ޑޭވިޑް އަދި ވިކްޓޯރިއާ ބެކަމް އުމުރުން 10 އަހަރުގެ އަންހެން ދަރިފުޅާ ލަންޑަންގައި ދިރިއުޅޭ ގޭގައި ތިބި ވަގުތެއްގައި އެ ގެއިން ވައްކަންކޮށްފި އެވެ.
ކެންސިންގްޓަންގައި ހުންނަ ގެއިން ވައްކަން ކުރީ ފެބްރުއަރީ 28 ވަނަ ދުވަހުގެ ރޭގެ ވަގުތެއްގަ އެވެ. ލަންޑަން ފުލުހުން ބުނީ އެ ގެއިން ބައެއް ތަކެތި ވަގަށް ނަގާފައިވާ ކަމަށެވެ.
އެކަމަކު ތުހުމަތު ކުރެވޭ އެއްވެސް މީހަކު އަދިވެސް ހައްޔަރެއް ނުކުރެ އެވެ. އެ ވައްކަމާ ގުޅޭ ތަހުގީގު ކުރިއަށްދާ ކަމަށް ފުލުހުން ބުންޏެވެ.
އިނގިރޭސިވިލާތަށް ނިސްބަތްވާ ޑޭވިޑް ބެކަމް ފުޓްބޯޅައިން ރިޓަޔާ ކުރީ 2013 ވަނަ އަހަރު އެވެ. މިހާރު އޭނާއަކީ އެމެރިކާގެ މޭޖާ ލީގް ސޮކާގެ ފުޓްބޯޅަ ކްލަބް އިންޓާ މަޔާމީ ސީއެފްގެ ވެރިޔާ އެވެ. އޭގެ އިތުރުން ބެކަމް ދަނީ ޔުނިސެފްގެ އެމްބެސެޑަރެއްގެ ގޮތުގައި ވެސް ޒިންމާތަކެއް އަދާ ކުރަމުންނެވެ.
ވިކްޓޯރިއާ ބެކަމް މަޝްހޫރުވީ 1990 ގެ އަހަރުތަކުގައި ވިދަން ފެށި މިޔުޒިކް ބޭންޑް "ސްޕައިސް ގާލްސް" ގެ "ޕޯޝް ސްޕައިސް" ގެ ގޮތުގަ އެވެ. މިހާރު އޭނާއަށް މަގްބޫލުކަން ލިބެނީ ފެޝަން ލޭބަލްގެ ސަބަބުންނެވެ.
