ކޮވިޑްގެ އާ ވޭރިއެންޓް, އޮމިކްރޮންއާ ގުޅިގެން އެފެރިކާގެ ބައެއް ގައުމުތަކުން ރާއްޖެއަށް ދަތުރުކުރުން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މަނާކޮށްފި އެވެ.
އޮމިކްރޮން ވޭރިއެންޓާ ގުޅިގެން ރާއްޖެއަށް ދަތުރުކުރުން މަނާކޮށްފައިވާ ގައުމުތަކަކީ ސައުތު އެފްރިކާ، ނެމީބިއާ، މޮޒެމްބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވާޓީނީ ހިމެނޭހެން ހަތް ގައުމަކުންނެވެ.
އެ ގައުމުތަކުން ރާއްޖެއަށް ދަތުރުކުރުން މަނާ ފަރާތްތަކުގެ ތެރޭގައި ދަތުރުކުރުމުގެ 14 ދުވަސް ކުރިން އެ ގައުމުތަކުގައި ދިރިއުޅުނު އަދި 12 ގަޑިއިރަށްވުރެ ގިނައިރު އެ ގައުމުތަކުގައި ޓްރާންސިޓް ކުރި ފަރާތްތައް ހިމެނޭނެ ކަމަށް އެޗްޕީއޭއިން ބުނެ އެވެ.
މީގެ ތެރޭގައި ދިވެހިންނާއި ރާއްޖޭގައި ވޯކް ޕާމިޓް އޮންނަ ފަރާތްތައް ނުހިމެނެ އެވެ. އެ ފަރާތްތަކަށް އެޗްޕީއޭއިން ވަނީ ހާއްސަ އުސޫލެއް ގާއިމްކޮށްފަ އެވެ.
އެގޮތުން 14 ދުވަސް ކުރިން އެ ގައުމުތަކުގައި އުޅުނު, 12 ގަޑިއިރަށް އެ ގައުމުތަކުން ގައުމެއްގައި ޓްރާންސިޓްވި ދިވެހިންނާއި ވޯކް ޕާމިޓް އޮންނަ ފަރާތްތައް ރާއްޖެއަށް އައުމާއެކު 14 ދުވަހުގެ ކަރަންޓީނެއް ފުރިހަމަކުރަން ޖެހޭނެ ކަމަށް އެޗްޕީއޭއިން ބުނެ އެވެ.
އަދި 14 ދުވަސް ފަހުން ކަރަންޓީނުން ދޫކުރެވޭނީ ކޮވިޑަށް ޓެސްޓުކޮށް ޓެސްޓުގެ ނަތީޖާ ނެގެޓިވްވުމުން ނކަމަށް ވެސް އެޗްޕީއޭއިން ބުނެ އެވެ.
އެޗްޕީއޭއިން އާންމު ސިއްހަތުގެ ގާނޫނުގެ ދަށުން މި ފިޔަވަޅުތައް އެޅިއިރު، ވޭތުވެދިޔަ 14 ދުވަސް ތެރޭ އެގައުމުތަކުން ރާއްޖެއަށް ދަތުރުކޮށް ރާއްޖެ އެތެރެވެފައިވާ ފަރާތްތައް ވީހާވެސް އަވަހަށް ވަގުތުން ޕީސީއާރު ޓެސްޓެއް ހެދުމަށް އެޗްޕީއޭއިން އެންގި އެވެ.
އަދި އޭގެ ތެރެއިން 14 ދުވަސް ނުވަތަ އެޔަށްވުރެ ދިގު މުއްދަތެއް ރާއްޖޭގައި ހޭދަކުރާ ފަރާތްތައް 14 ދުވަސް ފުރިހަމަވުމުން އަނެއްކާ ވެސް ކޮވިޑް ޓެސްޓެއް ހެދުމަށް އެޗްޕީއޭއިން ވެސް އެންގި އެވެ.
އަދި ހަމައެއާއެކު ރާއްޖޭގައި 14 ދުވަހަށް ވުރެ ކުރު މުއްދަތެއް ހޭދަކުރާ ފަރާތްތައް ވެސް ރާއްޖެއިން ފުރުމުގެ ކުރިން ވެސް ތިން ދުވަސް ހަމަނުވާ ކޮވިޑް ޓެސްޓެއް ހުށަހަޅަން ޖެހޭނެ ކަމަށް އެޗްޕީއޭއިން ބުނެ އެވެ.
އޮމިކްރޮން ވޭރިއަންޓުގެ ނުރައްކާ ބޮޑު
ޑަބްލިއުއެޗްއޯ އިން ކަންބޮޑުވާ ވޭރިއެންޓުތަކުގެ ލިސްޓުގައި މިހާރު ހިމެނެނީ ހަތަރު ވޭރިއެންޓެކެވެ. އެއީ އަލްފާ، ބޭޓާ، ގަމާ އަދި ޑެލްޓާ އެވެ. އޭގެ ތެރެއިން އެންމެ ބޮޑަށް ފެތުރިފައި ވަނީ ޑެލްޓާ ވޭރިއެންޓެވެ.
އޭގެ އިތުރުން ސަމާލުކަންދީގެން މޮނީޓާ ކުރަމުންދާ ދެ ވޭރިއެންޓެއް ވެ އެވެ. އެއީ ލަމްބްޑާ އާއި މޫ އެވެ. ނަމަވެސް އޮމްރިކޮން ވޭރިއަންޓާ ގުޅޭ ގޮތުން މިހާތަނަށް ހޯދިފައިވާ މައުލޫމާތުތަކުން، ބަލި ފެތުރުމުގެ ދުވެލި އަވަސްކަމަށް ތަޖުރިބާކާރުން ވަނީ ބުނެފަ އެވެ.
ކުރިން ކޮވިޑު ޖެހުނު މީހުންނަށް ބަލި އަނެއްކާ ވެސް ޖެހުމުގެ ފުރުސަތު މި ވޭރިއެންޓާއެކު ބޮޑުކަމަށް ވެސް ބުނެ އެވެ.
އެއާއެކު ޔޫރަޕްގެ ގައުމުތަކުން މިހާރު ވެސް ވަނީ ދެކުނު އެފްރިކާ އަށް ދަތުރުކުރުން މަނާކުރަން ފަށާފަ އެވެ. ސިންގަޕޫރާއި މެލޭޝިއާ އިން ބުނީ އެފްރިކާގެ ހަތް ގައުމަކުން ދަތުރުކުރުން ލިމިޓު ކުރާނެ ކަމަށެވެ.
މިއަދު ހެނދުނު ސްރީ ލަންކާއިން ވަނީ ދެކުނު އެފްރިކާ، ބޮޓްސްވާނާ، ލެސޯތޯ، ނެމީބިއާ، ޒިމްބާބުވޭގެ އިތުރުން ސްވާޒީލޭންޑަށް ދަތުރުކޮށްފައިވާ މީހުން 14 ދުވަހުގެ ކަރަންޓީނު ފުރިހަމަކުރަން ޖެހޭނެ ކަމަށް އިއުލާނުކޮށްފަ އެވެ.
