އެމްބިއުލޭންސް އައުން އިންތިހާއަށް ލަސްވެ، ކޮވިޑް ބަލީގައި ފަރުވާ ނުކުރެވިގެން މަރުވި ފާތިމަތު މިޝްކާ، 10، ގެ މައްސަލައިގައި އިހުމާލުވި ފަރާތްތަކަށް ދައުވާ ކުރުން ލަސްވާތީ އާއިލާއިން ކަންބޮޑުވުން ފާޅުކޮށްފި އެވެ.
ކޮވިޑުޖެހި، ނޭވާލުމަށް އުނދަގޫވެ، އެމެޖެންސީގައި ފަރުވާދެމުންދަނިކޮށް މިދިޔަ ޖޫން 1، ގައި ހާއްސަ އެހީއަށް ބޭނުންވާ މިޝްކާ މަރުވުމުގައި އިހުމާލުތަކެއް ހުރި ކަމަށް މީގެ ކުރިން ހެލްތު މިނިސްޓްރީން ވަނީ ބުނެފަ އެވެ. ނަމަވެސް މިހާތަނަށް އެ މައްސަލައިގައި މީހެއްގެ މައްޗަށް ދައުވާކޮށްފައެއް ނުވެ އެވެ.
މިޝްކާގެ މަރުގެ މައްސަލައިގެ ތަހުގީގު ދިގުލައިގެން ދިއުމާއި އިހުމާލުވި ފަރާތްތަކަށް ދައުވާ ނުކުރެވި، އެ ފަރާތްތަކަށް ފިޔަވަޅު ނޭޅި ގިނަ ދުވަސްވާތީ އާއިލާއިން ކަންބޮޑުވާ ކަމަށް އެ އާއިލާގެ ގާނޫނީ ވަކީލު އަހުމަދު ޝިފާއު ވިދާޅުވި އެވެ. އެހެންވެ އާއިލާގެ ކަންބޮޑުވުންތައް ޕްރޮސެކިއުޓާ ޖެނެރަލް ހުސެއިން ޝަމީމަށް ހިއްސާ ކުރުމަށް އޭނާ މަސައްކަތް ކުރަމުންދާ ކަމަށް ވެސް ވަކީލު ވިދާޅުވި އެވެ.
އެ މައްސަލަ ފުލުހުން ތަހުގީގުކޮށް ނިންމުމަށްފަހު ދެ ފަހަރެއްގެ މަތިން ޕީޖީ އޮފީހަށް ފޮނުވި އެވެ. އަލުން މައްސަލަ އަލުން އިސްލާހު ކުރުމަށް އެދި އެ ދެ ފަހަރު ވެސް ޕީޖީ އޮފީހުން މައްސަލަ ފޮނުވާލީ އެވެ.
ޕީޖީ އޮފީހުގެ މީޑީޔާ އޮފިސަރު އަހްމަދު ޝަފީއު ވިދާޅުވީ އެފަދަ މައްސަލަތަކުގައި ޖިނާއީ މިންގަނޑުން ދައުވާ ކުރެވޭނެތޯ ނުވަތަ ނޫންތޯ ކަނޑައެޅުން އުނދަގޫ ކަމެށެވެ. އެގޮތުން ޖިނާއީ ދައުވާއެއް ކުރެވޭނީ އިހުމާލުވެފައިވާ މީހުން ދެނިގަނެވިގެން ކަން އޭނާ ފާހަގަކުރެއްވި އެވެ.
ފަރުވާ ލިބުމުގައި ލަސްތަކެއް ދިމާވެގެން ކޮވިޑްގެ ބަލީގައި ނިޔާވި މިޝްކާގެ މަރުގެ މައްސަލާގައި ކަން ހިނގާ ދިޔަ ގޮތުގެ ޓައިމްލައިނޭއް ތައްޔާރު ކުރުމަށްފަހު އެ ހާދިސާއާއި ގުޅޭ ރިޕޯޓެއް ހެލްތު މިނިސްޓްރީއިން ފުލުހަށް ފޮނުވާފައިވެ އެވެ.
ޖުލައި މަހުގެ ތެރޭގައި ފޮނުުވި އެ ރިޕޯޓުގައިވާ ކަންކަން ތަހުގީގު ކުރުމަށްފަހު ސިއްހީ އިދާރާއިން މިޝްކާއަށް އިހުމާލުވެފައިވާ މިންވަރު ދެނެގަތުމަށް ކުރަމުންދާ ތަހުގީގަށް ފަސް މަސް ވެފައި ވާއިރު، ފުލުހުން އަބަދުވެސް ބުނަމުން ދަނީ "އެމައްސަލަ ދަނީ ތަހުގީގު ކުރެވެމުން" ކަމަށާއި "އިތުރު ކޮމެންޓެއް ދެވެން ނެތް" ކަމަށެވެ.
މިޝްކާ މަރުވީ ފަރުވާ ދިނުމުގައި ލަސްތަކެއް ވެގެން
މިޝްކާގެ އަށް ފަރުވާ ދިނުމުގައި ލަސްތަކެއްވެ، އިހުމާލުވެފައިވާ ކަމަށް ހެލްތު މިނިސްޓްރީގެ ތަހުގީގު ރިޕޯޓުން އެނގޭ އިރު، އެ ތަހުގީގު ކުރީ މިޝްކާ އަށް ފަރުވާ ދިނުމުގައި އިހުމާލްވެފައިވާ ކަމަށް އާއިލާ އިން ތުހުމަތުކޮށްފައި އޮއްވަ އެވެ.
"އެޗްޕީއޭގެ 1676 އަކުން ތަކުރާރުކޮށް ބުނަމުންދިޔައީ މެޑިކަލް ޓީމަށް އަންގައިފީމޭ ކުޑައިރުކޮޅަކުން ދާނެޔޭ. އެކަމަކު އެމްބިއުލޭންސް އައީ 11:40 ގައި. އެއިރު ކުއްޖާ އޮތީ [ހާލުދެރަވެގެން] ވެއްޓިފައި. ވިންދެއް ނެތް. މިކަމުގެ ޒިންމާ ނަގާނީ ކާކު،" މިޝްކާގެ ތިމާގެ މީހަކު މީގެ ކުރިން ޓުވިޓާގައި ބުނެފައިވެ އޮތެވެ.
މިޝްކާގެ މަރުގައި އިހުމާލެއްވޭތޯ ހިއުމަން ރައިޓްސް ކޮމިޝަން (އެޗްއާރުސީއެމް) އިންނާއި މަޖިލީހުގެ ހިއުމަން ރައިޓްސް ކޮމިޓީއިންވެސް ދަނީ ބަލަމުންނެވެ. އެޗްއާރުސީއެމުން ބުނީ އެ ކޮމިޝަނުން މި މައްސަލާގައި ކުރާ ތަހުގީގު ގާތްގަނޑަކަށް ނިމިފައިވާ ކަމަށެވެ.
