"ނޫސްވެރިންނަށް ވާނީ ކިހިނެއް؟ އަހަރުންނަށް ވެސް ދެން އިންޑިއާއަށް ފާޑުކިޔޭނެތަ؟"
މިއީ އިންޑިއާ ސިފައިން ރާއްޖެއިން ފޮނުވާލުމަށް ގޮވާލާ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުން ކުރިއަށްގެންދާ ކެމްޕެއިނާއި ސިޔާސީ ހަރަކާތްތައް ހުއްޓުވުމަށް ރައްޔިތުންގެ މަޖިލީހުގެ ސުޕާ މެޖޯރިޓީ އޮތް އެމްޑީޕީން ޑްރާފްޓްކޮށް، ހުށަހަޅަން ތައްޔާރުވަމުން އަންނަ ބިލާ މެދު އެކުގައި މަސައްކަތް ކުރާ ނޫސްވެރިޔަކު ކުރި ސުވާލެވެ.
އަންނަ ހަފްތާގައި އާ ދައުރަކަށް މަޖިލިސް ހުޅުވޭއިރު، މަޖިލީހަށް ހުށަހަޅަން އެމްޑީޕީން ފަރިވަމުން އަންނަނީ "ދިވެހިރާއްޖެއިން ބޭރުގެ ގައުމުތަކާއެކު ގާއިމްކޮށްފައިވާ ހާރިޖީ ގުޅުންތަކަށް ނޭދެވޭ އަސަރު ކުރާނެ ފަދަ އަމަލުތައް ހުއްޓުވުމުގެ ބިލު" އެވެ.
ރަނގަޅު ވާހަކައެކެވެ. އެންމެ ފަސް ސަފުހާގެ އެ ބިލުގައި އިދިކޮޅުގެ "އިންޑިއާ އައުޓް" ގެ ވާހަކައެއް ސީދާ ނެތެވެ. އެކަމަކު ކުއްލިއަކަށް ޑްރާފްޓް ކުރި އެ ބިލުގެ މަގުސަދު ވަރަށް ސާފެވެ.
އެ ބިލުގައިވާ ގޮތުން، ރާއްޖެއިން އެހެން ގައުމަކާއެކު އެއްބަސްވެފައިވާ އެއްބަސްވުމަކާ ދެކޮޅަށް، ނުވަތަ އެއްބަސްވެފައިވާ އުސޫލަކާ ހިތްހަމަނުޖެހިން، އެ ގައުމަކާ ދެކޮޅަށް "މުޒާހަރާ ކުރުމާއި ކެމްޕެއިން ކުރުމާއި ސިޔާސީ ނުވަތަ އެ ނޫން ވެސް ހަރަކާތެއް" ހިންގުން މަނާވާނެ ކަމަށެވެ.
އޭގެ އިތުރުން ދިވެހިން ތިބީ އެހެން ގައުމެއްގެ ނުވަތަ މިލިޓަރީއެއްގެ އަޅުވެތިކަމުގެ ދަށުގައި ކަމަށް ބުނެ މުޒާހަރާ ކުރުމާއި ސިޔާސީ ހަރަކާތްތައް ހިންގުން މަނާވާނެ ކަމަށް ވެސް އެ ބިލުގައި ބުނެފައިވެ އެވެ.
އެ ބިލުގައި ބުނާ ކުށްތައް ކުރާ މީހުން ޖަލަށް ވެސް ލެވިދާނެ ކަމަށް އެ ބިލުގައި ބުނެފައިވެ އެވެ. ނަމަވެސް ޖަލަށްލެވޭނީ ހަ މަހަށްވުރެ ދިގު ނޫން މުއްދަތަކަށް ކަމަށް ބިލުގައި ބުނެފައިވެ އެވެ. ޖަލު އަދަބުގެ އިތުރުން ކުށްވެރިވާ މީހަކު 20،000ރ. އިން ޖޫރިމަނާ ކުރެވިދާނެ ކަމަށް ވެސް ބިލުގައި ބުނެފައިވެ އެވެ.
ހަނިކުރަނީ އަސާސީ ހައްގުތަކެއް
އެ ބިލުގެ ވާހަކަ މީޑިއާތަކުން ރިޕޯޓުކުރުމާއެކު ގިނަ ބަޔެއްގެ ކަންބޮޑުވުންތައް ވަނީ ބަންޑުންވެފަ އެވެ. އޭގެ ތެރޭގައި އެމްޑީޕީގެ ސަޕޯޓަރުން ވެސް ހިމެނެ އެވެ. ހައްގުތައް ހޯދައިދިނުމަށް އަބަދުވެސް ވަކާލާތުކުރާ ޕާޓީއަކުން އެފަދަ ބިލެއް ޑްރާފްޓް ކުރުމުން ވެރިވެގެން އުޅޭ ހައިރާންކަމެވެ.
އެ ބިލުގެ ނިޔަތް އިދިކޮޅުގެ ސިޔާސީ ހަރަކާތް ހުއްޓުވުމާ ގުޅިފައިއޮތް ނަމަވެސް، އޭގެ ވަށައިގެން ގާނޫނުއަސާސީން ލިބިދީފައިވާ ހައްގުތަކެއް ގުރުބާންވާކަމީ ފެންނާންއޮތް ހަގީގަތެވެ.
titledesc
އެމްޑީޕީން އެ ބިލު ފަރުމާކޮށްފައިވާގޮތުން، އެންމެ ބޮޑަށް ހަނިވެގެންދާނީ ގާނޫނުއަސާސީގެ 27 ވަނަ މާއްދާގައި ބަޔާންކޮށްފައިވާ ހިޔާލުފާޅުކުރުމުގެ މިނިވަންކަމެވެ. ދެން އެއާ ވިދިގެން އަންނަ ނޫސްވެރިކަމުގެ މިނިވަންކަމާއި އެއްވެއުޅުމުގެ މިނިވަންކަމެވެ.
