ރާއްޖޭގައި ފްލައިން ސްކޫލެއް ހިންގަން މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) އާއި ގައުމީ އެއާލައިންގެ ބެލެނިވެރި ކުންފުނި އައިލެންޑް އޭވިއޭޝަންއާ ދެމެދު އެއްބަސްވުމެއްގައި މިއަދު ސޮއިކޮށްފި އެވެ.
އެމްއެންޔޫ އާއި އައިލެންޑް އޭވިއޭޝަނުން ގުޅިގެން ޖޮއިންޓް ވެންޗާ ކުންފުންޏެއް އުފައްދަން ވަނީ ނިންމާފަ އެވެ. ފްލައިން ސްކޫލް ހިންގާނީ މި ކުންފުނީގެ ދަށުންނެވެ.
އެމްއެންޔޫގެ ފަރާތުން މި އެއްބަސްވުމުގައި ސޮއިކުރައްވާފައި ވަނީ ޔުނިވާސިޓީގެ ވައިސް ޗާންސެލާ މުހައްމަދު ޝަރީފެވެ. އަދި އައިލެންޑް އޭވިއޭޝަންގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު މުހައްމަދު މިހާދު އެވެ.
ފްލައިން ސްކޫލާ ގުޅޭގޮތުން ވާހަކަދައްކަވަމުން އައިލެންޑް އޭވިއޭޝަންގެ އެމްޑީ ވަނީ ގައުމީ ޔުނިވާސިޓީއާ ގުޅިގެން މި ހިންގޭ ސްކޫލްގެ ފުރަތަމަ ބެޗުގައި 30 ދަރިވަރުންނަށް ކިޔަވައިދެވޭނެ ކަމަށް ވިދާޅުވެފަ އެވެ.
އަހަރެއްގެ ތެރޭގައި އެ ސްކޫލްގައި 80 ދަރިވަރުންނަށް ކިޔަވާދެވޭނެ ކަމަށް އޭނާ ވިދާޅުވި އެވެ.
ސްކޫލްގެ ކިޔެވުން މި އަހަރުގެ ތެރޭގައި ފެށޭނެ ކަމަށާއި އޭޝިއަން އެކެޑަމީ އޮފް އެރޮނޮޓިކްސް (އޭއޭއޭ) ހިންގި ފްލައިން ސްކޫލްގައި ކިޔަވަން ފަށައި ކިޔެވުން ހުއްޓިފައި ތިބި ކުދިންނަށް އިސްކަންދޭނެ ކަމަށް މިހާދު ވިދާޅުވި އެވެ.
މިހާދު ވިދާޅުވީ އަމާޒަކީ އެކުންދިންގެ ކިޔެވުން އަންނަ އަހަރުގެ ތެރޭގައި ނިންމާލުން ކަމަށެވެ.
އެމްއެންޔޫ އާއި އައިލެންޑް އޭވިއޭޝަންއާ ދެމެދު ފަހުމުނާމާގައި ސޮއިކުރުމަށް ބޭއްވުނު ރަސްމިއްޔާތުގެ ތެރެއިން. -- ފޮޓޯ:އައިލެންޑް އޭވިއޭޝަން
ވައިސް ޗާންސިލާ ޝަރީފު ވިދާޅުވީ ޔުނިވާސިޓީއަށް 48 އަހަރު ވެގެންދިޔަ ފަހުން ފްލައިން ސްކޫލެއް ފެށުން މިއީ އޭވިއާޝަން ދާއިރާގެ ކޯސްތައް ފެށުމަށް އެޅުނު މުހިންމު ފިޔަވަޅެއް ކަމަށެވެ.
ކުރިއަށް އޮތްތާގައި އޭވިއޭޝަންގެ އިތުރު ކޯސްތައް އެ ސްކޫލް މެދުވެރުކޮށް ފެށުމަށް މަސައްކަތްކުރާނެ ކަމަށް ޝަރީފު ވިދާޅުވި އެވެ.
ޝަރީފު ވަނީ ފްލައިން ސްކޫލް މެދުވެރިކޮށް ފަސޭހަކަމާއެކު ކިޔެވުމުގެ ފުރުސަތު ދަރިވަރުންނަށް ފަހިކޮށްދޭނެކަމުގެ ޔަގީންކަންވެސް އަރުއްވާފަ އެވެ.
ގައުމީ ޔުނިވާސިޓީ އާއި އައިލެންޑް އޭވިއޭޝަންގެ ޖޮއިންޓް ވެންޗާ ކުންފުނިން އަައްޑޫގެ ގަމުގައި ފްލައިން ސްކޫލް ހިންގުމަށް ހަވާލުކުރަނީ ޗެކް-ރިޕަބްލިކްގެ މަޝްހޫރު ފްލައިން އެކެޑެމީއާ އެވެ.
