ދިގު ވާހަކަ: މާޒީން ހިތި

ދިގު ވާހަކަ: މާޒީން ހިތި

ފުރަތަމަ ބަޔާ ގުޅޭ

ނާއިޝްގެ ފަހަތުން އަހަރެން ލިފްޓަށް ވަނީމެވެ. އޭނާ ހުރީ ފާޑަކަށް ހެވިފަ އެވެ. ބަދަލުގައި އަހަންނަށް ޖެހުނީ ލަދުގަންނާށެވެ. މި ހުރިހާ އިރު މި ޖެހުނު ސަކަރާތުގެ ސަބަބުންނެވެ. ހިތަށް އަރުވައިގެން އުޅުނު ކަންކަމުގެ ސަބަބުންނެވެ.

"އެކަނިތަ؟" ނާއިޝް ލިފްޓުގެ ނަންބަރަށް ފިތައިލަމުން ހީނލި އެވެ.

Advertisement

އަހަރެން ބޮލުން އިޝާރާތްކޮށްލީމެވެ. އާނ އެކޭ ބުނުމުގެ ގޮތުންނެވެ.

"ސުވާލެއް ކޮށްލަންތަ؟" އަނެއްކާ ވެސް ނާއިޝް އަހައިލި އެވެ.

އޭނާ އަހަންނާ ސުވާލު ކުރަނީ ވަކި ހުއްދައެއް ހޯދައިގެން ހެއްޔެވެ؟ ކުރިން ދެ ފަހަރު ވެސް އޭނާ ދައްކަން ބޭނުންވި ވާހަކައެއް ދެއްކީ އެވެ. އަހަރެންގެ ހުއްދައެއް ނުހޯދަ އެވެ.

"ކީއްވެ ބަލަނީ؟ ހުއްދަ ނެތީތަ؟" އަނެއްކާ ވެސް ނާއިޝް އަހައިލި އެވެ.

"ކުރިން ވެސް ހުއްދައެއް ނުހޯދަމެއްނު." އަހަންނަށް ބުނެވުނީ އެވަރަށެވެ.

"މި ވާހަކައިގެ ގޮތުން ހުއްދައަކަށް އެދެން ޖެހުނީއޭ." ނާއިޝް މޫނުމަތިން ފެންނަމުން ދިޔައީ ސީރިއަސް ކަމެވެ.

"އަހައިބަލަ!"

"މީހަކާ ފިލައިގެންތަ ތި އުޅެނީ؟" ނާއިޝް ދެ ލޮލަށް ގޮތެއް ހަދައިލި އެވެ.

އަހަންނަށް ބަލައިލެވުނީ ނާއިޝްގެ މޫނަށެވެ. ކޮނޑުގެ ދެ ފަރާތުން ބުރަކަށި މަތިން ދުވެގަތް ތުރުތުރު ގޮސް ހިނދުނީ ކުޑަކަޅުވާއާ ހަމައަށެވެ. އޭރު ވެސް ނޭނގޭ ތުރުތުރެއް މުޅި ހަށިގަނޑުގައި ދުވަމުން ދިޔަ އެވެ. އެއާއެކު ހިތުގައި އެތައް ސުވާލެއް އުފެދެމުން ދިޔަ އެވެ.

"ކީއްވެ؟" އަހަންނަށް ބުނެވުނީ ކޮން ވާހަކައެއް ކަން އެނގުނީ ވެސް ކިރިޔާ އެވެ. "މި ބުނީ ކާކާހޭ؟"

"މިޒޫއަކަށްނު އެނގޭނީ."

އެ ވަގުތު ލިފްޓުގެ ދޮރު ހުޅުވުނެވެ. އެންމެ ފުރަތަމަ ލިފްޓުން ނުކުތީ ނާއިޝެވެ. އޭނާގެ ފަހަތުން އަހަރެން ބޭރަށް ނުކުތީމެވެ.

