ރައްޔިތުން މަޖިލީހުގެ ކޮމަންޑޫ ދާއިރާގެ މެމްބަރު އަވަހާރަވުމާއި ގުޅިގެން ބާއްވާ ބައި-އިލެކްޝަނަށް ކުރިމަތިލި ތިން ކެންޑިޑޭޓުންގެ ފޯމުތައް މިއަދު އިލެކްޝަންސް ކޮމިޝަނުން ބަލައިގަނެ، ކެންޑިޑޭޓުންގެ ނަން ތަރުތީބު ކުރުން މާދަމާ އޮންނާނެ ކަމަށް އިއުލާންކޮށްފި އެވެ.
އިލެކްޝަންސްގެ ނައިބު ރައީސް އިސްމާއިލް ހަބީބު މި ނޫހާ ވާހަކަދައްކަވަމުން ވިދާޅުވީ މިހާތަނަށް އެ ކޮމިޝަނަށް ލިބިފައި ވަނީ ތިން ކެންޑިޑޭޓުންގެ ފޯމް ކަމަށާއި، އެ ހުރިހާ ކެންޑިޑޭޓުންގެ ކެންޑިޑެންސީ އެ ކޮމިޝަނުން ގަބޫލުކޮށްފައިވާ ކަމަށެވެ.
އެމްޑީޕީގެ ޓިކެޓުގައި ވާދަކުރައްވަނީ ފޯކައިދޫ ކައުންސިލްގެ ސެކްރެޓަރީ ޖެނެރަލް އަދި ކުރިން ކައުންސިލްގެ ރައީސް މުހައްމަދު ރާޝިދެވެ. ދެން ވާދަކުރައްވަނީ އެމްއެންޕީގެ ކެންޑިޑޭޓް އަބްދުލް ހަންނާން އެވެ. އޭނާއަކީ ށ. ފޯކައިދޫ ކައުންސިލްގެ ރައީސް ކަން މިދިޔަ ތިން ދައުރު ކުރެއްވުމަށްފަހު މިހިނގާ ދައުރުގައި ފޯކައިދޫ ކައުންސިލްގެ ސެކްރެޓަރީ ޖެނަރަލް ކުރައްވަމުން އަންނަ ބޭފުޅެކެވެ. ޕީޕީއެމްގެ ޓިކެޓުގައި ކޮމަންޑޫ ދާއިރާއަށް ވާދަކުރައްވާ މޫސާ ފަތުހީއަކީ ށ.އަތޮޅު ކައުންސިލްގެ ރައީސްކަން ކުރައްވާފައިވާ ބޭފުޅެކެވެ. އަދި ކުރިން ކޮމަންޑޫ ކުޑަ ކަތީބުކަންވެސް އޭނާ ކުރެއްވި އެވެ.
ކޮމަންޑޫ ދާއިރާއަށް ކުރިމަތިކުތި ލުމަށް ހުޅުވާލާފައިވާ ސުންގަޑި ހަމަވާނީ މާދަމާ މެންދުރު ފަހު ތިނެއް ޖަހާއިރަށެވެ. ނަމަވެސް މިހާތަނަށް އެ ތިން ކެންޑިޑޭޓުންގެ އިތުރުން އެއްވެސް ފޯމެއް އެ ކޮމިޝަނަށް ލިބިފައި ނުވާ ކަމަށް ހަބީބު ވިދާޅުވި އެވެ. އެ ދާއިރާގެ އިލެކްޝަން ބާއްވަނީ ފެބްރުއަރީ މަހުގެ ފަސް ވަނަ ދުވަހު އެވެ.
އެމްއެންޕީ އަދި ޕީޕީއެމްގެ ލީޑާޝިޕްގެ އިސްވެރިން މިހާރު އެ ރަށަށް ގޮސް ކެމްޕެއިން ފައްޓާފައިވާއިރު، ވަރަށް އަވަހަށް އެމްޑީޕީގެ ލީޑާޝިޕު ންވެސް އެރަށަށް ދާނެ އެވެ.
ކޮމަންޑޫ ދާއިރާގެ ކުރީގެ މެމްބަރު ހުސެއިން ވަހީދު އަވަހާރަވީ ވަރަށް ގިނަ ދުވަހު ކެންސަރުގެ ބައްޔަށް ފަރުވާ ކުރެއްވުމަށްފަހު މި މަހުގެ ކުރީކޮޅެވެ.
