އެމްޑީޕީގެ ޗެއާޕާސަން ހޮވުމުގެ ވާދަވެރި އިންތިހާބުގައި އިކޮނޮމިކް މިނިސްޓަރު ފައްޔާޒު އިސްމާއިލް, މާފަންނު އުތުރު ދާއިރާގެ މެންބަރު އިމްތިޔާޒު ފަހުމީގެ މައްޗަށް ބޮޑު އަގުލަބިއްޔަތަކުން ކުރި ހޯއްދެވީ އިއްޔެ އެވެ.

ކެމްޕެއިންގެ ފޯރި އިންތިހާއަށް ގަދަވެގެންދިޔަ, މި އިންތިހާބުގައި ފައްޔާޒު ނުކުންނެވީ ރައީސް އިބްރާހިމް މުހައްމަދު ސޯލިހުގެ ފަޅިން, އެމަނިކުފާނުގެ ތާއިދާއެކު އެވެ. އިމްތިޔާޒު ހުންނެވީ އެމްޑީޕީގެ ރައީސް, ރައީސް މުހައްމަދު ނަޝީދުގެ ތާއިދާ އެކު އެވެ.

އިއްޔެ ކުރިއަށް ދިޔަ އިންތިހާބުގެ ވަގުތީ ނަތީޖާ ދައްކާ ގޮތުން، އިމްތިޔާޒުގެ މައްޗަށް ފައްޔާޒު ކުރި ހޯއްދެވީ 7،000އަށް ވުރެ ގިނަ ވޯޓުގެ ތަފާތަކުންނެވެ. ފައްޔާޒު ކާމިޔާބު ކުރެއްވީ 58 ޕަސެންޓު ވޯޓާއެކުގަ އެވެ. އިމްތިޔާޒަށް ލިބިވަޑައިގެންނެވީ 42 ޕަސެންޓު ވޯޓެވެ.

އިންތިހާބުގެ ވަގުތީ ނަތީޖާއަށް ބަލާއިރު، މާލޭ ސިޓީގެ އަގުލަބިއްޔަތު ކުޑަ ތަފާތަކުން ހޯއްދަވައިފައިވަނީ އިމްތިޔާޒެވެ. އިމްތިޔާޒަށް މާލޭ ސިޓީން ޖުމްލަ 1920 ވޯޓު ލިބިވަޑައިގެންނެވިއިރު، ފައްޔާޒަށް ވަނީ 1873 ވޯޓު ލިބިވަޑައިގެންފަ އެވެ.

އައްޑޫ ސިޓީގެ ވަގުތީ ނަތީޖާއިން 171 ވޯޓުގެ ތަފާތަކުން ކުރި ހޯއްދަވަނީ ފައްޔާޒެވެ. މުޅި އައްޑޫ ސިޓީން ފައްޔާޒަށް 2348 ވޯޓު ލިބިވަޑައިގެންނެވިއިރު، އިމްތިޔާޒަށް 2177 ވޯޓު ލިބިވަޑައިގެންނެވި އެވެ.

ޖުމްލަ 94،211 މީހުންނަށް ވޯޓުލުމުގެ ހައްގު މި އޮތް އިންތިހާބުގައި މާލޭގައި 87 ވޯޓު ފޮށި ބެހެއްޓިއިރު, 194 ރަށެއްގައި ވޯޓު ފޮށި ބަހައްޓާފައިވެ އެވެ. އެއީ ޖުމްލަ ޖުމްލަ 281 ވޯޓު ފޮއްޓެވެ.

ނަޝީދާ ޒާތީ ކަމެއް ނެތް، އެކުގައި ތިބެވޭނެ

ފައްޔާޒުގެ ކެމްޕޭން ޖަގަހައަށް ވަޑައިގެން ސަޕޯޓަރުންނާ އެކު އިންތިހާބުގެ ކާމިޔާބީ ފާހަގަ ކުރުމަށް ފަހު، މީޑިއާތަކާ ބައްދަލު ކުރައްވައި އޭނާ ވިދާޅުވީ އިންތިހާބާ އެކު އެތެރޭގެ ވާދަވެރިކަން ބޮޑުވެފައިވީ ނަމަވެސް ޕާޓީ ރޫޅި ބައިބައިވެގެން ދާނެ ކަމަށް ގަބޫލު ނުކުރައްވާ ކަމަށެވެ.

