ގިނަ އަދަދެއްގެ މީހުނާއެކު އެއް ޖިންސުން ގުޅުން ހިންގި ކަމަށް އިއުތިރާފުވެފައިވާ ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގީރުގެ މައްޗަށް ކުރާ ދައުވާގެ ޝަރީއަތުގެ އަޑުއެހުންތައް މާދަމާ ފަށަން ތާވަލްކޮށްފި އެވެ.
ޕީޖީ އޮފީހުން މީގެ ކުރިން ބުނި ގޮތުގައި އަލަމްގީރު ހިމެނޭހެން ހަތަރު މީހެއްގެ މައްޗަށް އެއް ޖިންސުން ގުޅުން ހިންގި ކަމުގެ ދައުވާ ވަނީ އުފުލާފަ އެވެ. އެހެންނަމަވެސް ދައުވާ އުފުލާފައިވަނީ ކޮން ގާނޫނެއްގެ ދަށުން ކަމެއް ނުބުނެ އެވެ.
ކްރިމިނަލް ކޯޓުގެ މާދަމާގެ ތާވަލު އާންމުކޮށްފައިވާއިރު، އަލަމްގީރުގެ މައްޗަށް ކުރާ އެއް ޖިންސުން ގުޅުން ހިންގުމުގެ ތިން ދައުވާގެ ޝަރީއަތް ވަނީ ހަވީރު 4:00 އަށް ތާވަލުކޮށްފަ އެވެ. މި މައްސަލަ ކުރިއަށް ގެންދާނީ އާންމުންނަށް ނުވަދެވޭހެން ސިއްރުން ކަމަށް ވެސް ބުނެފައިވެ އެވެ.
އަލަމްގީރުގެ އިތުރުން ދެން މި މައްސަލައިގައި ދައުވާ ކޮށްފައިވަނީ ގާނޫނީ ވަކީލު ނާޒިމް އަބްދުއްސައްތާރާއި ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު "ކާނަލް" ނަޝީދާއި ފުލުހުންގެ ވަޒީފާއެއްގައި ހުރި އަބްދުއްރަހްމާން ރަފީއުގެ މައްޗަށެވެ.
އެމީހުން ހައްޔަރު ކުރުމަށްފަހު، މައްސަލަ ތަހުގީގުކޮށް، ޕީޖީއަށް ފޮނުވުމާއެކު އަލަމްގީރު ނޫން އެހެން މީހުން ވަނީ ދޫކޮށްލާފަ އެވެ. މި މައްސަލައިގައި ހަމައެކަނި ހަތަރު މީހުން ހައްޔަރުކުރި ނަމަވެސް އެއްޖިންސުން ގުޅުން ހިންގި ކަމަށް ތުހުމަތު ކުރެވޭ 18 މީހެއްގެ ޕާސްޕޯޓު ފުލުހުން ވަނީ ހިފަހައްޓައިފަ އެވެ.
ފުލުހުން މީގެ ކުރިން ބުނެފައިވާ ގޮތުގައި، ތަހުގީގަށް މީހުން ހައްޔަރުކުރުމާއި މިފަދަ މައްސަލަތަކުގައި އެކަށީގެންވާ މީންވަރަށް ހެއްކާއި ގަރީނާ ހޯދިފައިވާ ދައުލަތުގެ އެކި އިދާރާތަކުގައި މަސައްކަތްކުރާ ފަރާތްތައް ނިސްބަތްވާ އޮފީސްތަަކަށް އެމީހުންގެ މައްސަލަތައް ތަހުގީގު ކުރަމުންދާކަން އަންގަމުންދާ ކަމަށް ވަނީ ބުނެފަ އެވެ.
އެއާއެކު، ގިނަ އިދާރާތަކުން އަންނަނީ ވީޑިއޯތަކުގެ މައްސަލައިގައި ހިމެނޭ މީހުން ސަސްޕެންޑުކުރަމުންނެވެ. މިގޮތުން މިހާތަނަށް ކަސްޓަމްސް ދެ މުވައްޒަފަކާއި ބައެއް މިނިސްޓްރީތަކުގެ މުވައްޒަފުންނާއި އިމާމެއްގެ އިތުރުން ޓީޗަރަކާއި ސިފައިންގެ މީހެއް ވެސް ވަނީ ސަސްޕެންޑުކޮށްފަ އެވެ.
