އުއްތަމަ ފަނޑިޔާރު އަހުމަދު މުއުތަސިމް އަދުނާން ދިރިއުޅުއްވާ ގެކޮޅަށް ވަދެ، ތަކެއްޗަށް ގެއްލުން ދިން މީހާ ކުށަށް އިއުތިރާފުވުމުން އޭނާގެ މައްޗަށް ބަންދުގެ މުއްދަތު ޖަހައިފި އެވެ.
މުއުތަސިމް އެމަނިކުފާނުގެ އާއިލާގެ މެމްބަރުންނާއެކު ދިރިއުޅުއްވާ ގެކޮޅަށް މިދިޔަ ބުރާސްފަތި ދުވަހު މީހަކު ވަން މައްސަލައިގައި ފުލުހުން ހައްޔަރުކޮށްފައި ވަނީ މ. ސީވިންޑް، ފާތިހް ޝާކިރު، 46، އެވެ. އޭނާގެ ބަންދުގެ މުއްދަތު ޖަހަން ކޯޓަށް ގެންދިއުމުން ހަތް ދުވަހު ޖަލުގައި ބެހެއްޓުމަށް ވަނީ އަމުރުކޮށްފަ އެވެ.
ކްރިމިނަލް ކޯޓުގައި ފާތިހު މިއަދު ވަނީ އޭނާގެ ކުށަށް އިއުތިރާފުވެފަ އެވެ. ނަމަވެސް ބުނެފައި ވަނީ މުއުތަސިމްގެ ގެކޮޅަށް ވަދެ ގެއްލުން ދިނީ އާދަޔާ ހިލާފް މިންވަރަކަށް ބާރުގަދަ މަސްތުވާއެއްޗެއް ކަމަށްވާ "ވާނުވާ" ބޭނުންކޮށްގެން ކަމަށެވެ.
ފާތިހު ބުނީ އޭނާ މަސްތުވެގެން ހުރި ވަގުތު ހިނގާ ކަންތައް އެއްވެސް މިންވަރަކަށް އޮޅުން ނުފިލާ ކަމަށެވެ. އެގޮތުން މުއުތަސިމްގެ ގެކޮޅަށް ވަދެވުނު އިރު ވެސް ކުރެވުނު ކަންތައް ނޭނގޭ ކަމަަށް ފާތިހު ބުންޏެވެ. ނަމަވެސް ގެކޮޅަށް ވަންނަ ސީސީޓީވީ ފުޓޭޖުން ފެންނަނީ އޭނާ ކަމަށް ފާތިހު ވަނީ އިއުތިރާފުވެފަ އެވެ.
މުއުތަސިމްގެ ގެކޮޅަށް ވަދެ ގެއްލުންދިން މައްސަލަ ތަހުގީގު ކުރުމަށް ފުލުހުންނަށް ހުށަހަޅާފައި ވަނީ އެމަނިކުފާނަށް ސެކިއުރިޓީ ފޯރުކޮށްދޭ ސިފައިންގެ ފަރާތުންނެވެ. އެ ހާދިސާއާއެކު ސިފައިން މުއުތަސިމަށް ފޯރުކޮށް ސަލާމަތީ ހިދުމަތް ވަރުގަދަ ކުރުމަށް ބައެއް ފަރާތްތަކުން ވަނީ ގޮވާލައިފަ އެވެ.
