ގދ. ތިނަދޫގައި 1962 ވަަނަ އަހަރު ހިނގައިދިޔަ ހަމަނުޖެހުންތަކަށްފަހު އެރަށް ފަޅުކޮށްލި މައްސަލައިގެ އަޑުއެހުންތައް އިންތިގާލީ އިންސާފުގެ އޮފީހުން ފެށީ އިއްޔެ އެވެ.
ތިނަދޫއިން މީހުން ބޭލި ހާދިސާގައި ނިޒާމީ ސިފައެއްގައި ރާވައިގެން ދައުލަތުގެ އިދާރާއަކުން ނުވަތަ ދައުލަތުގެ އިދާރާއެއްގެ އިސް ހިންގުންތެރިއަކު ހިންގި އަމަލެއްގެ ސަބަބުން ރައްޔިތުންގެ ހައްގުތައް ނިގުޅައިގަނެވުނު ކަމަށް ބުނެ އެ މައްސަލަ ހުށަހަޅާފައިވަނީ އެ ރަށު ކައުންސިލުންނެވެ.
އެ މައްސަލައިގެ އަޑުއެހުންތައް ތިނަދޫގައި ހުންނަ ގައުމީ ޔުނިވާސިޓީގެ ކެމްޕަސްގައި ފެށީ އިއްޔެ އެވެ. އަދި މި މަހުގެ 22 އާ ހަމަޔަށް އަޑުއެހުންތައް ކުރިއަށް ދާނެ އެވެ. އޭގެ އިތުރުން، މި މަހުގެ 27 ގައި މާލޭގައި ވެސް މި މައްސަލައިގެ އަޑުއެހުމެއް އޮންނާނެ އެވެ.
އިއްޔެގެ އަޑުއެހުންތައް ދައުލަތުގެ މީޑިއާ މެދުވެރިކޮށް ލައިވް ކުރި އެވެ. އާންމުކޮށް ހުޅުވާލައިގެންނާއި އާންމުކޮށް ހުޅުވާނުލައި ވެސް މި މައްސަލައިގެ އަޑުއެހުންތަކެއް ބާއްވާނެ އެވެ.
މިއީ އެ ހާދިސާގައި ހިނގައިދިޔަ އިންސާނީ ހައްގުތަކާއި އަސާސީ މިނިވަންކަމާ ހިލާފު އަމަލުތަކުގެ ސަބަބުން އަނިޔާ ލިބިފައިވާ ފަރާތްތަކުގެ ވާހަކަތައް އާންމުކޮށް ހިއްސާކުރުމުގެ ފުރުސަތު ފަހިކޮށްދިނުމުގެ ގޮތުންނާއި، އެ މައްސަލައާ ގުޅޭ އިތުރު މައުލޫމާތު ހޯދުމުގެ ގޮތުން ބާއްވާ އަޑުއެހުންތަކެކެވެ.
ތިނަދޫ ކައުންސިލުން އެދުނު ކަންކަން
އެ މައްސަލައިގައި އިންތިގާލީ އިންސާފުގެ އޮފީހަށް ތިނަދޫ ކައުންސިލުން ހުށަހެޅި މައްސަލައިގައި ވަނީ ހަ ކަމަކަށް އެދިފަ އެވެ.
އެއީ:
- ތިނަދޫއިން މީހުން ބޭލި މައްސަލަ ތަހުގީގު ކޮށްދިނުމަށް؛
- ތިނަދޫ ރައްޔިތުންގެ ކިބައިން ދިވެހި ދައުލަތުން މައާފަށް އެދުމަށް؛
- ރައްޔިތުންގެ ކިބައިން ނިގުޅައިގަނެވިފައިވާ އިންސާނީ އެންމެހައި ހައްގުތައް ހޯދައިދިނުމަށް؛
- ތިނަދޫއިން ގެއްލިފައިވާ މުއްސަދިކަން އާރޯކުރުމަށް 100 އަހަރުގެ ތަރައްގީގެ ޕްލޭނެއް އެކުލަވާލުމަށް
- ތިނަދޫ ރައްޔިތުންނަށް އެކަމުގެ ބަދަލު ހޯދައި ދިނުމާއި އަދި އެ "ގަތުލުއާންމު" ގައި ބައިވެރިވި ފަރާތްތަކުގެ މުދަލާއި ބިންތަކުގެ 50 އިންސައްތަ ފައިދާ ދާއިމީ ގޮތެއްގައި ތިނަދޫ ރައްޔިތުންނަށް ލިބިދިނުމަށް،
- މާލޭގައި ބިނާކޮށްފައިހުރި ވެލާނާގޭގެ ނަން "ގދ. ތެނަދޫ ވެލާނާގެ" ނަމަށް ބަދަލުކޮށްދެއްވުން.
އެ މައްސަލައިގައި 1962 ވަނަ އަހަރު އޭރުގެ ބޮޑު ވަޒީރު އިބްރާހިމް ނާސިރު ސިފައިންނާއެކު، މިނިވަންކަން އިއުލާންކުރި އަތޮޅުތަކުގެ މައި ރަށްކަމުގައިވާ ތިނަދުއަށް ވަޑައިގެންނެވިކަމަށް ތާރީހީ ލިޔުންތަކުގައިވެ އެވެ.