"ސެވަން ޒީރޯ ސެވަން." ނާއިޝް އިޝާރާތްކޮށްލީ ކުރިމަތީގައި ހުރި ކޮޓަރިއަށެވެ.

އަހަރެން ދިޔައީ އޭނާގެ ފަހަތުންނެވެ. ލަސް ފިޔަވަޅުތަކެއް އަޅަމުންނެވެ. އޭރު ވެސް ނޭނގޭ ތުރުތުރެއް މުޅި ހަށިގަނޑުގައި ރަސްކަން ކުރަމުން ދިޔަ އެވެ. ނާއިޝްގެ ސުވާލުގެ ސަބަބުން ފާޑަކަށް ބިރު ގަންނާން ފެށީ އެވެ. އޭނާއަށް އަހަރެންގެ ހަގީގަތް އެނގުނީ ހެއްޔެވެ؟ ނޫނީ އޭނާއަށް ކަމެއް ފަޅާ އެރީ ހެއްޔެވެ؟

ކޮޓަރި ދިއްލާނެ ގޮތާއި ފާހާނާ ބޭނުން ކުރާނެ ގޮތުގެ މައުލޫމާތު ހިއްސާކުރީ ނާއިޝެވެ. ކަމެއް ބޭނުން ވެއްޖެ ނަމަ ކަންކަން ކުރާންވީ ގޮތް ވެސް ކިޔައި ދިނީ އޭނާ އެވެ.

"ކެއުން ދޯ!" ނާއިޝަށް ކަމެއް ހަނދާން ވުމުން ބުނެލި އެވެ.

އަހަރެން ބޮޑު ހިނިތުންވުމެއް ތުންފަތުގައި ކުރަހައިލަމުން ހިނިތުންވެލީމެވެ.

"އޯކޭ އަހަރެންގެ ޑިއުޓީ ގަޑީގައި އަންނާނީ އަހަރެން. އަނެއް ޑިއުޓީގައި ހުންނާނީ ރާގިބު. އެއީ ނޭޕާލް ކުއްޖެއް. އޭނާ ހަމަޖައްސައިފަ ބަހައްޓާނަން." ނާއިޝް ބުނެލި އެވެ.

ހުރިހާ ކަމެއް ސާފުކޮށް އޮޅުންފިލުވައިދިނުމަށްފަހު ނާއިޝް ބޭރަށް ނުކުންނަށް ހިނގައިގަތެވެ. އޭނާ ފަސްއެނބުރި ބަލައިލި އެވެ. ލުއި ހިނިތުންވުމަކާ އެކުގަ އެވެ. އަހަންނަށް އަތް ހިއްލައިލެވުނެވެ. ނާއިޝްގެ ކިބައިން ކަމެއް ސާފުކުރާން ބޭނުންވީ އެވެ. ހިތަށް ގިނަވަމުން ދިޔަ ސުވާލުތަކަށް ޖަވާބެއް ބޭނުންވާތީ އެވެ.

"ކިހިނެއްވީ؟ ލަދު ނުގަނެ ބުނޭ. އަހަރުމެންގެ ވަޒީފާއަކީ، ޒިންމާއަކީ ކަސްޓަމަރުންނަށް ބޭނުންވާ ކަންކަން ކޮށްދިނުން. އަހަންނަކީ ދިވެއްސަކަށްވީތީ ލަދު ގަންނާނެ ކަމެއް ނެތް." ނާއިޝް ފުން ނަޒަރަކުން އަހަންނަށް ބަލައިލި އެވެ.

އަހަންނަށް ފުން ނޭވާއެއް ދޫކޮށްލެވުނެވެ. ހިތުގައި އޮތް ސުވާލު ކޮށްލަންވީބާ އޭ ހިތަށް އެރި އެވެ. ފަހަރެއްގައި އެ ސުވާލުކޮށްލެވުނީމަ ހިތް ހަމަޖެހުމެއް ލިބިދާނެ އެވެ. ނޫނެކެވެ. އެ ސުވާލުކޮށްފި ނަމަ އަހަރެން ބަދުނާމު ވެދާނެ އެވެ. ލަދުގަންނަން ޖެހިދާނެ އެވެ. ދެރަވެ މާޔޫސްވާން ޖެހިދާނެ އެވެ.

