ފަދަ ކަންކަން ކުރުން
- ބޭރު ގައުމެއްގެ ސިޔާސީ/އިގްތިސޯދީ ނުވަތަ އަސްކަރީ ބާރުގެ ދަށަށް ގައުމު ދިއުން
- ގާނޫނާ ހިލާފު ފިކުރަކަށް ދިވެހިން ވެއްދުމަށް މަސައްކަތް ކުރުން
- ހަނގުރާމަވެރި އުޅަނދާއި ހަތިޔާރު އެތެރެކުރުން
- ގައުމީ ސަލާމަތަށް ނުރައްކާވާ ފަދަ މައުލޫމާތު ދިނުމާއި ޖާސޫސްކުރުން
- ބަލިމަޑުކަމެއްގެ ސަބަބުން ކާޑާއި ފެން ލިބުން ދަތިވުން
- ޓެރަރިސްޓު ހަމަލާތައް ދިނުމާއި ރޭވުމާއި ސައިބާ ސެކިއުރިޓީން އުދުވާންތައް ހިންގުމާއި ރޭވުން ފަދަ ކަންކަން ވަނީ ހިމަނާފަ އެވެ.
އެހެންނަމަވެސް ލިބިދީފައިވާ ހައްގުތަކުގެ ތެރެއިން، ވަކި ކަމަކަށް ތާއީދުކޮށް ނުވަތަ އިންކާރުކޮށް، ރައްޔިތުން ކުރާ އިހުތިޖާޖުތައް ގައުމީ ސަލާމަތަށް ނުރައްކާވާ ކަންކަމުން އިސްތިސްނާ ވާނެ ކަމަށް ބުނެފައިވެ އެވެ. އަދި ގައުމީ ސަލާމަތަށް ނުރައްކާވާ ފަދަ ކަންކަން ހޯދުމަށް މީޑިއާއިން ކުރާ މަސައްކަތް ވެސް ހިމަނާފައި ނުވެ އެވެ.
މި ބިލު ގާނޫނަކަށް ވުމާއެކު، ގައުމީ ސަލާމަތާ ބެހޭ މަޖިލިސް އުވާލާއި، ދިވެހިރާއްޖޭގެ ގައުމީ ސަލާމަތާ ބެހޭ ކައުންސިލެއް އުފައްދާނެ އެވެ. ބިލްގައިވާ ގޮތުން ގައުމީ ސަލާމަތަށް ނުރައްކާވެއްޖެކަން ކަނޑައަޅާނީ ގައުމީ ސަލާމަތާ ބެހޭ ކައުންސިލްގެ ލަފަޔާ އެކު ރައީސުލްޖުމްހޫރިއްޔާ ކަމަށް ބިލުގައި ވަނީ ބަޔާންކޮށްފަ އެވެ.
ބިލުގައި ބަޔާންކޮށްފައިވާ ފަދަ ގައުމީ ސަލާމަތަށް ނުރައްކާވާ ފަދަ އެއްވެސް ކަމެއް ހިންގުމަކީ ނުވަތަ ކުރަން އުޅުމަކީ ގާނޫނީ ކުށަކަށް ހަދާފައިވާއިރު، އެ ކުށުގެ އަދަބެއްގެ ގޮތުން ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށް ލެވޭނެ އެވެ.
އަދި ގައުމީ ސަލާމަތަށް ނުރައްކާ ވެދާނެ މައުލޫމާތެއް އެނގިހުރެ، އެ މައުލޫމާތު ގައުމީ ސަލާމަތާ ބެހޭ ކައުންސިލަށް ނުވަތަ ސަލާމަތީ ހިދުމަތްތަކަށް ނުދޭ ފަރާތްތަކަށް އެއް އަހަރާއި ފަސް އަހަރާ ދެމެދުގެ މުއްދަތަކަށް ޖަލަށް ލެވޭނެ އެވެ.
މީގެ އިތުރުން ގައުމީ ސަލާމަތަށް އުނިކަމެއް ނުވަތަ ނުރައްކަލެއް ކުރިމަތިވެދާނެ އެއްވެސް ކަމެއްގައި ޖާސޫސްކުރުމަކީ އަދި ޖާސޫސްކުރުމަށް އެހީތެރިވެ ދިނުމަކީ ވެސް ކުށެއްގެ ގޮތުގައި ވަނީ ކަނޑައަޅާފަ އެވެ. އެ ކުށުގެ އަދަބަކީ ފަސް އަހަރާއި ހަތް އަހަރާ ދެމެދުގެ މުއްދަތަކަށް ޖަލަށްލުމެވެ.