އިދިކޮޅުގައި އެމްޑީޕީ އޮތްއިރު އެންމެ ހަރުއަޑުން ދިފާއުކުރި ހައްގުތަކެވެ.
އެކަމަކު އެ ބިލު އިބާރާތްކޮށްފައިވާ ގޮތުން، ބޭރު ގައުމަކުން ނަގާ ލޯނުތަކުގެ ވާހަކަ ދައްކައިގެން ވެސް ކުށްވެރިވެދާނެ އެވެ.
ޗައިނާ ދަރަނީގެ ވާހަކަވެސް ނުދެއްކޭނެ؟
އެއާއެކު އިތުރު ސުވާލުތަކެއް ވެސް ފެންމަތިވެ އެވެ. ކުރީގެ ސަރުކާރުން ޗައިނާއިން ނަގާފައިވާ ބޮޑެތި ލޯނުތަކަކީ ދަރަނީގެ ދަންތުރައެއްކަމަށް ތަކުރާރުކޮށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވާ ވިދާޅުވުމެވެ.
މި ބިލު ގާނޫނަކަށް ވެއްޖެނަމަ، އެ މަނިކުފާނަށް ދެން އެފަދަ ކަންބޮޑުވުމެއް ފާޅުކުރެއްވިދާނެކަމާމެދު އުފެދޭ ސުވާލެވެ.
ނޫނީ އިޒްރޭލާ ދެކޮޅަށް ފަލަސްތީނުގެ މިނިވަންކަމާ ދެކޮޅަށް ޒަމާނުއްސުރެ ދިވެހިން އަޑުއުފުލަމުން އަންނަ އަޑު ކެނޑިގެންދާނެތޯ ވެސް އެއީ ކުރަންޖެހޭ ސުވާލެކެވެ.
ގާނޫނީ ފުސްކަމެއްގެ ތެރެއިން ލިބޭ ބާރު
ބޭނުންވެއްޖެ ކޮންމެ ކަމަކާ ބެހޭގޮތުން، އިސްލާމްދީނުގެ އަސްލަކާ ހިލާފުނުވާގޮތަށް ގާނޫނު ހެދުމާއި ބަދަލުކުރުމުގެ އިތުރުން ބާތިލުކުރުމުގެ ބާރު ގާނޫނުއަސާސީން މަޖިލީހަށް ވަނީ ލިއްބައިދީފަ އެވެ.
އޭގެ ތެރޭގައި ގާނޫނުއަސާސީން ކަށަވަރުކޮށްދީފައިވާ ހައްގެއް ނޫނީ މިނިވަންކަމެއް ހިފެހެއްޓުމުގެ ބާރު ވެސް ހިމެނެ އެވެ.
އެކަން ކުރެވޭނެ މިންގަނޑުތަކަކާއި ޝަރުތުތަކެއް ގާނޫނުއަސާސީގައި ބަޔާންކޮށްފައިވީ ނަމަވެސް، ސިޔާސީ މީހުންގެ ބޭނުމަށް އެ މާއްދާ ލަންބާލުމަކީ މީގެ ކުރިން ވެސް ފެނިފައިހުރި މަންޒަރެކެވެ.
އެގޮތުން، ކުރީގެ ސަރުކާރުން މާލޭގެ ވަކި ސަރަހައްދަކަށް އެއްވެއުޅުމުގެ މިނިވަންކަން ފައްތައިލީ އެއްވެއުޅުމުގެ ގާނޫނު އިސްލާހުކޮށްގެންނެވެ.
އޭރު އިދިކޮޅުގައި އޮތް އެމްޑީޕީން އެކަމާ ޝަކުވާކުރި ނަމަވެސް، އެމްޑީޕީ ވެރިކަމަށް އައިސް އެ މާއްދާ އުވާލަން ފަހަތުފަޔަށް ބުރަވީ އެވެ. އެއާއެކު އެއްވެއުޅުމުގެ މިނިވަންކަން އޮތީ ގާނޫނީ "ގްރޭ އޭރިއާ"އެއްގެ ތެރޭގައި ހިފެހެއްޓިފަ އެވެ.
އެއީ މި ބިލާއެކު އުފަންވެގެން އުޅޭ ބިރާއި ނުތަނަވަސްކަމެވެ. މި ބިލު ގާނޫނަކަށް ހަދައިފިނަމަ، އޭގެ ނިވަލުގައި އެތައް އަސާސީ ހައްގުތަކެއް ޖިނާއީ ކުށަކަށް ވެގެން ދާނެތީ އެވެ. ސަރުކާރެއްގެ ހާރިޖީ ސިޔާސަތަށް ފާޑުކިޔުން ހުއްޓުވުމަކީ ޑިމޮކްރަސީ އާ ބީރައްޓެހި އަމަލެކެވެ. އަދި ވަކިން ހާއްސަކޮށް ސަރުކާރު ޖަވާބުދާރީ ކުރުވުމުގައި ފަހަތަށް އެޅޭ ބިޔަ ފިޔަވަޅެކެވެ.