"އަސްލު ކީކޭ ބުނަން ތިޔަ އުޅެނީ؟" ނާއިޝް ކުރިއަށް ޖެހިލި އެވެ.

އަހަންނަކަށް ނުކެރުނެވެ. ފާޑަކަށް ލަދު ގަންނަ ގޮތްވާން ފެށި އެވެ. އިތުރަށް މޭ ތުރުތުރު އަޅައިގަންނަ ގޮތްވި އެވެ.

"އަހަރެން... އަހަރެން.." ބުނަން އުޅުނު ވާހަކަ ދުލާ ހަމައަކަށް ތިލައެއް ނުވި އެވެ.

"ހޫމް، ހަމަޖެހިފަ ބުނެބަލަ."

"މި ބުނީ. އަހަރެން ބުނަން އުޅުނީ... ބުނަން... ބުނަން.." ފާޑަކަށް އަޑު ވެސް ތުރުތުރު އަޅައިގަތެވެ.

"އަދި ނުބުނަމެއްނު. ބުނަން ތި އުޅުނީ ކީކޭތަ؟" ނާއިޝް ޖޯކު ޖަހައިލީ އަހަންނަށެވެ.

"ގުޅައިފަ.. މިކޮޅަށް ގުޅައިފަ.. އަހަންނަށް ކީކޭތަ ކިޔުނީ؟" ވަރަށް ހިތްވަރުން އަހަންނަށް ބުނެލެވުނެވެ.

"އޯހް." ނާއިޝް ފުން ނޭވާއެއް ބޭރުކޮށްލި އެވެ.

އަހަންނަށް ބޯ ޖަހައިލެވުނެވެ. އަމިއްލަ ތުންފަތުގައި ދައިގަނެވުނެވެ. ނާއިޝް ބުނާނެ ވާހަކައެއް ނޭނގިގެންނެވެ. އޭނާ ގާތުގައި އަހަންނަށް ދެއްކުނު ވާހަކައެއް ޔަގީން ނުވީމަ އެވެ.

"މިޒޫއަކީ އެކަނިވެރިއެކޭ. ބޮޑު ކަމަކުން ސަލާމަތްވާން ޖެހެޔޭ. އެއް މަހަށް ރޫމެއް ނަގައިދޭށޭ. އެޑްވާންސްކޮށް ލާރި ދައްކާނަމޭ. ދެން އެއްވެސް މީހަކަށް މިޒޫ މިތަނުގައި ހުރިކަން ނާންގާށޭ. މިޒޫ މިތަނުގައި ޗެކްއިންވި ކަން ވެސް ސިސްޓަމަށް ނޭނގޭހެން ހަދައިދޭށޭ." ނާއިޝް ފުން ނޭވާއެއް ބޭރުކޮށްލަމުން އަހަރެންގެ މޫނަށް ބަލައިލި އެވެ.

"ދެން." އަނެއްކާ ވެސް އަހަންނަށް އަހައިލެވުނެވެ.

"ދެން ބުނީ ނިދާ ގަޑީގައި ޑިއުޓީކޮށްދޭން އަހަރެން ޖެހޭނޭ އިންނަން،" ނާއިޝް ހޭންފެށި އެވެ. "މިޒޫގެ ފިރިމީހާއަށް ވެގެން އުޅޭށޭ."

