ސްޓޭޓް ޓްރޭޑިންގް އޮގަނައިޒޭޝަން (އެސްޓީއޯ)ގެ ދަށުން ހިންގާ ގައުމީ ޝިޕިން ލައިން މޯލްޑިވްސް ސްޓޭޓް ޝިޕިން (އެމްއެސްއެސް) ގެ އާ ބޯޓު މިއަދު ރާއްޖެ ގެނެސްފި އެވެ.
މި ބޯޓަކީ އެމްއެސްއެސްގެ ފުރަތަމަ އަމިއްލަ ބޯޓެވެ. މި ބޯޓަކީ އެއްފަހަރާ 450 ކޮންޓެއިނަރު އުފުލޭނެ ބޯޓެއްކަމަށް އެމްއެސްއެސްއިން ވަނީ މީގެ ކުރިން ބުނެފަ އެވެ. މިބޯޓުގެ އިތުރުން އެހެން ބޯޓުތައް ހޯދުމުގެ މަސައްކަތް އެމްއެސްއެސް އިން މިހާރު ވެސް ދަނީ ކުރަމުންނެވެ.
އާ ބޯޓަށް ކިޔާނެ ނަމެއް އަދި އެ ކުންފުނިން ހާމަކޮށްފައިނުވި ނަމަވެސް، އެ ބޯޓާއެކު ރާއްޖެއާ އަވަށްޓެރި ސްރީ ލަންކާއާ ދެމެދުގައި ސީދާ ދަތުރުތައް ކުރުމުގައި ބޮޑު ކުރިއެރުމެއް ލިބިގެންދާނެ ކަމަށް އެ ކުންފުނިން ލަފާކުރެ އެވެ.
އެމްއެސްއެސް އިން މުދާ އުފުލުމަށް މީގެ ކުރިން ބޭނުންކުރަމުން ދިޔަ "ބޮންތި" އަކީ ޗާޓަރު ބޯޓެކެވެ. އެ ކުންފުނިން ވަނީ އެ ބޯޓު ޗާޓަރުކުރުން މިފަހުން ހުއްޓާލާފަ އެވެ. ބޯޓު ޗާޓަރުކޮށްގެން މުދާ އުފުލަން ޖެހުމުން ބޮޑު ހަރަދެއް އެކަމަށް ކުރަންޖެހޭކަމަށް އެ ކުންފުނިން ބުނެ އެވެ.
ނަމަވެސް މިއަދު ރާއްޖެ އައި އެ ކުންފުނީގެ އަމިއްލަ ބޯޓާއެކު ކުންފުނީގެ ހިންގުމުގެ ހަރަދު ކުޑަކުރެވޭނެކަމަށް އެ ކުންފުނިން ވަނީ މީގެ ކުރިން ބުނެފަ އެވެ.
އެއާއެކު އެމްއެސްއެސް އަކީ ފައިދާވާ ކުންފުންޏަކަށްވުމުގެ މަގުފަހިވެގެންދާނެކަމަށް ވެސް އެ ކުންފުނިން ބުނެ އެވެ. އެމްއެސްއެސްގެ އޮޕަރޭޝަން ފެށިއިރު، ކޮންމެ ދަތުރެއްގައި އުފުލަމުން ދިޔައީ 50 އެއްހާ ކޮންޓެއިނަރެވެ.
ނަމަވެސް، އެމްއެސްއެސް އިން އުފުލާ މުދަލުގެ އަދަދު އިތުރުވެ މިހާރު ކޮންމެ ދަތުރެއްގައި 400 އަށް ވުރެ ގިނަ ކޮންޓެއިނަރު އުފުލާކަމަށް އެ ކުންފުނިން ބުނެ އެވެ.
