ކޮވިޑުން ދިފާއުވުމަށް ޖަހާ، ކޮވިޑް ވެކްސިން ފުރިހަމަކޮށްފައިވާ ނަމަ، ދެކުނު އޭޝިއާގެ ގައުމުތަކުން ވޯކް ވިސާގައި އަންނަ މީހުން ކަރަންޓީނުވާން ނުޖެހޭ ގޮތަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އުސޫލު ބަދަލުކޮށްފި އެވެ.
ދެކުނު އޭޝިއާ ގައުމުތަކުން ރާއްޖެ އައުން ސަރުކާރުން މީގެ ކުރިން ވަނީ މަނާ ކޮށްފަ އެވެ. އޭރު މަނާކުރީ އެ ގައުމުތަކުގައި ކޮވިޑްގެ ހާލަތު އެ ދުވަސްވަރު ގޯސްވުމާ ގުޅިގެންނެވެ.
އެޗްޕީއޭއިން މިރޭ ކުރި އިއުލާނެއްގައި ބުނީ ދެކުނު އޭޝިއާ ގައުމުތަކުން ވާކްޕާމިޓް ހޯލްޑަރުން ރާއްޖެ އެތެރެވުމަށްފަހު އެޗްޕީއޭއިން ކަނޑައަޅާ ފެސިލިޓީއެއްގައި ކަރަންޓީނުވުމަށް ކަނޑައަޅާފައިވާ ކަނޑައެޅުން އުވާލާފައިވާ ކަމަށެވެ.
ނަމަވެސް، ކޮވިޑް ވެކްސިން ފުރިހަމަ ނުވާ ރާއްޖެއަށް އެތެރެވާ ވާކްޕާމިޓް ހޯލްޑަރުން ރާއްޖެ އެތެރެވުމަށް ފަހު އެ މީހަކު ރާއްޖެއަށް ގެންނަ ފަރާތުން ކަނޑައަޅާ ތަނެއްގައި ކަރަންޓީނުވާން ޖެހޭނެ ކަމަށެވެ.
ކަރަންޓީނުން ދޫކޮށްލެވޭނީ 14 ދުވަސް ހަމަވުމުން ކޮވިޑަށް ޓެސްޓްކޮށް އެ ޓެސްޓްގެ ނަތީޖާ ނެގެޓިވްވުމުންނެވެ. މިގޮތަށް ރާއްޖެ އަންނަ ފަރާތްތަކުން ރާއްޖެ އައުމުގެ އެއް ދުވަސްކުރިން ކަރަންޓީނުވާ ތަނުގެ މައުލޫމާތު އެޗްޕީއޭއަށް އަންގަން ޖެހެ އެވެ.
ދެކުނު އޭޝިއާއިން އަންނަ ވާކްޕާމިޓް ހޯލަޑަރުންނަށް އުސޫލަށް ލުޔެއް ދީފައިމިވަނީ ކޮވިޑްގެ އާ ވޭރިއެންޓެއް ފެތުރެން ފަށާފައިވަނިކޮށެވެ.
އެގޮތުން، ކޮވިޑުގެ އެންމެ ނުރައްކާތެރި ވޭރިއެންޓުގެ ގޮތުގައި ސިއްހީ މާހިރުން ސިފަކުރާ އޮމިކްރޯން ވޭރިއަންޓުގެެ ފަސް ކޭސް ރާއްޖެއިންވެސް ވަނީ ފެނިފަ އެވެ. އާ ވޭރިއެންޓާ ގުޅީގެން އިތުރު ފިޔަވަޅުތައް އެޅުމަށް މަޝްވަރާ ކުރެވެމުންދާ ކަމަށް ވެސް އެޗްޕީއޭން ވަނީ ބުނެފަ އެވެ.
އަދި ކޮވިޑާ ގުޅިގެން މިހާރު އަޅާފައިވާ ފިޔަވަޅުތަކަށް އިތުރަށް ސަމާލުވުމަށް މިއަދު ވެސް ވަނީ އިލްތިމާސް ކުރައްވައިފަ އެވެ.
އޮމިކްރޯން ވޭރިއަންޓް
ކޮވިޑުގެ އާ ވޭރިއެންޓް އެންމެ ފުރަތަމަ ފެނިފައިވަނީ ދެކުނު އެފްރިކާ އިންނެވެ.
އެއާއެކު މިދިޔަ މަހުގެ 27 ވަނަ ދުވަހުން ފެށިގެން އެފްރިކާގެ ބައެއް ގައުމުތަކުން ރާއްޖެއަށް ދަތުރުކުރުން ވަނީ މަނާކޮށްފަ އެވެ.
އޮމިކްރޯން ވޭރިއެންޓާ ގުޅިގެން ރާއްޖެއަށް ދަތުރުކުރުން މަނާކޮށްފައިވާ ގައުމުތަކަކީ ސައުތު އެފްރިކާ، ނެމީބިއާ، މޮޒެމްބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވާޓީނީ ހިމެނޭހެން ހަތް ގައުމަކުންނެވެ.
އެ ގައުމުތަކުން ރާއްޖެއަށް ދަތުރުކުރުން މަނާ ފަރާތްތަކުގެ ތެރޭގައި ދަތުރުކުރުމުގެ 14 ދުވަސް ކުރިން އެ ގައުމުތަކުގައި ދިރިއުޅުނު އަދި 12 ގަޑިއިރަށްވުރެ ގިނައިރު އެ ގައުމުތަކުގައި ޓްރާންސިޓް ކުރި ފަރާތްތައް ހިމެނޭނެ ކަމަށް އެޗްޕީއޭއިން ބުނެ އެވެ.
