ކޮމަންޑޫ ދާއިރާގެ ބައި އިލެކްޝަން ކާމިޔާބުކުރަން ބުރަކޮށް މަސައްކަތް ކުރަނީ ރާއްޖެއަށް ގެއްލުން ދެނިވި ފިކުރެއްގެ ބޭފުޅަކު މަޖިލީހަށް ވެދެވަޑައިގެންފި ނަމަ ދަތިވާނެތީ ކަމަށް ވެރިކަން ހިންގާ އެމްޑީޕީގެ ޗެެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ރޭ ވިދާޅުއްޖެ އެވެ.
އެމްޑީޕީން ފޯކައިދޫގައި ރޭ ބޭއްވި ޖަލްސާގައި ހަސަން ލަތީފު ވިދާޅުވީ އެޕާޓީގެ 64 މެމްބަރުން މަޖިލީހުގައި މިހާރުވެސް ތިއްބެވި އިރު، ކޮމަންޑޫ ދާއިރާގެ ގޮނޑިއަށް އެހާ މަސައްކަތްކުރަނީ ކީއްވެތޯ މީހުން ސުވާލުކުރާ ކަމަށެވެ. އެ ދާއިރާގެ ގޮނޑި ހޯދަން އުޅެނީ އެގޮނޑި ނުލިބިއްޖެ ނަމަ، ކުރަން ހުރި މަސައްކަތް ނުކުރެވޭނެތީ ނޫން ކަމަށް ވިދާޅުވެ، އެ ސުވާލަށް ޖަވާބު ދެއްވަމުން ގެންދަވާ ކަމަށް ވެސް އޭނާ ވިދާޅުވި އެވެ.
"އެހެން ނަމަވެސް އަޅުގަނޑުމެންނަށް ވަރަށް ދަތިވާނެ، މިދެންނެވި ފިކުރު، އެއީ މުޅި ރާއްޖެއަށް ގެއްލުންކުރަނިވި ފިކުރެއް މަޖިލީހުގެ ތެރެއަށް [ވަދެއްޖެއްޔާ]. ހަމަ އެންމެ ބޭފުޅެއް ވެސް، މިހާރު އެބަ ތިއްބެ ހައެއްކަ ބޭފުޅުން. އޭގެ ތެރެއަށް ހަމަ އެހެން އެންމެ ބޭފުޅަކު ވަނަސް ވެސް އަޅުގަނޑުމެނަށް ދަތިވޭ،" ހަސަން ވިދާޅުވި އެވެ.
މެމްބަރު ހުސައިން ވަހީދު އަވަހާރަވުމުން ހުސްވެފައިވާ ކޮމަންޑޫ ދާއިރާއަށް މެމްބަރަކު ހޮވަން ބާއްވާ ބައި-އިލެކްޝަން އޮންނާނީ އަންނަ މަހުގެ ފަހެއްގަ އެވެ. އެ ދާާއިރާއަށް އެމްޑީޕީގެ ފަރާތުން ވާދަކުރައްވާ މުހައްމަދު ރާޝިދު (ރާޑޯ)އަށް ކެމްޕޭން ކުރަން އެޕާޓީން މީގެ ކުރިން ކޮމަންޑޫގައި ވެސް ޖަލްސާއެއް ބޭއްވި އެވެ. ކޮމަންޑޫ ދާއިރާގައި ހިމެނެނީ ކޮމަންޑުއާއި ފޯކައިދުއާއި މަރޮށްޓެވެ.
ހަސަން ލަތީފް ވިދާޅުވީ "ގެއްލުންދެނިވި ފިކުރު"ގެ އެންމެ ބޭފުޅަކު ވެދެވަޑައިގެންނެވި ނަމަވެސް ދަތިވާނެ ސަބަބަކީ ވަރަށް ރަނގަޅު ޕްރޮޖެކްޓެއް ހިންގަން އެމްޑީޕީން ބޭނުންވުމެވެ. އެއީ އޭނާ ވިދާޅުވި ގޮތުގައި އިދާރީ ދާއިރާތައް ލާމަރުކަޒީ އުސޫލުން ހިންގުމަށް ކުރަން ޖެހޭ މަސައްކަތްތައް ކުރުމެވެ.
"އެއީ ކުޑަކަމެއް ނޫން. އެކަމަކީ އަަޅުގަނޑުމެން މުޅި ރާއްޖޭގެ ރައްޔިތުން އެއަށް އެއްބަސްވެގެން ކުރަން ޖެހޭ ކަމެއް،" އޭނާ ވިދާޅުވި އެވެ.
ކޮމަންޑޫ ދާއިރާ ވަކިވެފައި އޮތުމަކީ ބަލައިގަނެވޭނެކަމެއް ނޫން ކަމަށާއި އެ ދާއިރާގައި ދިރިއުޅުން ބައްޓަން ކުރެވޭނެ ގޮތެއް އޮންނަން ޖެހޭނެ ކަމަށް ދެކެވަޑައިގަންނަވާ ކަމަށް ވެސް އޭނާ ހަސަން ވިދާޅުވި އެވެ. އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީނުގެ ސިޔާސަތެއް އެކަމުގައި އޮތްތަނެއް ފެނިވަޑައިނުގަންނަވާ ކަމަށާއި އެމަނިކުފާނު އިސްކޮށް ހުންނަވާ ޕީޕީއެމްގެ ވެސް އެ ސިޔާސަތު ނެތް ކަމަށް އޭނާ ވިދާޅުވި އެވެ.
