މިދިޔަ އަހަރު ނެޓްފްލިކްސްއިން ނެރުނު ކާމިޔާބު ސީރީޒް "ސްކުއިޑް ގޭމް" ގެ ދެ ވަނަ ސީޒަންގެ ސްކްރިޕްޓް ލިޔަން އަދިވެސް ނުފަށާ ކަމަށާއި އެންމެ އަވަހަށް ވެސް ސީރީޒް ރިލީޒް ކުރެވޭނީ 2024 ވަނަ އަހަރުގެ ފަހުކޮޅުގައި ކަމަށް ޑިރެކްޓަރު ހްވާންގް ޑޮންގް ހިޔުކް ބުނެފި އެވެ.
"ދެ ވަނަ ސީޒަންގެ މަސައްކަތް ޖެހޭނީ ފަށަން. އުއްމީދަކީ 2024 ވަނަ އަހަރު ނިމުމުގެ ކުރިން ފޭނުންނާ ހަމައަށް ގެނެސްދިނުން،" ދެކުނު ކޮރެއާގެ ކިޔުންތެރިޔާ އަދި ޑައިރެކްޓަރު ފްރާންސްގެ ކޭންސްގައި އޮންނަ އެމްއައިޕީޓީވީ ފެސްޓިވަލުގައި ބުންޏެވެ.
އާދީއްތަ ދުވަހު އޮތް ކޭންސީރީޒް ފެސްޓިވަލުގައި ވެސް ހްވާންގް ބުނީ މިހާތަނަށް ލިޔެވުނީ ދެ ވަނަ ސީޒަންގެ ސްކްރިޕްޓުން އެންމެ ތިން ސަފްހާ ކަމަށެވެ.
"ސްކުއިޑް ގޭމް" ގެ ނުވަ އެޕިސޯޑުގެ ފުރަތަމަ ސީޒަނުން ދައްކުވައިދެނީ އިގްތިސާދީ ހަމަހަމަކަން ނެތުމުން ދަރަންޏާއި ދަތި ހާލުގައި އުޅެން ޖެހޭ އެތައް ސަތޭކަ ބަޔަކު ފުރާނަ ނުރައްކަލަށް ހުށަހަޅައިގެން، ފައިސާ ހޯދަން ކުޑަކުދިންގެ ގޭމުތަކެއް ކުޅޭ ތަނެވެ. ޖުމްލަ 45.6 ބިލިއަން ވޮން ނުވަތަ 38 މިލިއަން ޑޮލަރު ލިބޭނީ މޮޅުވާ މީހަކަށެވެ.
މިދިޔަ އަހަރުގެ އޮކްޓޯބަރު މަހު ނެޓްފްލިކްސްއިން ބުނީ 142 މިލިއަން ސަބްސްކްރައިބަރުން އެ ސީރީޒް ބަލާފައިވާ ކަމަށެވެ. އެއީ ނެޓްފްލިކްސް ބޭނުންކުރާ މީހުންގެ ތިންބައި ކޮށްފައި ދެ ބަޔަށް ވުރެ ވެސް ގިނަ އެވެ.
ނަމަވެސް އެ ސީރީޒްއަކީ ފީޗާ ފިލްމެއްގެ ގޮތުގައި 2009 ވަނަ އަހަރު ހްވާންގް ލިޔުނު ސްކްރިޕްޓެއްގެ މައްޗަށް ބިނާކޮށްފައިވާ ސީރީޒެކެވެ. އެ ސްކްރިޕްޓުގެ މައްޗަށް ޓީވީ ސީރީޒް ހެދުމުގެ މަސައްކަތް ފެށީ 206 ވަނަ އަހަރު ނެޓްފްލިކްސްގެ ހިދުމަތް ދެކުނު ކޮރެއާގައި ފެށުމުންނެވެ.
އެ ސީރީޒްގެ ދެ ވަނަ ބައިގެ އިތުރުން ފިލްމެއްގެ މަސައްކަތް ވެސް ހްވާންގް ދަނީ ކުރަމުންނެވެ. "ކޭއޯ ކްލަބް" ގެ ނަން ދީފައިވާ ފިލްމަކީ އިޓަލީގެ ލިޔުންތެރިޔާ އަމްބޭޓޯ އީކޯގެ ފޮތެއްގެ މައްޗަށް ތައްޔާރު ކުރާ ފިލްމެކެވެ. އެއީ އުމުރުން ދުވަސްވީ މީހުން މެރުމާ ގުޅޭ ކަންތައްތަކެއް ފެންނާނެ ފިލްމެކެވެ.
ހްވާންގް ބުނީ އެއީ "ސްކުއިޑް ގޭމް" އަށް ވުރެ ވެސް "ވަޔެލެންޓް" ސީންތަކެއް ފެންނަ މަސައްކަތަކަށް ވާނެ ކަމަށެވެ.
