އެލައިޑް އިންޝުއަރަންސްގެ އިޖުތިމާއީ ޒިންމާގެ ދަށުން މި އަހަރު ތައާރަފުކުރި އެލައިޑް ކޮމިއުނިޓީ ފަންޑަށް އެދި ހުށަހެޅުމުގެ ސުންގަޑި ހަމަވާން ކައިރިވެއްޖެ އެވެ.
އެލައިޑް ކޮމިއުނިޓީ ފަންޑަކީ ރަށު ފެންވަރުގައި މުޖުތަމައަށް ދިގުމުއްދަތުގައި ފައިދާކުރަނިވި މަސައްކަތެއް ކުރުމަށްޓަކައި އެހީތެރިވެދޭން އުފެއްދި ފަންޑެކެވެ. އެލައިޑްގެ "ޕްރީމިއަމް ފޯ ގުޑް އިނިޝިއޭޓިވްސް"ގެ ދަށުން ފަންޑު އުފެއްދީ ރަށު އެންމެންނަށް އޭގެން ފައިދާކުރާ ހިދުމަތެއް ކުރުމަށް ބާރުއެޅުމަށް ކަމަށް އެ ކުންފުނިން ބުނެ އެވެ.
މިފަދަ މަސައްކަތެއް ކުރުމަށްޓަކައި އެލައިޑުގެ އެހީތެރިކަމަށް އެދޭ ފަރާތްތަކުން ހުށަހަޅާ ޕްރޮޕޯޒަލްތަކުގެ ތެރެއިން ކޮންމެވެސް ހަތަރު ޕްރޮޖެކްޓެއް ހިންގުމަށް އެލައިޑުގެ ފަންޑުން 50,000 ރުފިޔާ ދޭ ގޮތަށް ވަނީ ހަމަޖެހިފަ އެވެ. އެކަމަށް އެދި ފޯމު ހުށަހެޅުމުގެ ފުރުސަތު ހުޅުވާލާފައި ވަނީ މިމަހު 31 ވަނަ ދުވަހުގެ ކުރިންނެވެ.
ފަންޑަށް އެދި ހުށަހަޅޭނީ ކޮންކަހަލަ މަސައްކަތްތަކެއް ކުރުމަށް؟
އެލައިޑުން ބުނީ އެ ކުންފުނިން އެހީތެރިކަން ފޯރުކޮށްދޭނީ ސިއްހަތާއި ދުޅަހެޔޮކަން، އިޖުތިމާއީ ހިދުމަތް، ތިމާވެށި، އަންހެނުންނާއި ކުޑަކުދިންގެ ހައްގުތައް، ތައުލީމާއި އިނޮވޭޝަން އަދި ތާރީހާއި ތަރިކައިގެ ދާއިރާއިން ރަށުގައި އެންމެންނަށް ފައިދާކުރަނިވި ޕްރޮޖެކްޓުތައް ނުވަތަ ޕްރޮގްރާމްތައް ހިންގުމަށެވެ.
އެ ދާއިރަތަކުން ހިންގިދާނެ ބައިވަރު ޕްރޮޖެކްޓުތައް ހުންނާނެކަން ފާހަގަކޮށް އެލައިޑުން ބުނީ، ރަށުގެ ތިމާވެށި ގޮނޑުދޮށް ރައްކާތެރިކޮށް ޒީނަތްތެރިކުރުމުގެ ޕްރޮޖެކްޓާއި، ރަށު ރައްޔިތުންގެ މެދުގައި ދެމެހެއްޓެނިވި ގޮތުގައި ތިމާވެށި ރައްކާތެރިކުރުމަށް ބާރުއެޅުމުގެ ގޮތުން ހަރަކާތް ހިންގުމުގެ އިތުރުން ރަށުގެ ތާރީހާއި ސަގާފަތާއި އާސާރީ ވާހަކަތައް ބޭނުންކޮށްގެން ރަށް ޕްރޮމޯޓުކުރުމުގެ މަސައްކަތެއް ވެސް ކުރެވިދާނެ ކަމަށެވެ. އަދި ރަށުގެ އާންމު ތަންތަނުގައި ރައްޔިތުން ހިތްހަމަޖައްސާލައިގެން ތިބެވޭނެ ތަންތަން ވެސް ހެދިދާނެ އެވެ.
މީގެ އިތުރުން ސިއްހީ ދުޅަހެޔޮކަމާއި ތިމާވެއްޓާއި އަންހެނުންނާއި ކުޑަކުދިންގެ ހައްގުތަކާ ބެހޭގޮތުން ރަށު ރައްޔިތުން ހޭލުންތެރިކޮށް ބާރުވެރިކުރުމަށްޓަކައި ވޯކްޝޮޕް ބޭއްވުމަކީ ވެސް އޭގެ ފައިދާ ދިގުމުއްދަތުގައި ރަށު އެންމެންނަށް ކުރާނެ ފަދަ ހަރަކާތެއް ކަމަށް އެލައިންޑުން ބުނެ އެވެ.
މިމަހު 31 ވަނަ ދުވަހުގެ ހަވީރު 4:00ގެ ކުރިން އެލައިޑުގެ ކޮމިނިޓީ ފަންޑަށް އެދި އެކަމަށް ހާއްސަ ފޯމު ފުރުމަށް އެލައިޑުން އެދެ އެވެ.
ނަމަވެސް މިކަމުގައި އެހީތެރިކަން ލިބޭނީ ގްރޭޓާ މާލެ ސަރަހައްދުން ބޭރުގައިވާ މީހުން ދިރިއުޅޭ ރަށްތަކުގައި ޕްރޮޖެކްޓު ހިންގުމަށް ކަމަށް އެލައިންޑުން ބުނެ އެވެ. ހަމައެއާއެކު މިކަމަށް އެދެވޭނީ ޔޫތު މިނިސްޓްރީ އާއި މީރާގައި ރަޖިސްޓްރީވެފައިވާ ކްލަބު ޖަމިއްޔާ ޖަމާއަތްތަކަށް ކަމަށާއި، ރަށުގެ މުޖުތަމައަށް ފައިދާކުރަނިވި މަސައްކަތެއް ކުރުމަށް އެދޭ ފަރުދަކު ވާ ނަމަ، ރަށުގައި ގާއިމުވެފައިވާ ކްލަބު ޖަމިއްޔާއަކާ ގުޅިގެން އެލައިޑް ކޮމިއުނިޓީ ފަންޑުގެ އެހީއަށް އެދެވިދާނެ ކަމަށް ވެސް އެލައިންޑުން ބުނެ އެވެ.
