މަޖުުބޫރު ކަމެއްގެ ގޮތުގައި އޮތް މާސްކް އެޅުން ނިމުމަކަށް ގެނެސް އެއީ އިހުތިޔާރީ ކަމަކަށް ހެދި ނަމަވެސް, ވިޔަފާރިތަކާއި އަމިއްލަ މީހުން ބޭނުންނަމަ އެއީ މަޖުބޫރު ކަމަކަށް ހެދޭނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭން) ބުނެފި އެވެ.
ކޮވިޑުގެ ބަލިމަޑުކަމުން ރައްކާތެރިވުމަށް އަޅާ ފިޔަވަޅެއްގެ ގޮތުން ރާއްޖޭގައި މީހުން ދިރިއުޅޭ ހުރިހާ ރަށެއްގައި އަދި އެއާޕޯޓް ހިންގާ ހުރިހާ ރަށެއްގައި ވެސް މީހުން ބޭރުގައި އުޅެންޖެހޭނީ މާސް އަޅައިގެން ކަމަށް އެޗްޕީއޭއިން އަންގާފައިވަނީ ޑިސެންބަރު 2، 2020ގަ އެވެ.
މީގެ ދެ އަހަރާއި ދެ ދުވަސް ކުރިން އިއުލާންކުރި އާއްމު ސިއްހަތުގެ ކުއްލި ނުރައްކަލުގެ ހާލަތު ރޭ އުވާލައްވާ، މާސްކް އެޅުން އިހްތިޔާރީ ކަމަކަށް ހަދައި، އެ ނޫންވެސް ބޮޑެތި ލުއިތަކެއް ދީފައި ވަނީ ރޭ ރައީސް އިބްރާހިމް މުހައްމަދު ސޯލިހެވެ.
މާސްކް އެޅުން މަޖުބޫރު ނޫން ނަމަވެސް ބައެއް އަމިއްލަ ވިޔަފާރިތަކާއި އޮފީސްތައް އަދި ސަރުކާރުގެ ބައެއް ބޮޑެތި ކުންފުނިތަކުން ހިދުމަތް ހޯދުމުގައި މާސްކް އެޅުމަށް މަޖުބޫރު ކުރަމުންދާ ކަމަށް ބުނެ ބައެއް އާންމުންގެ ޝަކުވާ ވަނީ ބޮޑުވެފަ އެވެ.
އެކަމާ ގުޅިގެން ކުރި ސުވާލަކަށް ޖަވާބު ދެއްވަމުން ކޮމިޝަނާ އޮފް ކޮލިޓީ އެޝުއެރެންސް ތަސްލީމާ އުސްމާން "އަދަދު" އަށް ވިދާޅުވީ ކުންފުނިތަކަށާއި ވިޔަފާރިތަކުން ބޭނުންނަމަ މާސްކް އަޅަން މަޖުބޫރު ކުރެވޭނެ ކަމަށެވެ.
"ބައެއް މީހުން ބުނާނެ ހަމަ ގެއަށް ވަންނައިރު ވެސް މާސްކް އަޅައިގެން ވަންނާށޭ. އެއީ ހަމަ އެކަހަލަ ކަމެއް. އެމީހުންގެ ބެލުމުގެ ދަށުން ހިނގާ ތަންތަނަަށް ވަންނައިރު އެ މީހުން ގެންގުޅޭ ގަވައިދުތަކަށް ބޯލެނބުމަކީ،" ތަސްލީމާ ވިދާޅުވި އެވެ.
އޭނާ އިތުރަށް ވިދާޅުވީ އެފަދަ ކަންކަން އެގޮތަށް ކުރި ނަމަވެސް އެެއްވެސް ފިޔަވަޅެއް ނާޅާނެ ކަމަށެވެ.
"ސަބަބަކީ އެމީހުން އެ މަސައްކަތް ކުރަނީ އެމީހުންނާއި އެހެން މީހުންގެ ރައްކާތެރި ކަމަށް. މިސާލަކަށް ބަހުގަ އެހާ ގިނަ މީހުން ކޮންމެ ދުވަހަކު ދަތުރުކުރާއިރު އެ ތަނުގެ މުވައްޒަފުން މަސައްކަތް ކުރާތީ އެމީހުންގެ ރައްކާތެރި ކަމަށް ބަލައިގެން. ސްޓާފުން ބަލިވެ ކަމެއް ވެއްޖާ އޭގެ ޒިންމާ ނަގާނީ ހަމަ ކުންފުނިން،" އޭނާ ވިދާޅުވި އެވެ.
މާސްކް އެޅުން އުވާލި ނަމަވެސް, ކޮވިޑް ފެތުރޭ ރަށްރަށުގައި އަދިވެސް އުޅެވޭނީ މާސްކު އަޅައިގެންނެވެ. އަދި މާސްކަކީ ކޮވިޑުން ރައްކާތެރިކޮށްދޭނެ ވަސީލަތަކަށްވާތީ އަދިވެސް މާސްކު އަޅައިގެން އުޅުމަށް އެޗްޕީއޭން ވަނީ އިލްތިމާސް ކޮށްފަ އެވެ.
ރޭ ދިން އިތުރު ލުއިތަކުގެ ތެރޭގައި ބޭރު ގައުމުތަކުން ރާއްޖެއަށް އެތެރެވާ މީހުންނަށް މީގެ ފަހުން ޕީސީއާރް ޓެސްޓު ހަދަން ނުޖެހުމާއި ރާއްޖޭގެ އެތެރޭގައި ދަތުރު ކުރާއިރު ވެސް ޕީސީއާރް ޓެސްޓު ބޭނުންނުވާނެ ކަމަށް ވެސް އިއުލާން ކުރި އެވެ.
އޭގެ އިތުރުުން، ވެކްސިން ފުރިހަމަނުކޮށް ރާއްޖެއިން ބޭރުން އަންނަ މީހުން ވެސް އަދި ރާއްޖޭގެ އެއް ރަށުން އަނެއް ރަށަށް ދާ މީހުން ވެސް ކަރަންޓީނު ވާކަށް ނުޖެހެ އެވެ. ނަމަވެސް ކޮވިޑަށް ޕޮޒިޓިވްވާ މީހުން އަދިވެސް އައިސޮލޭޓްވާން ޖެހެ އެވެ. އަދި ބަލި ޖެހިފައިވާ މީހުންގެ ކޮންޓެކްޓުން ވެސް ކަރަންޓީނުވާން ޖެހޭނެ ކަމަށް އެޗްޕީއޭން ވަނީ ބުނެފަ އެވެ.
