އޮސްޓްރޭލިއާއިން އެތެރެކޮށްފައިވާ އޮއިސްޓާގެ ބާވަތެއް ރާއްޖޭގައި ވިއްކުން މަނާކޮށްފި އެވެ.
މޯލްޑިވްސް ފުޑް އެންޑް ޑްރަގު އޮތޯރިޓީން ނެރުނު ބަޔާނެއްގައި ބުނެފައިވަނީ އޮސްޓްރޭލިއާގެ ކޮފިން ބޭގައި އުފައްދާފައިވާ ޕްރެސްޓިޖް ފުޑްސް އިންޓަނޭޝަނަލްގެ "ރޯ ޕެސިފިކް އޮއިސްޓާ" ރާއްޖެ އަށް އެތެރެވެފައިވާ ކަމުގެ މައުލޫމާތު ދުނިޔޭގެ ސިއްހަތު ޖަމިއްޔާގެ އިންޓާނޭޝަނަލް ފުޑް ސޭފްޓީ އޮތޯރިޓީސް ނެޓްވޯކުން އަންގާފައިވާ ކަމަށެވެ.
އެހެންވެ، އެ އޮތޯރިޓީން ވަކި ގޮތެއް އަންގަންދެން އެ ބާވަތުގެ އޮއިސްޓާ ނުވިއްކުމަށާއި ބޭނުން ނުކުރުމަށް ވަނީ އިލްތިމާސްކޮށްފަ އެވެ.
އޮސްޓްރޭލިއާގައި ވެސް އެ ބާވަތުގެ އޮއިސްޓާ ވިއްކުން މަނާކޮށް، ބާޒާރުގައި ހުރި އޮއިސްޓާތައް ނެގުމަށް އަމުރު ނެރުނީ ސީފުޑްގެ ބާވަތްތައް ބޭނުންކުރި ބަޔަކު ބަލިވުމާ ގުޅިގެންނެވެ.
