ލަންޑަން (ޖުލައި 24) - ޗައިނާގައި މި އަހަރު ބާކީ ބައިގައި ކުޅެން އޮތް އޭޓީޕީ ލެވަލްގެ، ޓެނިސް ހަތަރު މުބާރާތެއް، ކޮވިޑް-19 އިން ރައްކާތެރިވާން އެޅި ފިޔަވަޅުތަކުގެ ސަބަބުން ކެންސަލްކޮށްފި އެވެ.
އޭޓީޕީން ޗައިނާގައި މި އަަހަރު ނޯންނާނެކަން އިއުލާނުކުރި ހަތަރު މުބާރާތަކީ، ޝަންހާއީ މާސްޓާސް، ބެއިޖިން އޯޕަން، ޝެންޑޫ އޯޕަން އަދި ޒުހާއީ ޗެމްޕިއަންޝިޕް އެވެ. މި މުބާރާތްތައް ކެންސަލްކުރަން ޖެހުނީ ޗައިނާ ސަރުކާރުން ހަރުކަށިކަމާ އެކު ޒީރޯ ކޮވިޑް ޕޮލިސީގެ ކަންކަން ތަންފީޒްކުރަން އަމާޒުހިފާފައިވާތީ އެވެ.
ޓެނިސްގެ ރޭންކިން އާއި އެހެނިހެން ކަންކަމަށް ބަލާފައި، ޗައިނާގެ މުބާރާތްތައް ކެންސަލްކުރުމުން، އޭޓީޕީން ވަނީ ކަލަންޑަރަށް އިތުރު ހަ މުބާރާތެއް ހިމަނައިފަ އެވެ.
ޗައިނާގައި މި އަހަރު ބާއްވަން ނިންމި އޭޝިއަން ގޭމްސް އާއި އަންނަ އަހަރުގެ އޭޝިއަން ކަޕް ވެސް ފުރަތަމަ ޝެޑިއުލްކުރި ގޮތަށް ނުބޭއްވުނެވެ. އޭޝިއަން ގޭމްސް އަންނަ އަހަރަށް ފަސްކުރިއިރު، އަންނަ އަހަރުގެ އޭޝިއަން ކަޕް ހޯސްޓް ކުރުމުގެ ފުރުސަތު ޗައިނާ އަށް ޖެހުނީ ދޫކޮށްލާށެވެ.
އޭޓީޕީން އަލަށް ހިމެނި އިވެންޓްތައް އޮންނާނީ ސެން ޑިއޭގޯ، ސޯލް، ޓެލް އަވީވް، ފްލޮރެންސް، ގިޖޯން އަދި ނޭޕްލްްސް އެވެ. މި އިވެންޓްތައް ކުރިއަށްދާނީ ސެޕްޓެމްބަރު 19 އިން އޮކްޓޫބަރު 23 އަށެވެ.
ޓެނިހުގައި ކުރިއަށް އޮތް އެއް މުބާރާތަކީ ތަރިން ބެހިގެންދާ އިވެންޓެއް ގޮތަށްކުރިއަށްދާ ލޭވާ ކަޕް އެވެ. އެ ގޮތުން ތިން ދުވަހުގެ މުއްދަތަށް ކުރިއަށްދާ މި މުބާރާތަށް ޓީމު ބަހާފައި އޮންނަނީ ޔޫރަޕްގެ ޓީމަކާއި ދުނިޔޭގެ އެހެން ހުރިހާ ބައްރެއް އެއްކޮށް ހިމެނޭ ޓީމެއް ގޮތަށެެވެ. މި މުބާރާތް އޮތީ ސެޕްޓެމްބަރު 23-25 އަށް ލަންޑަންގަ އެވެ.