އަހަންނަށް ލޮލަށް ގޮތެއް ހަދައިލަމުން ފާޑަކަށް ނާއިޝްގެ މޫނަށް ބަލައިލެވުނެވެ. އަހަންނަށް އެ ކަހަލަ ވާހަކައެއް ވެސް ބުނެވުނީ ހެއްޔެވެ؟

"އެ ދޮގު. އެހެންނެއް ނުބުނޭ،" ނާއިޝް އަހަންނަށް މަޖާކޮށްލީ އެވެ. "ބުނި އެހެން މީހުންނަށް މިޒޫގެ ކަންކަން ހަވާލު ނުކޮށް އަހަރެން ހުރިހާ ކަމަކާ ހަވާލުވާން."

އެއީ އަހަރެން ބުނި ވާހަކައެކެވެ. އެކަން އަހަންނަށް ޔަގީނެވެ. ނަސީބަކުން ނާއިޝަކީ އަހަރެން އުއްމީދުކުރި ކަހަލަ ރީތި ޒުވާނެކެވެ. އަޅައިގަންނަ ކަހަލަ ސިފަތަކެއް ލިބިފައިވާ މީހެކެވެ. އޭނާގެ މޫނުމަތިން ފެންނަނީ މާތްކަމެވެ. އޯގާތެރިކަމެވެ. އިހުސާންތެރި ކަމާއި ހިތްހެޔޮ ކަމެވެ.

"އަސްލު ބޮޑުކަމަކުން ސަލާމަތްވާން ދޯ ތި އައީ؟" ނާއިޝް އަހައިލި އެވެ.

ބަދަލުގައި އަހަންނަށް ބޯ ޖަހައިލެވުނެވެ. ނާއިޝްގެ މޫނަށް ބަލައިލެވުނެވެ. އޭރު ލޮލަށް ކަރުނަތައް ދިޔައީ ގިނަވަމުންނެވެ.

"ގެއްލިގެން ހޯދަންޏާ އޯ." ނާއިޝް ކޮށްލީ އަހަރެން އޭނާ ލައްވާ ކުރުވަން ބޭނުންވެފައިވާ ސުވާލެކެވެ.

"އަޅައި ނުލީމަ ނިމުނީ."

"އެހެންވާނެބާ؟" ނާއިޝްގެ މޫނަށް ދެތިން ރޫ އަރުވާލި އެވެ.

"އެހެން ވާނެއްނު. އަހަރެން މި ގެސްޓު ހައުހަށް ޗެކް އިންވި ކަމެއް ނޭނގޭނެއްނު."

"އާން! އަހަރެން އޮންނާނީ މޮޅު ކަމެއް ކޮށްލައިފަ." ނާއިޝް ހީނލި އެވެ.

"މިދިޔަ އަހަރު ރާއްޖެއާ އިޓަލީގެ މީހެއްގެ މައުލޫމާތު ސިސްޓަމުން ހޯދައިފަ އެ މީހާގެ ނަމުގައި މި ރޫމު ބުކުކޮށްފަ ހުންނާނީ." ނާއިޝް މޫނަށް ގޮތެއް ހަދައިލި އެވެ.

"ޝުކުރިއްޔާ!"

"އޭ ޝުކުރަކުން ނުވާނެ އިނގޭ. މި އަހަރެން ދުވަހަކު ވެސް ކުރި ކަމެއް ނޫން. އެކަމަކު ދިވެހި އަންހެން ކުއްޖަކު، އެހާ ބޮޑަށް ރޮއި އާދޭސްކުރީމަ އަހަރެންގެ ހިތުގައި ހަމްދަރުދީ އުފެދުނީ."

"ދެން ކީއްބާ ކޮށްދޭންވީ؟"

"ފަހުން ބުނާނަން."

ނާއިޝް ކޮޓަރިން ނުކުންނަށް ހިނގައިގަތެވެ.

