ދެމެހެއްޓެނިވި ގޮތުގައި ކުނި މެނޭޖްކުރުމާގުޅޭ ހޭލުންތެރިކަން އިތުރުކުރުމަށް ތިމާވައްޓާ ބެހޭ މިނިސްޓްރީން "ފަސްގަނޑު"ގެ ނަމުގައި ގައުމީ ކެމްޕެއިނެއް މިއަދު އިފްތިތާހުކޮށްފި އެވެ.
އެންސީއައިޓީ ބިލްޑިންގައި މިއަދު ބޭއްވި ހާއްސަ ރަސްމިއްޔާތެއްގައި މި ކެމްޕެއިނު އިފްތިތާހުކޮށްދެއްވީ އެޑިއުކޭޝަން މިނިސްޓަރު އައިޝަތު އަލީ އެވެ.
"އަޅުގަނޑުމެން ބޭނުންކޮށްފައި ބާކީވާ ތަކެތި ދެމެހެއްޓެނިވި ގޮތެއްގައި މެނޭޖުކުރެއްވިއްޖެނަމަ އޭގެ ފައިދާ ސިއްހަތަށާއި ތިމާވެއްޓަށް ނުހަނު ގެއްލުން ދެނިވި އެއްޗެހިތަކެއް ނުވަތަ ކަންކަން އަޅުގަނޑުމެންނަށް އެބަ ހައްލު ކުރެވޭ،" ކެމްޕެއިނު އިފްތިތާހު ކުރުމުގެ ޖަލްސާގައި އެންވައިރަމެންޓް މިނިސްޓަރު އައިމިނަތު ޝައުނާ ވިދާޅުވި އެވެ. "މިއީ ބޮޑު ބުރަ މަސައްކަތެއްގެ ފެށުން، މިކަމުގެ ހަގީގީ ނަތީޖާ އަޅުގަނޑުމެންނަށް ހާސިލް ކުރެވޭނީ ވަރަށް ގިނަ ދުވަހުން."
ރާއްޖެއަށް ދިމާވެފައިވާ އެންމެ ބޮޑު މައްސަލައަކީ ކުނީގެ މައްސަލަ ކަން ފާހަގަކުރައްވައި ޝައުނާ ވިދާޅުވީ، ރަށްރަށުގައި ނައްތާނުލެވޭ ވަރަށް މިހާރު އަންނަނީ ކުނި އުފައްދަމުންނެވެ. އެގޮތުން، ރޯދަ މަހާ އަޅާ ބަލާއިރު ކުނި ތިން ގުނަ އިތުރުވެފައިވާ ކަން ޝައުނާ ފާހަގަކުރެއްވި އެވެ. އެ މައްސަލައަށް އޮތް ހަގީގީ ހައްލަކީ އިސްރާފު ކުޑަކުރުމުން ކަމުގައި ދެކޭ ކަމަށް މިނިސްޓަރު ވިދާޅުވި އެވެ.
"އަޅުގަނޑުމެން މި ތަކެއްޗަށް ބަރޯސާ ވާ މިންވަރާއި ބަރޯސާވާ ތަކެއްޗަކީ އެއްފަހަރު ބޭނުން ކުރުމަށްފަހު އުކާލެވޭ ތަކެތި ނޫން ކަމުގައި ހަދައިގެން، ރީސައިކަލް ކޮށްގެން،" ޝައުނާ ވިދާޅުވި އެވެ.
ތިމާވެއްޓާ ބެހޭ މިނިސްޓްރީން ބުނީ ދެމެހެއްޓެނިވި ގޮތެއްގައި ކުންޏާއި ވަސީލަތްތައް މޭނޭޖްކުރުމާއި މި މަސައްކަތް ރާވާ ހިންގުން އިތުރަށް ހަރުދަނާކުރުމަށް ދިރާސާތަކެއް ކުރެވި، އާންމު ރައްޔިތުންނަށް އަމާޒުކުރެވިގެން މި ކެމްޕެއިން ފަރުމާކޮށް ވަނީ ޕްލޭންތަކެއް އެކުލަވާލެވިފަ އެވެ. އަދި، މި ކެމްޕެއިން ތަންފީޒުކުރުމަށް ބޭނުންވާ ޓޫލްކިޓް ވެސް އެ މިނިސްޓްރީން ތައްޔާރުކޮށްފައިވާ ކަމަށް މިނިސްޓްރީން ބުންޏެވެ.
"ފަސްގަނޑު' ކެމްޕެއިނުގެ ދަށުން މައިގަނޑު ފަސް ދާއިރާއަކުން އާންމުން ހޭލުންތެރި ކުރުމަށް ވަނީ ހަމަޖެހިފަ އެވެ. އެއީ ސިއްހީ، އިޖުތިމާއީ، ތައުލީމީ، ޖެންޑާގެ އިތުރުން އިގްތިސޯދީ ދާއިރާ އެވެ.
އެ ކެމްޕެއިނުގެ ދަށުން ފަރުދީ ފެންވަރުން ފެށިގެން ރަށު ފެންވަރުގަޔާއި ސަރަހައްދީ އަދި ގައުމީ ފެންވަރުގައި ކުންޏާއި ވަސީލަތްތައް މެނޭޖްކުރުން މިހާރަށް ވުރެ ހަރުދަނާކުރުމަށް މަސައްކަތްތައް ކުރެވޭނެ ކަމަށް ވެސް އެ މިނިސްޓްރީން ބުނެ އެވެ.
