ކޮވިޑާ ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ގާއިމުކުރި ކޯލް ސެންޓަރު، 1676ގެ ހިދުމަތް މީގެ ފަހުން ރަސްމީ ގަޑިތަކުގައި އެކަނި ދޭ ގޮތަށް ހަމަޖައްސައިފި އެވެ.
މީގެ ކުރިން އެ އެޖެންސީން ހިދުމަތް ފޯރުކޮށްދެމުން ދިޔައީ 24 ގަޑިއިރު އެވެ. ނަމަވެސް މާދަމާއިން ފެށިގެން ކޯލް ސެންޓަރުގެ ހިދުމަތް ލިބޭނީ ރަސްމީ ގަޑިތަކުގަ އެވެ.
އެޗްޕީއޭން ބުނީ އެ ހިދުމަތަށް ގެނައި ބަދަލާއެކު ކޮވިޑަށް ޕޮޒިޓިވްވާ މީހުން ކޯލް ސެންޓަރަށް ގުޅައިގެން ހަމަޖައްސައިދެމުން ގެންދިޔަ ޑޮކްޓަރުންގެ އޮންލައިން ކޮންސަލްޓޭޝަން ދިނުން ހުއްޓާލާނެ ކަމަށެވެ.
އަދި މާލެ ސަރަހައްދުގައި ކޮވިޑަށް ޕޮޒިޓިވްވާ މީހުން ނުވަތަ ގާތުން އެއްތަންވެގެން ކަރަންޓީނުގައި ތިބޭ މީހުން ސިއްހީ ފަރުވާ ހޯދަން ޖެހޭ ހާލަތްތަކުގައި އެންމެ ކައިރި ހޮސްޕިޓަލަކަށް ގުޅައިގެން އޮންލައިން ކޮންސަލްޓޭޝަން ނުވަތަ އެ ހޮސްޕިޓަލަކުން ކަނޑައަޅާފައިވާ ގޮތުގެ މަތިން ސިއްހީ ފަރުވާ ހޯދުމަށް އެޗްޕީއޭން ވަނީ އެދިފަ އެވެ.
އަދި މިފަދަ މީހުންގެ ތެރެއިން ކުއްލިއަކަށް ހާލު ބޮޑުވެ، އެމެޖެންސީގައި ފަރުވާ ދޭން ޖެހޭ މީހުން އެމެޖެންސީ މެޑިކަލް ސާވިސް (އޭއެމްއެސް) ގެ ނަންބަރު 100 އަށް ގުޅުމަށް އެޗްޕީއޭ އިން އެދެ އެވެ.
ރާއްޖޭގައި ކޮވިޑް ފެތުރޭ މިންވަރު ކޮންޓްރޯލް ކުރެވިފައި ވާތީ ރާއްޖޭގައި އިއުލާންކޮށްފައިވާ އާއްމު ސިއްހަތުގެ ކުއްލި ނުރައްކަލުގެ ހާލަތު ވަނީ ނިމުމަކަށްގެނެސް ކޮވިޑާ ގުޅިގެން އަޅާފައިވާ ފިޔަވަޅުތައް އުވާލާފަ އެވެ.
