ޕީޕީއެމް، ޕީއެންސީން ހުޅުމާލޭ ދެ ވަނަ ފިޔަވަހީގައި ބޭއްވުމަށް އިއުލާނުކޮށްފައިވާ ޖަލްސާ އަށް ހުއްދަ ނަގާފައި ނެތް ކަމަށާއި، އެފަދަ ޖަލްސާއެއް ބޭއްވޭނީ ހުއްދަ ދޭ ސަރަހައްދެއްގައި ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފި އެވެ.
"ކޮތަރު ކޮށި" ނަމުގައި ބާއްވާ އެ ޖަލްސާގައި ކުރީގެ ރައީސް އަބްދުﷲ ޔާމީން ބައިވެރިވެވަޑައިގަންނަވާ ކަމަށާއި، ޖަލްސާ އޮންނާނީ ހުކުރު ދުވަހުގެ ރޭ ހުުޅުމާލޭ ދެ ވަނަ ފިޔަވަހީގެ "ހިޔާ ޕާކް" ސަރަހައްދުގައި ކަމަށް އިދިކޮޅުން ބުނެ އެވެ.
އެ ޖަލްސާ ބޭއްވުމުގެ ހުއްދަ މާލޭ ސިޓީ ކައުންސިލުން މި މަހުގެ 5 ގައި ދީފައި ވާއިރު، އެ ސިޓީގައި ސޮއިކުރައްވާފައި ވަނީ ޑެޕިއުޓީ މޭޔަރު އަހުމަދު ނަރީޝް އެވެ.
ޕީޕީއެމް،ޕީއެންސީން ބާއްވާ ޖަލްސާގެ ޕޯސްޓަރެއް
އެޗްޑީސީން ނެރުނު ބަޔާނެއްގައި ބުނެފައި ވަނީ ހުޅުމާލޭގެ އެއްވެސް ސަރަހައްދެއްގައި އެއްވެސް ހަރަކާތެއް ބޭއްވޭނީ އެ ކޯޕަރޭޝަނަށް ލިޔުމުން ހުށަހަޅައި ހުއްދަ ހޯދުމަށް ފަހު ކަމަށެވެ. ހަރަކާތްތަކަށް ހުއްދަ ދެނީ ކަނޑައަޅާ އުސޫލުތަކެއްގެ ތެރެއިން އަދި ކަނޑައަޅާ ސަރަހައްދެއްގައި ބޭއްވުމަށް ކަމަށް ވެސް ބުނެފައިވެ އެވެ.
"މީޑިއާގައި ދައުރުވަމުންދާ ހަބަރުގައިވާ ޕީޕީއެމް ޕީއެންސީގެ ފަރާތުން ބޭއްވުމަށް ރާވަމުންދާ ހަރަކާތަކީ މި ކޯޕަރޭޝަނުން ކަނޑައަޅާފައިވާ އުސޫލުތަކާއި އެއްގޮތަށް ހުއްދަ ނަގައިގެން ބޭއްވުމަށް ރާވަމުންދާ ހަރަކާތެއް ނޫން ކަމުގައި ދަންނަވަމެވެ،" އެޗްޑީސީގެ ބަޔާނުގައިވެ އެވެ.
އެ ފަދަ ހަރަކާތެއް ބޭއްވުމަށް ބޭނުންވާ ފަރާތްތަކުން ހުށަހަޅައިގެން ހުއްދަ ނެގުމަށް އެޗްޑީސީން އެދެ އެވެ.
އެމްއެމްޕީއާރުސީގެ ހިޔާނާތުގެ ފައިސާ ލޯންޑާ ކުރިކަމުގެ ކުށް ސާބިތުވެ ފަސް އަހަރުގެ ޖަލު ހުކުމަކުން ޔާމީން މިނިވަންވެވަޑައިގަތީ އެކަށީގެންވާ މިންވަރަށް އެ ކުށް ސާބިތުނުވާކަމަށް ސުޕްރީމް ކޯޓުން ނޮވެމްބަރު 30 ގައި ނިންމުމުންނެވެ. އެއަށް ފަހު، ޔާމީން ބައިވެރިވެވަޑައިގަންނަވާ ބޮޑު ޖަލްސާއެއް ފުރަތަމަ ބޭއްވީ މިދިޔަ ހުކުރު ދުވަހު ކާނިވާ ސަރަހައްދުގަ އެވެ.
