ނެޓްފްލިކްސްގެ "ދަ ކްރައުން" ސީރީޒްގައި އިނގިރޭސި އަމީރާ ކޭޓްމިޑްލްޓަންގެ ރޯލަށް މުޅިން އާ އެކްޓްރެސްއެއް ހޮވައިފި އެވެ.
އުމުރުން 19 އަހަރުގެ މެގް ބެލަމީ އެ ރޯލަށް ހޮވުނީ ސޯޝަލް މީޑިއާ މެދުވެރިކޮށް ކުރި އިއުލާނާ ގުޅިގެން އަމިއްލައަށް ރިކޯޑްކޮށްފައިވާ ވީޑިއޯ ފޮނުވައިގެންނެވެ.
އޭގެ އިތުރުން އަމީރު ވިލިއަމްގެ ރޯލަށް އުމުރުން 21 އަހަރުގެ އެޑް މެކްވޭ އަދި 16 އަހަރުގެ ރޫފަސް ކަމްޕާ ހޮވި އެވެ. މިއީ އެ ދެ މީހުން ވެސް ޕްރޮފެޝަނަލް ސްކްރީނުން ފެންނަ ފުރަތަމަ ފަހަރެވެ.
ތިން އެކްޓަރުން ފެނިގެން ދާނީ ކުރިއަށް އޮތް "ދަ ކްރައުން" ގެ އެންމެ ފަހު ސީޒަނުންނެވެ. އެ ސީރީޒްގެ ހަ ވަނަ ސީޒަންގެ ޝޫޓިން ފަށާނީ އޮކްޓޯބަރުގަ އެވެ.
މީގެ ކުރިން ނެޓްފްލިކްސްއިން ބުނީ އެވޯޑް ހާސިލްކޮށްފައިވާ އެ ސީރީޒް ފަސް ސީޒަނަށް ފަހު ނިންމާލާނެ ކަމަށެވެ. އެކަމަކު އެ ސީރީޒް އުފައްދާ ޕީޓާ މޯގަން ފަހުން ނިންމުން ބަދަލުކުރި އެވެ.
އެ ސީރީޒްގެ ކުރީ ސީޒަންތަކުން ފެނިގެން ގޮސްފައިވާ ތަރިންގެ ތެރޭގައި އޮސްކާ އެވޯޑް ހާސިލްކުރި އޮލިވިއާ ކޮލްމޭން އަދި މެޓް ސްމިތް ހިމެނެ އެވެ.
ހަ ވަނަ ސީޒަނުން ފެންނަނީ ރާނީ އެލިޒަބަތު ދެ ވަނަ 2000 ވަނަ އަހަރާ ހަމައަށް ތަހުތުގައި ހޭދަކުރެއްވި ދުވަސްވަރު ހިނގި ހާދިސާތަކެވެ.
ފަސް ވަނަ ސީޒަން ނެޓްފްލިކްސްގައި ލޯންޗުކުރަން ހަމަޖެހިފައި ވަނީ ނޮވެމްބަރުގަ އެވެ. އެ ސީޒަންގައި ވިލިއަމް އާއި ކޮއްކޯފުޅު ހެރީގެ ރޯލުން ތަފާތު ހަތަރު އެކްޓަރުން ފެންނާނެ އެވެ.
"ދަ ކްރައުން" ގިނަ އެވޯޑްތަކަށް ނޮމިނޭޓްވެ، ބައެއް އެވޯޑްތައް ހާސިލްކޮށްފައިވެ އެވެ. އޭގެ ތެރޭގައި ގޯލްޑަން ގްލޯބްސް، އެމީޒް އަަދި ބަފްތާ ހިމެނެ އެވެ.
