ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ރާއްޖެއަށް ކޮވިޑްގެ ތަފާތު ވޭރިއެންޓުތައް ދެނެގަތުމަށް ބޭނުންކުރާ ޖީން ސީކުއެންސް މެޝިނެއް ހަދިޔާކޮށްފި އެވެ.
މި މެޝިން މެދުވެރިކޮށް ކޮވިޑް ފެތުރޭ މިންވަރު ބެލުމާއި، ވައިރަސްގެ ހަރަކާތްތަކާއި، އެއަށް އަންނަ ބަދަލުތައް ދެނެގަތުމަށާއި، ބަލިމަޑުކަން ކޮންޓްރޯލް ކުރުމަށް އެހީތެރިވެދޭނެ ކަަމަށް ޑަބްލިޔޫއެޗްއޯއިން ބުނެ އެވެ.
އެގޮތުން، ޖީން ސީކުއެންސިންގެ ކެޕޭސިޓީ ރާއްޖޭގައި ގާއިމުކުރެވުމުން، ކޮވިޑްގެ އިތުރުން އިންފްލުއެންޒާ، ހިމަބިހި ފަދަ ނުރައްކާތެރި އެހެން ބަލިތައް މުޖުތަމައުގެ ތެރޭގައި ފެތުރުން ހުއްޓުވާ ކޮންޓްރޯލް ކުރުމަށް އެހީތެރިވެދޭނެ ކަމަށް ޑަބްލިޔުއެޗްއޯއިން ބުނެ އެވެ.
އަދި، މި މެޝިންގެ އެހީގައި ފަސޭހަކަމާއެކު ކޮވިޑްގެ ވޭރިއެންޓުތައް ދައުރުވާ މިންވަރު ދެނެގަނެވޭނެ އެވެ.
ޑަބްލިއުއެޗްއޯއިން ހަދިޔާކުރި މި ޖީން ސީކުއެންސް މެޝިނާއި ރާއްޖޭން ހަވާލުވީ ހެލްތު މިނިސްޓަރު އަހުމަދު ނަސީމެވެ.
ރާއްޖޭގައި ކޮވިޑަށް ޓެސްޓް ކުރާ ސާމްޕަލްތަކުގެ ވޭރިއެންޓު ދެނެގަތުމަށް ޓެސްޓް ކުރެވޭނެ ތަނެއް ގާއިމް ކުރުމަށް މަސައްކަތް މިހާރު ވަނީ ފަށާފައި ކަމަށް ހެލްތު އިމްޖެންސީ އޮޕަރޭޝަން ސެންޓަރު (އެޗްއީއޯސީ) އިން ވަނީ ބުނެފަ އެވެ. އަދި، އެއަށް ބޭނުންވާ ސާމާނު ވަނީ ރާއްޖެ ގެނެސްފަ އެވެ.
ރާއްޖޭގައި ކޮވިޑް ފެތުރޭ މިންވަރު ކުޑަވެ ބަލި ކޮންޓްރޯލް ކުރެވިފައިވާތީ، ކޮވިޑާ ގުޅިގެން އިއުލާންކޮށްފަ އޮތް ސިއްހީ ކުއްލި ނުރައްކަލުގެ ހާލަތު ދެ އަހަރަށް ފަހު ވަނީ އުވާލާފަ އެވެ. އަދި ރައްކާތެރިކަމުގެ ގޮތުން އަޅާފައިވާ ގިނަ ފިޔަވަޅުތަކެއް މިދިޔަ މަހު ވަނީ ނިމުމަކަށް ގެނެސް އާންމު ހާލަތަށް ރުޖޫއަވެފަ އެވެ.
