ޔުނިވާސިޓީތަކާއި ކޮލެޖް އަދި ހައި ސްކޫލްތަކަށް ހުޅުވާލައިގެން ކުރިއަށްގެންދާ "އައިޔޫއެމްއެސްޔޫ ހޭންޑްބޯލް ފިއެސްޓާ 2022"ގެ ފިރިހެން ބައިން މެޕްސް ކޮލެޖް އަދި އަންހެން ބައިން ގައުމީ ޔުނިވާސިޓީ (އެމްއެންޔޫ) އިން ޗެމްޕިއަންކަން ހޯދައިފި އެވެ.
މިއީ ދިވެހި ރާއްޖޭގެ އިސްލާމީ ޔުނިވާސިޓީގެ ދަރިވަރުންގެ ގުޅުމުގެ ފަރާތުން، މޯލްޑިވްސް ހޭންޑްބޯލް އެސޯސިއޭޝަނާ ގުޅިގެން ކުރިއަށް ގެންދިޔަ މުބާރާތެކެވެ.
ހަފުތާއެއްގެ މުއްދަތަށް ކުރިއަށް ގެންދިޔަ މުބާރާތުގައި ރޭ ފައިނަލުގެ މެޗުތައް ނިންމާލާފައިވާއިރު, ފިރިހެން ބައިން މެޕްސް ކޮލެޖް ޗެމްޕިއަންކަން ހޯދީ މައި ކޮލެޖް ބަލިކޮށެވެ. ފައިނަލުގެ އަންހެން މެޗުގައި އެމްއެންޔޫއިން ކާމިޔާބު ހޯދީ ކްލިކް ކޮލެޖް ބަލިކޮށެވެ.
ފައިނަލުގައި އެމްއައި ކޮލެކް ބަލިކުރި މެޕްސް ކޮލެޖުން ތަށި އުފުލާލަނީ.--- ފޮޓޯ: މުހައްމަދު ޝާބިން/ އަދަދު
މުބާރާތުގެ އެންމެ މޮޅު ފިރިހެން ކުޅުންތެރިޔަކަށް ހޮވިފައިވަނީ އެމްއައި ކޮލެޖްގެ އައިމަން އާދަމް އެވެ. އަންހެން އެންމެ މޮޅު ކުޅުންތެރިޔާއަކީ ގައުމީ ޔުނިވާސިޓީގެ ފިރުޝާނާ ނަސީރު އެވެ.
އެންމެ މޮޅު ހަތް ކުޅުންތެރިން ވެސް ވަނީ ހޮވައިފަ އެވެ. އެގޮތުން ފިރިހެން ބައިން އެންމެ މޮޅު ހަތް ކުޅުންތެރިންނަކީ, ވިލާ ކޮލެޖްގެ އިބްރާހިމް އަލްތާފް ހާފިޒާއި ވިލާ ކޮލެޖްގެ މުހައްމަދު ހާދިފް އާއި އެމްއައި ކޮލެޖްގެ އައިމަން އާދަމް އާއި އެމްއައި ކޮލެޖްގެ އަހުމަދު ނޫހް އާއި އެމްއައި ކޮލެޖްގެ އިބްރާހިމް މުސްފިރާއި މެޕްސް ކޮލެޖްގެ އިބްރާހިމް ރަޝީދު އަދި މެޕްސް ކޮލެޖްގެ އަބްދުالله ހިޝާން އެވެ.
އަންހެން ބައިން އެންމެ މޮޅު ހަތް ކުޅުންތެރިންނަކީ, އެމްއެންޔޫގެ ފިރުޝާނާ އާއި ކްލިކް ކޮލެޖްގެ އައިޝަތު ނަޝާޔާ އާއި ސީއެޗްއެސްއީގެ އައިޝަތު އިބާ އަހުމަދާއި އެމްއެންޔޫގެ ރުނާ އިބްރާހިމާއި ކްލިކް ކޮލެޖްގެ ފާތިމަތު ނިއުޝާ އާއި ކްލިކް ކޮލެޖްގެ ރައިޝާ ޝަރީފް އަދި ސީއެޗްއެސްއީގެ ކައުސަރު އަހުމަދެވެ.
