އަންނަ ފެބްރުއަރީ ފަހެއްވާ ހޮނިހިރު ދުވަހު ބޭއްވުމަށް ނިންމާފައިވާ ކޮމަންޑޫ ދާއިރާގެ އިންތިހާބުގައި ވާދަކުރާ ތިން ކެންޑިޑޭޓުންގެ ކެންޑިޑޭޓް ނަމްބަރު އިލެކްޝަން ކޮމިޝަނުން ތަރުތީބުކޮށްފި އެވެ.
މިއަދު ތިނެއް ޖެހުމާއި ހަމައަށް މި ދާއިރާއަށް ވާދަކުރުމުގެ ފުރުސަތު ހުޅުވާލިއިރު، ކުރިމަތި ލާފައި ވަނީ ސިޔާސީ ތިން ޕާޓީއެއްގެ ފަރާތުންނެވެ. އެއީ އެމްއެންޕީ، ޕީޕީއެމް އަދި އެމްޑީޕީ އެވެ.
މިރޭ ނުވައެއް ޖަހާއިރަށް ތާވަލްކުރި ގުރުލުން ކުރިއަށް ދިޔައީ އިލެކްޝަން ކޮމިޝަނުގެ ހޯލުގަ އެވެ.
އެއް ނަމްބަރު ކެންޑިޑޭޓަކީ އެމްޑީޕީގެ ޓިކެޓުގައި ވާދަކުރާ ސަރުކާރު ކެންޑިޑޭޓު، މުހައްމަދު ރާޝިދެވެ. ދެވަނަ ނަމްބަރު ލިބުނީ އިދިކޮޅު ޕީޕީއެމްގެ ކެންޑިޑޭޓު، މޫސާ ފަތުހީއަށެވެ. ތިންވަނަ ކެންޑިޑޭޓަކީ މި އަހަރު ތެރޭގައި އުފެއްދި އެމްއެންޕީގެ އަބްދުލް ހަންނާނު އިދުރީސް އެވެ.
ކެންޑިޑޭޓު ނަމަބްރު ތަރުތީބުވެފައި ވަނީ އެ ދާއިރާއަށް ކުރިމަތިލި ޕާޓީތަކުގެ ބޮޑުމިން ތަރުތީބުންނެވެ.
titledesc
އެމްޑީޕީގެ ޓިކެޓުގައި ވާދަކުރައްވާ ރާޝިދުއަކީ 10 އަހަރުވަންދެން ފޯކައިދޫ ކައުންސިލްގެ މެމްބަރު ކަމާއި ރައީސް ކަން ކުރެއްވި ބޭފުޅެކެވެ. އޭނާއަކީ މިހާރު އެ އިދާރާގެ ސެކެޓްރީ ޖެނެރަލް އެވެ.
ޕީޕީއެމްގެ ޓިކެޓުގައި ކޮމަންޑޫ ދާއިރާއަށް ވާދަކުރައްވާ މޫސާ ފަތުހީއަކީ ށ.އަތޮޅު ކައުންސިލްގެ ރައީސްކަން ކުރައްވާފައިވާ ބޭފުޅެކެވެ. އަދި ކުރިން ކޮމަންޑޫ ކުޑަ ކަތީބުކަންވެސް އޭނާ ކުރެއްވި އެވެ. މީގެ އިތުރުން އޭނާއަކީ ކުރީ ސަރުކާރުގައި ހޯމް މިނިސްޓަރުގެ ނައިބުކަންވެސް ކުރެއްވި ވަކީލެކެވެ.
އެމްއެންޕީގެ ފަރާތުން ވާދަކުރާ ހަންނާނަކީ ތައުލީމީ ދާއިރާގައި ގިނަ އަހަރުތަކެއްވަންދެން (1987- 2019އަށް) ހިދުމަތް ކުރައްވާފައިވާ ބޭފުޅެކެވެ. އަދި މިހާރު އެ ބޭފުޅާއަކީ ވިޔަފާރިވެރިއެކެވެ.
ތައުލީމީ ދާއިރާއަށް ބަލައިލާއިރު 2013 ވަނަ އަހަރުން 2019ވަނަ އަހަރާއި ހަމަޔަށް އޭނާވަނީ ވިލާ ކޮލެޖުގެ ޝަރިއްޔާ އެންޑް ލޯ ފެކަލްޓީގެ މެނޭޖަރުގެ މަގާމްވެސް ފުރުއްވާފަ އެވެ. އަދި މީގެ އިތުރުން ހދ.ހަނިމާދޫ ސްކޫލް، ރ.އިނގުރައިދޫ ސްކޫލް، ށ އަތޮޅު ތައުލީމީ ސެންޓަރު، ނ.މާފަރު ސްކޫލް އަދި ރ.ހުޅުދުއްފާރު ސްކޫލްގެ ޕްރިންސިޕަލްކަންވެސް އޭނާވަނީ ކުރައްވާފަ އެވެ.
މި ބައި އިލެކްޝަން ބާއްވަނީ ކޮމަންޑޫ ދާއިރާގެ މެމްބަރުކަން ކުރައްވަމުން ގެންދެވި ހުސެއިން ވަހީދު، 53، ކެންސަރު ބަލީގައި އަވަހާރަވުމުނެވެ. ދުވަހު ކެންސަރަށް ފަރުވާ ކުރެއްވުމަށްފަހު އޭނާ އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް މިމަހުގެ 14 ވަނަ ދުވަހު އެވެ.