އޭގެ ފަހުން އެ ރަށުގައި ހަމަނުޖެހުންތަކެއް ހިނގައި ނާސިރު ވަނީ ތިނަދޫ އިން މީހުން ބާލުވާފަ އެވެ. އެ މައްސަލައިގައި ތިނަދޫގެ އާންމުންގެ ތެރެއިން ބައެއް މީހުން މަރުވެ، ލާއިންސާނީ އަމަލުތަކެއް ހިންގާފައިވާ ކަމަށް ބައެއް ފަރާތްތަކުން ބުނެ އެވެ. އެހެންނަމަވެސް، އެ ހާދިސާއާ ގުޅޭ ރަސްމީ ތަހުގީގެއް މީގެ ކުރިން އެއްވެސް ސަރުކާރަކުން ހިންގާފައެއް ނުވެ އެވެ.
ބައެއް މުހިންމު ހަބަރުތައް
- މާލެ ސަރަހައްދުގެ ލޭންޑް ޔޫސް ޕްލޭން ފާސްނުކޮށް ވިލިމާލެއިން އެއްވެސް ބޭނުމަކަށް ބިން ދޫނުކުރަން ޕްލޭނިން މިނިސްޓްރީން މާލެ ސިޓީ ކައުންސިލަށް އެންގިކަން ރިޕޯޓްކުރީ އިއްޔެ އެވެ.
- ގާނޫނާ ހިލާފަށް ވިލިމާލެ ހޭޅިފަށުން ގަސްކެނޑި މައްސަލަ ބެލުމަށްފަހު، މާލެ ސިޓީ ކައުންސިލަށް ފިޔަވަޅު އަޅާނެ ކަމުގެ އިންޒާރު އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން ދިނީ އިއްޔެ އެވެ.
- އިންޑިއާއާއެކު ވެފައިވާ ދިފާއީ އެއްބަސްވުންތަކާ ގުޅިގެން ކުރީގެ ރައީސް އަބްދުﷲ ޔާމީން ދައްކަވަނީ ހަގީގަތާހިލާފު ވާހަކަތަކެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމުން ޔާމީން ހޫނު ރައްދެއް ދެއްވީ އިއްޔެ އެވެ.
ދުވަހުގެ ކޯޓޭޝަން
އިއްޔެ ނައިފަރުގައި ބޭއްވި އިދިކޮޅުގެ އިންޑިއާ އައުޓް ހަރަކާތުގައި ސަރުކާރުން ގާއިމުކޮށްފައިވާ އެއްބަސްވުންތަކާ ގުޅިގެން ކުރީގެ ރައީސް އަބްދުﷲ ޔާމީން ވިދާޅުވީ:
"އެގްރީމަންޓުގައި ފޮރުވިފައި ހުރި ކަންތައްތަކެއް އެބަވޭ. އެ ފޮރުވިފައި ހުރި ކަންކަން މިއުޅެނީ އެންމެނަށް ނުފޮރުވިގެން. އެ އެނގޭ މީހުންނަށް އެބަ އިނގޭ. އެ އެނގޭ މީހުންގެ ތެރޭގައި އަޅުގަނޑި މިއީ އެކެއް."
ދުވަހުގެ ފޮޓޯ
އިއްޔެ ގދ. ތިނަދޫ އިން މީހުން ބޭލި މައްސަލައިގައި އިންތިގާލީ އިންސާފުގެ އޮފީހުން ކުރިއަށް ގެންދިޔަ އަޑުއެހުންތަކުގައި އެ ރަށުގެ މީހަކު ބަޔާން ދެނީ. މި އަޑުއެހުންތަކުގައި އަންނަނީ އެ ހާދިސާގައި އެ މީހުން ކުރި ތަޖުރިބާތައް ހިއްސާކުރަމުން -- ފޮޓޯ: އަބްދުﷲ އިޔާން/އަދަދު
ދިރާސާތަކުން ކިޔާލުމަށް
"މޯލްޑިވްސް ހިއުމަން ޑެވެލޮޕްމަންޓް ރިޕޯޓް 2014"
މިރީ އިގްތިސާދީ ގޮތުންނާއި އިންސާނީ ހައްގުތަކުގެ ރޮނގުން ރާއްޖެއިން ހޯދި ކުރިއެރުންތަކާއެކު ރާއްޖޭގައި އެކި ފަންތީގެ މީހުންގެ މެދުގައި އޮތް ތަފާތުތައް ދެނެގަތުމަށް އެކުލަވާލާފައިވާ ރިޕޯޓެކެވެ. އަދި، ފެންނަ ހުރި ހަގީގަތްތަކުގެ މައްޗަށް ބިނާކޮށް ކަންކަމުގައި ގޮތް ނިމުމަށް މި ރިޕޯޓުގައި ވަނީ ފާހަގަކޮށްފަ އެވެ.