މުބާރާތުގެ ފެއާ ޕްލޭ ޓީމަކީ, އަންހެން ބައިން މެޕްސް ކޮލެޖް އަދި ފިރިހެން ބައިން އެމްއެންޔޫ އެވެ.
ގައުމީ ހޭންޑް ބޯލް ދަނޑުގައި ގިނަ އަދަދެއްގެ ސަޕޯޓަރުންގެ ކުރިމަތީގައި ކުރިއަށް ދިޔަ ފައިނަލް ދެ މެޗް ވެސް އެންމެ ފަހު ވަގުތާ ޖެހެންދެން ވެސް އޮތީ ވާދަވެރިކޮށެވެ. ކޮލެޖް ދަރިވަރުންގެ މެދުގައި ފޯރީގައި ކުރިއަށް ދިޔަ މުބާރާތް އެސްޓީއޯ, އެލިއާ އަދި އުރީދޫ މޯލްޑިވްސް އިން ސްޕޮންސާކުރި އެވެ. މި މުބާރާތުގެ އޮގަނައިޒިން ޕާޓްނަރަކީ ކްލަބް ޒެފްރޯލް އެވެ.
މުބާރާތުގެ ޗެމްޕިއަން ޓީމްތަކަށް ތަށްޓާއި މެޑަލް ހަވާލުކޮށްދެއްވީ, ފައިނަލް މެޗްގެ ޝަރަފުވެރި މެހެމާން, އިސްލާމިކް ޔުނިވާސިޓީގެ ވައިސް ޗާންސެލާ ޑރ. އިބްރާހިމް ޒަކަރިއްޔާ މޫސާ އެވެ.
މި މުބާރާތުގައި ޔުނިވާސިޓީ/ކޮލެޖް ތަކުން ހަތް ޓީމް އަދި ހައި ސްކޫލްތަކުން އެއް ޓީމު ބައިވެރިވި އެވެ. ޔުނިވާސިޓީ/ކޮލެޖްތަކުން ބައިވެރިވެފައިވާ ޓީމުތަކަކީ ދިވެހި ރާއްޖޭގެ އިސްލާމީ ޔުނިވާސިޓީގެ ދަރިވަރުންގެ ގުޅުން، ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަން، ވިލާ ކޮލެޖް ސްޓޫޑެންޓްސް އެސޯސިއޭޝަން، މެޕްސް ކޮލެޖް، ކްލިކް ކޮލެޖް، މޯލްޑިވްސް ބިޒްނަސް ސްކޫލް އަދި އެމްއައި ކޮލެޖެވެ.
ހައި ސްކޫލް ތަކުން ބައިވެރިވެފައިވަނީ ސެންޓާ ފޯ ހަޔާ ސެކަންޑަރީ އެޑިއުކޭޝަން (ސީއެޗްއެސްއީ) އިންނެވެ.
މި މުބާރާތުގެ ފިރިހެން ބައިގައި ހަތް ޓީމު އަދި އަންހެން ބައިގައި އަށް ޓީމު ވާދަކުރި އެވެ.
އިސްލާމީ ޔުނިވާސިޓީގެ ދަރިވަރުންގެ ގުޅުމުގެ ކުޅިވަރު ސެކްރެޓަރީ އަހުމަދު ވަފާދު ހިލްމީ ވިދާޅުވި ގޮތުގައި މި މުބާރާތް ބޭއްވުމުގެ މަގުސަދަކީ ހޭންޑްބޯލް ކުޅޭ ޒުވާން ކުޅުންތެރިން އުފެއްދުމެވެ. އަދި ގިނަ އަހަރުތަކެއް ވަންދެން އިންޓަ ކޮލެޖް ހޭންޑްބޯލް މުބާރާތް ނުބޭއްވި އޮތުން ނިމުމަކަށް ގެނެސް ކޮލެޖްތަކުގެ މެދުގައި ފޯރީގައި މި މުބާރާތް ކުރިއަށް ގެންދިއުން ކަމަށް ވަފާދު ވިދާޅުވި އެވެ.
