ހަތް އަހަރުގެ މެދުކެނޑުމަކަށް ފަހު އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް މި ފަހަރު ބާއްވާއިރު، ގިނަ ގޮތްގޮތުން މި ފަހަރުގެ މުބާރާތް ވަނީ ހާއްސަވެފަ އެވެ. އޭގެ ތެރެއިން އެއް ކަމަކީ ފުރަތަމަ ފަހަރަށް އަންހެން ޑިވިޝަނަކާ އެކީ މުބާރާތް ބޭއްވުމެވެ. އަންހެން ޑިވިޝަނުގައި ޖުމްލަ ހަތަރު ބޮޑީބޯޑަރުން ބައިވެރިވާއިރު، އިއްޔެ ބޭއްވި ހީޓްތަކަށް ފަހު ފައިނަލުގެ ދެ ޖާގަ ވަނީ ކަށަވަރުވެފަ އެވެ.
އަންހެން ޑިވިޝަނުގައި ވާދަކުރާ ހަތަރު ބޮޑީބޯޑަރުންނަކީ ދަފީނާ ހަސަން އިބްރާހިމް، ރައުފާ، ލުޖެއިން ހަސަން އަދި ޝާޒިޔާ ސައީދު އެވެ.
ޖުމްލަ ހަތަރު ހީޓަކަށް މި ޑިވިޝަން ބެހިފައިވާއިރު، އިއްޔެ ކުރިއަށްދިޔައީ ފުރަތަ ދެ ހީޓެވެ. ކޮންމެ ހީޓެއްގެ އެއް ވަނަ އަށް ދިޔަ ބޮޑީބޯޑަރު ފައިނަލަށް ހޮވުނުއިރު، ދެ ވަނަ އަށް ދިޔަ ބޮޑީބޯޑަރު ވަނީ ތިން ވަނަ ހޮވާ ހީޓަށް ދަތުރުކޮށްފަ އެވެ.
އެ ގޮތުން ފުރަތަމަ ހީޓުގައި ރައުފާއާ ވާދަކޮށް ދަފީނާ މޮޅުވީ 3.80 ޕޮއިންޓް ސްކޯ ކޮށްގެންނެވެ. ރައުފާ އަށް ސްކޯ ކުރެވުނީ 2.26 ޕޮއިންޓެެވެ. މި ނަތީޖާއާ އެކު އެއް ވަނަ ހީޓުން ފައިނަލަށް ހޮވުނީ ދަފީނާ އެވެ. ދެ ވަނަ ހީޓުގައި ލުޖެއިން ވަނީ 4.90 ޕޮއިންޓް ސްކޯކޮށްފަ އެވެ. އޭނާއާ ވާދަކުރި ޝާޒިޔާ އަށް ލިބިފައިވަނީ 2.73 ޕޮއިންޓެވެ.
ލުޖެއިން ފައިނަލް ހީޓުގައި ދަފީނާއާ ދެކޮޅަށް ނުކުންނައިރު، ތިން ވަނަ ލިބޭނީ ޝާޒިޔާ އާއި ރައުފާ ވާދަކޮށްގެން މޮޅުވާ ބޮޑީބޯޑަރަކަށެވެ. ފައިނަލް ހީޓުތައް އޮންނާނީ މާދަމާ އެވެ.
މި ފަހަރުގެ ބުރުނު ޝިކާރު ބޮޑީބޯޑިން ޗެލެންޖްގައި ފުރަތަމަ ފަހަރަށް ޑިޖިޓަލްކޮށް ޖަޖިންގެ ކަންކަން ކުރިއަށްދާއިރު، ލައިވް ހީޓްސް މެދުވެރިކޮށް އަޕްޑޭޓްސް ފެންނާނެ އެވެ. ޖަޖުން މާކްސް ދޭ ގޮތަށް ބަލާއިރު، ހީޓެއްގެ ދިގު މިނަކީ 20 މިނިޓެވެ. ޖަޖުން މާކްސް ދޭނީ އެ ހީޓެއްގައި އެ ބޮޑީބޯޑަރެއްގެ އެންމެ ގިނަ ޕޮއިންޓް ލިބޭ ރާޅުތަކަށް ބަލައިފަ އެވެ.
ބުރުނު ޝިކާރު ޗެލެންޖްގެ ފުރަތަމަ ދުވަސް ފެނުނީ ވަރަށް ވާދަވެރިކޮށެވެ. ފުރަތަމަ ދުވަހު ޖުމްލަ އެއްކޮށް، 18 ހީޓް ފެނިގެންދިޔައިރު، މެންސް އޯޕަން އާއި ޖޫނިއާ ކެޓަގަރީގެ ހީޓްތައް ވެސް ވަނީ ކުރިއަށް ގޮސްފަ އެވެ.
މި މުބާރާތުގެ ވާދަވެރިކަން ބޮޑުވާނެ އެންމެ ބޮޑު އެއް ސަބަބަކީ މި މުބާރާތަކީ ގައުމީ ބޮޑީބޯޑިން ލީގެއްގެ ނަމުގައި ފަށައި، އަލަތު މުބާރާތް ކަމަށް ވުމެވެ. އަނެއް ކަމަކީ މި މުބާރާތާއި އަންނަ މެއި މަހު ފަށާ ލަބޭރާ ބޮޑީބޯޑިން ޗެލެންޖް ނިމުމުން ގައުމީ ބޮޑީބޯޑިން ޓީމެއް އެކުލަވާލުމެވެ. އެއީ މި ދެ މުބާރާތުގެ ސްކޯރިން އަށް ބަލައިފަ އެވެ. މީގެ އިތުުރުން މި ދެ މުބާރާތަށް ބަލާފައި ގައުމީ ޖޫނިއާ ސްކޮޑެއް ވެސް ނަގާނެ އެވެ.
ރާޅުގަނޑު ސަރަހައްދުގައި ކުރިއަށްދާ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގައި މާދަމާ ހަތެއް ޖަހާއިރު ފަށަން ނިންމާފައިވާއިރު، ފުރަތަމަ އޮތީ މެންސްގެ ރައުންޑް ޓޫ ރިކޮލިފައިންގެ ހަތަރު ވަނަ ހީޓެވެ. އޭގެ ފަހުން ޖޫނިއާ މެންސްގެ ހީޓްތަކާއި މެންސް އޯޕަންގެ އިތުރު ހީޓްތަކާ އެކު ފޯރިގަދަ އަދި ވާދަވެރި ހީޓްތަކެއް އެކި ޑިވިޝަންތަކުން ފެނިގެންދާނެ އެވެ.
