ކޮވިޑާ ގުޅިގެން މިއަދު މޮނިޓަރިންއަށް ލީ ނުވަ ރަށާ އެކު މޮނީޓަރިންގެ ހާލަތުގައި އޮތް ރަށްތަކުގެ ޖުމްލަ އަދަދު 21 އަށް އަރާފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ން ބުނެފި އެވެ.
ރަށްރަށުގައި ކޮވިޑްގެ ފެތުރިފައިވާތާ ގާތްގަނޑަކަށް ދެ މަހެއްހާ ދުވަސް ވެދާނެ އެވެ. ރަށްރަށުގައި ކޮވިޑަށް ޕޮޒިޓިވްވާ މީހުންގެ އަދަދު އިތުރެވެ. ނަމަވެސް, މިދިޔަ ދުވަސްތަކުގައި ކޭސްތައް ފެންނަ ރަށްތައް މަދުވި އެވެ. އެކަމަކު މިހާރު އަނެއްކާވެސް ގިނަ ރަށްތަކުން ކޮވިޑް ދަނީ ފެންނަމުންނެވެ.
އަތޮޅުތެރޭ ކޮވިޑްގެ ހާލަތު ގޯސްވެފައިވާއިރު އެޗްޕީއޭއިން ބުނި ގޮތުގައި ގިނަ ރަށްރަށުން ބަލި ކޮންޓްރޯލްކުރުމަށް އެއްބާރުލުމެއް ނުލިބެ އެވެ.
އެޗްޕީއޭއިން މައުލޫމާތު ދިން ގޮތުގައި ކޮވިޑް ކޭސް ފެނިގެން މިއަދު މޮނިޓަރިންއަށް ލާފައި ވަނީ ބ. އޭދަފުށި، ހދ. ހަނިމާދޫ، ބ. ދޮންފަނު، ނ. ލަންދޫ، ނ. މިލަދޫ، ޅ.ހިންނަވަރު، ތ.ވިލުފުށި، ތ.ހިރިލަންދޫގެ އިތުރުން ގދ.ރަތަފަންދޫ ކަމަށެވެ.
މިއަދު މޮނިޓަރިންގެ ހާލަތަށް ގެނައި ނުވަ ރަށަކާއެކު ޖުމްލަ އަދަދު 21 އަށް އަރާފައި ވާއިރު މިވަގުތު މޮނިޓަރިންގެ ހާލަތުގައި އޮތް އެންމެ ގިނަ ދުވަސްވީ ރަށްތަކަކީ ސ. ހިތަދޫ، ސ. މަރަދޫ، ސ. މަރަދޫ ފޭދޫ އަދި ސ. ފޭދޫ އެވެ. މި ރަށްތައް މޮނިޓަރިންގެ ހާލަތަށް ގެނެސްފައި ވަނީ މިދިޔަ އޮގަސްޓް މަހުގެ 28 ވަނަ ދުވަހު އެވެ.
ސެޕްޓެމްބަރު މަހު މޮނިޓަރިންގެ ހާލަތަށް ގެެނެސްފައިވާ ދެ ރަށެއް އެބައޮތެވެ. އެއީ ސ. ހުޅުމީދޫ އާއި ފ. ނިލަންދޫ އެވެ.
މިދިޔަ އޮކްޓޯބަރު މަހު މޮނިޓަރިންގެ ހާލަތަށް ގެނައި ރަށްތަކުގެ ތެރޭގައި ވެސް ދެ ރަށެއް އެބަ އޮތެވެ. އެއީ މ. މުލަކާއި ނ. މިލަދޫ އެވެ. މިމަހު މޮނިޓަރިންގެ ހާލަތަށް ގެނައި އިތުރު ރައްތަކުގެ ތެރޭގައި ދ. ކުޑަހުވަދޫ، އދ. މާމިގިލި އާއި ނ. މާފަރު ހިމެނެ އެވެ.
ރާއްޖޭގެ ކޮވިޑް ހާލަތު
ރާއްޖޭން ބަލި ޖެހުނު މީހުންގެ އަދަދު މިހާރު ވަނީ 90،861 އަށް އަރާފަ އެވެ. އެކްޓިވް ކޭސްގެ އަދަދު 1933 އަށް އަރާފައި ވާއިރު ބަލި ޖެހިގެން ހޮސްޕިޓަލުގައި އެނދުމަތިކޮށްގެން 15 މީހަކަށް ދަނީ ފަރުވާ ދެމުންނެވެ.
ރާއްޖެއިން ކޮވިޑް ކޭސްއެއް އެންމެ ފުރަތަމަ ފެނިފައި ވަނީ މާޗް 7، 2020ގަ އެވެ. އަދި މިހާތަނަށް މި ބަލީގައި މަރުވި މީހުންގެ ޖުމްލަ އަދަދު ވަނީ 258 އަށް އަރާފަ އެވެ.
ރާއްޖޭން ވެސް މިހާރު ވަނީ އޮމިކްރޯންގެ ކޭސްއެއް ފެނިފަ އެވެ.
