ކޮވެކްސް ފެސިލިޓީން ރާއްޖެއަށް ހަދިޔާކުރި ފައިޒާ ވެކްސިންގެ 100،600 ޑޯޒްގެ ޝިޕްމަންޓެއް މިއަދު ރާއްޖެ ގެނެސްފި އެވެ.
ކޮވިޑް ވެކްސިންގެ ދެ ޑޯޒު ފުރިހަމަކޮށްފައިވާ ފަރާތްތަކުން 180 ދުވަސް ހަމަވުމުން ބައްޔަށް ލިބިފައިވާ ދިފާއު ވަރުގަދަ ކުރުމަށްޓަކައި ބޫސްޓާ ޑޯޒެއް ޖެހުމަށް ދުނިޔޭގެ ސިއްހަތު ޖަމިއްޔާއިން އިލްތިމާސް ކުރެ އެވެ.
ރާއްޖޭގައި ބޫސްޓާ ޑޯޒު މިހާރު ޖަހަނީ އުމުރުން 60 އަހަރުން މަތީގެ މީހުންނާއި އިތުރު ބަލިތަކުގެ ސަބަބުން ނާޒުކު ހާލަތެއްގައި ތިބި މީހުންނަށް އެކަންޏެވެ. ނަމަވެސް ޑިސެމްބަރު 15، އިން ފެށިގެން ތިން ވަނަ ޑޯޒު އާންމުންނަށް ދޭން ފަށާނެ ކަމަށް ކުރިން އޮތީ ބުނެފަ އެވެ.
ނަމަވެސް ވެކްސިންގެ އާ ސްޓޮކެއް ލިބޭނެ ދުވަހެއް އަދި ނޭނގޭތީ، އާއްމުކޮށް ހުޅުވާލައިގެން ބޫސްޓާ ޖެހުމަށް ފަށަން އޮތް ޕްރޮގްރާމް އޮތީ މަޑުޖައްސާލައިފަ އެވެ.
ޔުނިސެފުން މިއަދު ކުރި ޓުވީޓެއްގައި ބުނީ، ފައިޒާ ވެކްސިންގެ އާ ޝިޕްމަންޓެއް މިއަދު ރާއްޖެ ގެނެސްފައިވާ ކަމަށާއި ބޫސްޓާ ޑޯޒް ޖެހުމަށް އެ ވެކްސިން ބޭނުންކުރާނެ ކަމަށެވެ.
އެޗްޕީއޭގެ ތަފާސްހިސާބުތަކުން ހާމަވާ ގޮތުގައި މިހާތަނަށް 22،000 މީހުން ވަނީ ރާއްޖެއިން ބޫސްޓާ ޑޯޒް ފުރިހަމަކޮށްފަ އެވެ. އަދި ރާއްޖޭގައި ވެކްސިންގެ ދެ ޑޯޒް ހަމަކޮށްފައިވާ މީހުންގެ ޖުމްލަ އަދަދުވަނީ 366،100 އަށް ވުރެ މަތިވެފަ އެވެ.
މިހާރު ވެކްސިންގެ ބޫސްޓާ ޑޯޒް ޖަހަމުން އަންނަނީ އުމުރުން 50 އަހަރުން މަތީގެ މީހުންނާއި ދިފާއީ ނިޒާމް ބަލިކަށި މީހުން އަދި ބޮޑެތި ބަލިތަކަށް ފަރުވާ ހޯދަމުން އަންނަ މީހުންނަށް އެކަނި އެވެ.
ކޮވިޑްގެ އެންމެ ނުރައްކާތެރި ވޭރިއެންޓްގެ ގޮތުގައި ސިއްހީ މާހިރުން ސިފަކުރާ އޮމިކްރޯން ވޭރިއެންޓުގެ ފަސް ކޭސް ރާއްޖެއިން ފެނިފައިވާއިރު މިކަމާ ގުޅިގެން އަޅަން ޖެހޭ އިތުރު ފިޔަވަޅުތަކާބެހޭ މަޝްވަރާތައް ކުރަމުންދާ ކަމަށް އެޗްޕީއޭއިން ވަނީ ބުނެފަ އެވެ.
އޮމިކްރޯން ވޭރިއެންޓަކީ ހަލުވިކަމާއެކު ފެތުރެ ވޭރިއެންޓެއް ކަމަށާއި ވެކްސިންގެ ދެ ޑޯޒްއަށްވެސް އިމިއުން ވޭރިއެންޓެއް ކަމަށް އެޗްޕީއޭއިން ހާމަކުރި އެވެ. ނަމަވެސް ތިންވަނަ ޑޯޒް، ނުވަތަ ބޫސްޓާ ޑޯޒް ޖެހުމުން މި ވޭރިއެންޓުގެ ނުރައްކާތެރިކަން ކުޑަވާކަންވެސް އެޗްޕީއޭއިން ބުނެ އެވެ.
އެހެންކަމުން ކުރިއަށް އޮތް ސްކޫލްތަކުގެ ޗުއްޓީ ދުވަސްތަކުގައި ދަތުރުފަތުރު ކުރުމުގަޔާއި މީހުން އެއްވެ އުޅޭ ސަރަހައްދުތަކަށް ދިޔުމުގައި ކޮވިޑްއާ ގުޅިގެން އަޅާފައިވާ ފިޔަވަޅުތަކަށް އިތުރަށް ސަމާލުވުމަށް އެޗްޕީއޭއިންވަނީ އިލްތިމާސް ކުރެ އެވެ.