"ރައީސް ނަޝީދާ އެކު މަސައްކަތް ކުރަން އަޅުގަނޑަށް ވަރަށް ފަސޭހަ އަބަދުވެސް، އަޅުގަނޑުގެ ޒާތީ އެއްވެސް ކަމެއް ނޯންނާނެ، އަޅުގަނޑު ދެކެނީ ރައީސް ނަޝީދުގެ ވެސް އެއްވެސް ޒާތީ ކަމެއް ނޯންނާނެ،" މީގެ ކުރިން އެކުގައި ގިނަ ކާމިޔާބީތަކެއް ޕާޓީއަށް ހޯދުނުކަން ފާހަގަ ކުރައްވައި ފައްޔާޒް އިއްޔެ ރޭ ވިދާޅުވި އެވެ.

އެމްޑީޕީގެ އާންމު މެންބަރުންގެ ނިންމުމަށް އިހުތިރާމުކޮށް، ވާދަވެރި އިންތިގެ ޓީމުގައި ތިއްބެވި ބޭފުޅުން އޭނާ އެކު 2023 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމަށް އެކުގައި ކުރަން ޖެހޭ މަސައްކަތްތައް ކުރެވޭނެ ކަމަށް އޭނާ ވިދާޅުވި އެވެ.

"އަޅުގަނޑު ކުޑަ ޝައްކެއް ނުކުރަން އެކުގައި މަސައްކަތް ނުކުރެވޭނެ ކަމަކަށް. މިހާރު ނަތީޖާ ލިބިގަތީމަ އަޅުގަނޑާއެކު އެ އެންމެން ވެސް ހަމަ މަސައްކަތް ކުރާނެ،" ފައްޔާޒު ވިދާޅުވި އެވެ.

ބައެއް މުހިންމު ހަބަރުތައް

• ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު ހޮވުމަށް ބޭއްވި ބައި- އިލެކްޝަން ވޯޓެއްގެ ހަނި ފަރަގަކުން ޕީޕީއެމުން ކާމިޔާބުކުރީ އިއްޔެ އެވެ.

• އެމްޑީޕީގެ އެމްޑީޕީގެ ޗެއާޕާސަން އިންތިހާބަށް ފަހުގައި ވެސް ޕާޓީގެ އެތެރޭގައި ހަމަޖެހުން އޮންނާނެ ކަމުގެ ޔަގީންކަން އެބަ އޮތް ކަމަށް އެ ޕާޓީގެ އިސް ލީޑަރު، ރައީސް އިބްރާހީމް މުހައްމަދު ސޯލިހު ވިދާޅުވީ އިއްޔެ އެވެ.

• އެމްޑީޕީގެ އެތެރޭގެ އިންތިހާބުގައި އެ ޕާޓީގެ އަންހެނުންގެ ރޫހުގެ ރައީސްކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އިންތިހާބުވީ އިއްޔެ އެވެ.

ދުވަހުގެ ކޯޓޭޝަން

ރައީސް އިބްރާހިމް މުހައްމަދު ސޯލިހު 2023 ގެ ރިޔާސީ އިންތިހާބުގައި ވާދަކުރެއްވުމާ ގުޅޭގޮތުން ރައީސް މުހައްމަދު ނަޝީދު ދެކެވަޑައިގަންނަވާ ގޮތް ހާމަކުރައްވަމުން ވިދާޅުވީ:

އަޅުގަނޑަށް އެނގޭ އެއްޗަކީ ރައީސް ވަރަށް ބޮޑަށް ވިސްނަވަން ޖެހޭނެކަން. އެމްޑީޕީ އާ ދުރުވެ ވަޑައިގެންފިނަމަ، ގުޅިފައިވާ ސަރުކާރެއްގެ ގޮތުގައި ސިފަކުރައްވަމުން ވެރިކަން ހިންގަވަމުން މިހާތަނަށް ގެންދެވިފައި ވަނީ،

ދުވަހުގެ ފޮޓޯ

އެމްޑީޕީގެ ޗެއާޕާސަންގެ މަގާމަށް އިންތިހާބުވެވަޑައިގެންވި އިކޮނޮމިކް މިނިސްޓަރު ފައްޔާޒު އިސްމާއީލް އޭނާގެ ސަޕޯޓަރުންނާއެކު ކެމްޕޭން ޖަގަހައިގައި އުފާފާޅުކުރައްވަނީ. އިންތިހާބުގައި ވޯޓުލި މީހުންގެ ތެރެއިން 58 ޕަސެންޓު އޭނާ ހޯއްދެވި --- ފޮޓޯ: މުހައްމަދު ޝާބިން/އަދަދު