ނާއިޝް ނުކުތުމާއެކު އަހަރެން ކޮޓަރި ތަޅުލީމެވެ. އަވަސްއަވަހަށް ފާހާނާއަށް ވަނީމެވެ. ބޭނުންވީ ރަނގަޅަށް ފެންވަރައިލާށެވެ. މިހާ ހިސާބަށް މި އާދެވުނީ ހާދަ ހިތްވަރެއް ކޮށްގެންނެވެ. ހާދަ މަސައްކަތެއް ކޮށްގެންނެވެ. އެތައް ކަމެއް ސިއްރުގެ ބަނޑަށް އަޅައިދީގެންނެވެ. ފެން މާގަނޑު ދޫކޮށްލީމެވެ. އިސްތަށިގަނޑުގެ ތެރެއަށް އިނގިލިތައް މަހައިލީމެވެ. ލިބުނު އަރާމެއްގެ ބޮޑުކަމުން ދެ ލޯ މަރައިލެވުނެވެ.

ކުއްލިއަކަށް ނޭފަތުގައި ޖެހުނީ އާދަޔާ ހިލާފު ވަހެކެވެ. އެއީ ލޭގެ ވަހެވެ. އަހަރެންގެ ހިތް ތެޅި ގަތެވެ. މަޑުމަޑުން ލޯ ހުޅުވާލަމުން ދެ އަތް ތިލައަށް ބަލައިލެވުނެވެ. ހީވީ ހަމަ ރަނގަޅަށެވެ. މުޅި އަތުގައި ހުރީ ރަތްލެޔެވެ. އަވަސް އަވަހަށް ބޮލާ ދިމާއަށް ފެންމާގަނޑު އަރިކޮށްލެވުނެވެ. އަހަރެން ބޭނުންވީ އެކަމުން ސަލާމަތްވާށެވެ. މުޅި ގައިން ލޭތައް ފިލުވާށެވެ.

އެތައް އިރެއް ވަންދެން ބޮލަށް ފެން އަޅަމުން ދިޔައީމެވެ.

އެންމެ ފަހުން އަތް ތިލައަށް ބަލައިލެވުނެވެ. ލޭގެ އަސަރެއް ނެތެވެ. ބަލައިލެވުނީ ތިރިއަށެވެ. މުޅި މުށިގަނޑުގައި ހުރީ ރަތްކުލަ އެވެ. ފެނާއެކުވެފައިވާ ލޭގެ ކުލަ އެވެ.

"އަނެއްކާ! ނާއިޝަށް އެނގުނުބާ؟" އަހަންނަށް ދެ ހިޔާލެއްގައި ހުރެ އަމިއްލަ ނަފުސާ ސުވާލުކޮށްލެވުނެވެ.

ނޫނެކެވެ. ނުފެންނާނެ އެވެ. އޭނާއަކަށް ނޭނގޭނެ އެވެ. ފެންވެރުމުން އެ ސާފުވީ އިސްތަށިގަނޑެވެ. އިސްތަށިގަނޑުގައި ހޭކިފައި ހުރި ލެޔެވެ. އިސްތަށިގަނޑުގައި ތަތްވެ ގަނޑުވެފައި ހުރި ލެޔެވެ. އަހަރެން ބޭރަށް ނުކުތީ އަތްފައި ރަނގަޅަށް ދޮވެގެންނެވެ. މޫނާއި ހަށިގަނޑު ވެސް ރަނގަޅަށް ދޮވެގެންނެވެ. އަހަރެން ނުދޮންނަނީ އިސްތަށިގަނޑެވެ.

ޝައްކެއް ވިޔަސް ޝައްކުވާނީ ނާއިޝް އަށެވެ. އޭނާއަށް ޝައްކުވި ނަމަ އެ ވާހަކަ ދައްކާނެ އެވެ. އެއީ އެހައި ވެސް ހަމަޖެހޭ މީހެކެވެ.

ކުއްލިއަކަށް ކޮޓަރީގެ ތެރެއިން ރަނގަބީލެއްގެ އަޑު އިވުނެވެ. އަހަންނަށް ލިބުނީ ސިހުމެކެވެ. އަވަސް އަވަސް ކޮށްލައިގެން ތުވާލިގަނޑު ނަގައި ގައިގައި އޮޅައިލީމެވެ. (ނުނިމޭ)

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox