ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) ގެ ދަށުން ހިންގާ ގައުމީ ޝިޕިން ލައިން، މޯލްޑިވްސް ސްޓޭޓް ޝިޕިން (އެމްއެސްއެސް) އިން މެރިޓައިމް ދާއިރާއިން ކިޔެވުމަށް ސްކޮލާޝިޕް ތަކަށް ހުޅުވާލައިފި އެވެ.
އެމްއެސްއެސްއިން ސްކޮލާޝިޕް ތަކަށް ހުޅުވާލާފައި ވަނީ ނެވިގޭޝަން އޮފިސާ ކެޑޭޓް ޓްރެއިނިން ކޯހާއި، އިންޖިނިއާ އޮފިސާ ކެޑޭޓް ޓްރެއިނިން ކޯހުގެ އިތުރުން ރީފާ ޓެކްނިޝަން ކޯހެވެ.
ނެވިގޭޝަން އޮފިސާ ކެޑޭޓް ޓްރެއިނިން ކޯހާއި، އިންޖިނިއާ އޮފިސާ ކެޑޭޓް ޓްރެއިނިންް ކޯސް ފުރިހަމަ ކުރުމަށް ތިން އަހަރު ދުވަސް ހޭދަވާނެ އެވެ. ރީފާ ޓެކްނިޝަން ކޯހަކީ އެއް އަހަރު ދުވަހުގެ ކޯހެކެވެ.
އެ ސްކޮލާޝިޕްތަކުގައި ރާއްޖޭގެ މުއައްސަސާތަކުން ގަބޫލު ކުރާ ބޭރު ގައުމެއްގެ ޔުނިވާސިޓީއެއްގައި ކިޔެވުމުގެ ފުރުސަތު ލިބޭނެ އެވެ.
އެމްއެސްއެސްއިން ބުނީ އެ ސްކޮލާޝިޕްގައި ކިޔަވައި ނިމިގެން އައިސް، 50،000ރ. އަށް ވުރެ ބޮޑު މުސާރައެއްގައި އެމްއެސްއެސްގައި މަސައްކަތް ކުރުމުގެ ފުރުސަތު ލިބިގެންދާނެ ކަމަށެވެ.
އެ ސްކޮލާޝިޕްތަކުގެ ފުރުސަތު ހުޅުވާލާފައިވަނީ އަންނަ މަހުގެ 27 ވަނަ ދުވަހުގެ ނިޔަލަށެވެ.
ރާއްޖޭގެ ޝިޕިންގް ދާއިރާ ހަރުދަނާ ކުރުމަށް އެމްއެސްއެސް އުފައްދާ ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ދާދި ފަހުން އެ ކުންފުނިން ވަނީ އަމިއްލަ ބޯޓެއް ވެސް ގެނެސްފަ އެވެ. އަދި އިތުރު ބޯޓެއް ގަތުމަށްވެސް ވަނީ ނިންމާފަ އެވެ.
