އަވައްޓެރި ސްރީލަންކާގެ ރައީސްގެ ބޭބޭފުޅު އަދި ކުރީގެ ބޮޑު ވަޒީރު މަހިންދަ ރާޖަޕަކްސަ، ރާއްޖޭގައި ހިންގާ ސޮނެވާފުށި ރިސޯޓުގެ ވިލާއެއް ގަންނަން އުޅޭ ކަމަށް ބުނެ ދެކެވެމުން އަންނަ ވާހަކަތައް އެ ކުންފުނިން މިއަދު ދޮގުކޮށްފި އެވެ.
ސަރުކާރުގެ އޮފިޝަލަކާ ހަވާލާދީ ރާއްޖޭގެ ނޫހަކުން ރިޕޯޓުކޮށްފައިވާ ގޮތުގައި ރާޖަޕަކްސައަށް ސޮނެވާ ފުށިން ވިލާއެއް ގަތުމަށް ހުށަހަޅާފައިވަނީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދެވެ. އަދި ސޮނެވާގެ ސީއީއޯ ސޯނޫ ޝިވްދަސާނީ، ވަނީ 15 މިލިއަން ޑޮލަރަށް ޕްރައިވެޓް ވިލާއެއް ވިއްކަން އެއްބަސްވެފައިވާ ކަމަށް ވެސް ރިޕޯޓުކޮށްފައިވެ އެވެ.
"މަހިންދަ ރާޖަޕަކްސައަށް ސޮނެވާގެ ވިލާއެއް ވިއްކުމަށް އެއްވެސް މަޝްވަރާއެއް ކުރިއަކަށް ނުދޭ، އަދި ސޮނެވާގެ ސީއީއޯ ސޯނޫ ޝިވްދަސާނީއާއެކު ސީދާ އަދި ނުސީދާކޮށް ވެސް އެއްވެސް ވާހަކައެއް ދެކެވިފައެއް ނުވޭ،" ރިޕޯޓު ދޮގުކޮށް ސޮނެވާއިން ނެރުނު ބަޔާނުގައި ބުނެފައިވެ އެވެ.
ރާޖަޕަކްސަގެ އާއިލާއަށް ސޮނެވާގެ ވިލާއެއް ވިއްކަން އެއްބަސްވެފައިވާ ކަމަށް ބުނާ ވާހަކަތައް އެ ކުންފުނިން ދޮގުކޮށްފައިވާއިރު، އެ ކަމަށް ނަޝީދު އެހީވާ ކަމަށް ބުނެ ދައްކާފައިވާ ވާހަކަތައް ރައްޔިތުންގެ މަޖިލީހުގެ އިދާރާއިން ވެސް ވަނީ ދޮގުކޮށްފަ އެވެ.
އެ އިދާރާއިން ކުރި ޓްވީޓެއްގައި މިއަދު ބުނީ ނަޝީދުގެ ދައުރަކީ ހަމައެކަނި ލަންކާއަށް ބޭރުގެ އެހީ ހޯދުމުގެ މަސައްކަތްތައް ކޯޑިނޭޓް ކުރުން ކަމަށެވެ.
"މާލީ އެހީ ހޯއްދެއްވުމަށް ކުރެވެން ހުރި ހުރިހާ މަސައްކަތެއް ނަޝީދު ކުރައްވަމުން ގެންދަވާނެ، ލަންކާގެ އެތެރޭގެ މައްސަލަތައް ހައްލު ކުރާނީ އެ ގައުމުގެ ރައްޔިތުން،" ރައްޔިތުންގެ މަޖިލީހުގެ ބުނެފައިވެ އެވެ.
ލަންކާގެ ބޮޑުވަޒީރުގެ މަގާމުގައި ހުންނެވި ރާޖަޕަކްސަ އިސްތިއުފާ ދެއްވުމާއެކު އެ ގައުމުން ފުރުން ވަނީ މަނާކޮށްފަ އެވެ. މަހިންދަ ރާޖަޕަކްސަ އިސްތިއުފާ ދެއްވީ އެމަނިކުފާނުގެ ސަޕޯޓަރުން ސުލްހަވެރި މުޒާހަރާއަށް ހުރަސް އެޅުމުން އުފެދުނު ހަމަނުޖެހުމުގެ ތެރެއިން ޕްރެޝަރު ބޮޑުވުމުންނެވެ. އެ ހަމަނުޖެހުމުގައި ބޮޑެތި ގެއްލުންތަކެއް ކުރިމަތިވެ، ނުވަ މީހުން މަރުވި އެވެ.
