މާލޭ ސިޓީ ކައުންސިލްގެ ހަރަދުގައި ބުޅާ ފެސިލިޓީއަކާއި ވެޓް ކްލިނިކެއް ވިލިމާލޭގައި ގާއިމްކުރަން އެ ކައުންސިލުގެ އާންމު ބައްދަލުވުމުގައި ފާސްކޮށްފި އެވެ.
މިގޮތަށް ސިޓީ ކައުންސިލުން ފާސްކުރީ ވޯޓުގައި ބައިވެރިވެވަޑައިގެންނެވި 12 މެންބަރުންގެ ވޯޓުންނެވެ. އެކަމަށް ދެކޮޅު ހެއްދެވީ ވިލިމާލޭ ދާއިރާގެ މެންބަރު ނަހުލާ އަލީ އެކަންޏެވެ.
މިއަދުގެ އާންމު ބައްދަލުވުމުގައި ނަހުލާ އަލީ ވިދާޅުވީ ވިލިމާލޭގައި މީގެކުރިން ވެސް ވެޓް ކްލިނިކެއް ހިންގާފައިވާ ކަމަށާއި އެ ކަމުގެ ތަޖުރިބާ އެ އަވަށުގައި ދިރިއުޅޭ ރައްޔިތުންނަށް އެނގޭ ކަމަށެވެ.
"ވިލިމާލޭ ރައްޔިތުންގެ، މެޖޯރިޓީ ރައްޔިތުންގެ ތާއީދު އޮތް ކަމެއް ނޫން މިއީކީ،" ވިލިމާލޭގައި ފެސިލިޓީ އެޅުމަށް ދެކޮޅު ހައްދަވައި ނަހުލާ ވިދާޅުވި އެވެ.
ބުޅަލުގެ އުނދަގުލަކީ ރައްޔިތުންނަށް "ތުރާލަކަށް ވެފައިވާ ކަމެއް" ކަމަށާއި ވިލިމާލޭގައި އަދި އެހެން އަވަށެއްގައި ވެސް އެ ފެސިލިޓީ އާއި ކްލިނިކް އަޅަން ނޭދޭ ކަމަށް ނަހުލާ ވިދާޅުވި އެވެ.
"އަޅުގަނޑަކަށް ނުފެނޭ މާލޭ ސިޓީ ކައުންސިލުގެ އެއްވެސް އަވަށެއްގައި މިކަން ކުރާކަށް، މިކަމުން އާންމު ސިއްހަތަށް ބޮޑު ގެއްލުމެއް ވާއިރުގައި މާލޭ ނޫން އެހެން ތަނަކަށް މިތަން އެބަ ބަދަލު ކުރަން ޖެހޭ،" ނަހުލާ ވިދާޅުވި އެވެ.
"އަށް މިލިއަން ރުފިޔާ އެކަމަށް ހަރަދު ކުރާއިރުގައި، ރައްޔިތުންގެ ހިތްހަމަޖެހުން އެކަމުގައި ހިމެނޭ ކަމަކަށް ވެގެން ދިއުމަކީ މި ކައުންސިލަށް ވެސް ލިބިގެންދާނެ ކުރިއެރުމަކަށް ވެގެންދާނެ،"
މާލޭ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު ވިދާޅުވި ގޮތުގައި މި ފައިސާއިން ކުރެވިދާނެ އެހެން ގިނަ ކަންކަން ހުރި ނަމަވެސް، މި މައްސަލައިގެ ބޮޑު ކަމުންނާއި މައްސަލައަށް ހައްލެއް ނުލިބި ދިގުލައިގެން މާ ގިނަ ދުވަސް ވެއްޖެ އެވެ.
"އެއްވެސް ގޮތަކަށް ފައިސާ ގިނަ ވެގެނެއް ނޫން މިއުޅެނީ، އަޅުގަނޑު ވެސް ފާހަގަކުރަން ކެޓް ޝެލްޓާއަކީ އެންކްލޯސްޑް ކުރެވިފައި ހުންނަ އެ ތަނުގެ ތެރޭގައި ޕްރޮފެޝަނަލުން ތިބެގެން ނިއުޓާ ކޮށް ޓްރީޓްކޮށް ބަލަހައްޓާ ތަނެއް،" މުއިއްޒު ވިދާޅުވި އެވެ.
މި މަޝްރޫއަށް އަށް މިލިއަނެއްހާ ރުފިޔާ ހަރަދުވާނެ ކަމަށް ކައުންސިލުން އަންދާޒާ ކުރެ އެވެ. މިކަމަށް ހަރަދު ކުރުމަށް ހަމަޖެހިފައިވަނީ ކައުންސިލްގެ ބަޖެޓުގަ އެވެ. މިތަން ހެދުމަށް ހަމަޖެހިފައިވަނީ ވިލިމާލޭގައި 3000 އަކަފޫޓުގެ ބިމެއްގައި އިމާރާތެއް އަޅައިގެންނެވެ.
މާލޭ ސިޓީ ކައުންސިލުން މީގެ ކުރިން ވަނީ އަމިއްލަ ހަރަދުގައި ބުޅާ ފެސިލިޓީ ގާއިމްކޮށްދޭނެ ބައެއް ހޯދަން އިއުލާނުކޮށްފަ އެވެ. ނަމަވެސް އެކަމަށް ތަރުހީބެއް ލިބިފައި ނުވެ އެވެ.
ވިލިމާލޭގައި ކުރިން ހިންގަމުން އައި ވެޓް ކްލިނިކް މިދިޔަ އަހަރު ނިމުމާއެކު ވަނީ ބަންދުކޮށްފަ އެވެ. އެގޮތަށް ނިންމީ އަމިއްލަ ފަރާތްތަކުން މިހާރު ވެޓެރިނަރީ ކްލިނިކް ހިންގާތީ ކަމަށް މިނިސްޓްރީން ބުނެ އެވެ.
