ރައީސް އިބްރާހިމް މުހައްމަދު ސޯލިހާއި އަނބިކަނބަލުން ފަޒްނާ އަހުމަދު ކުޅުދުއްފުށީ ސިޓީއަށް މިއަދު ވަޑައިގެންފި އެވެ.
ކުޅުދުއްފުށީން ރައީސް ސޯލިހަށް މަރުހަބާ ދަންނަވާފައިވަނީ އެ ސިޓީގެ މޭޔަރު މުހައްމަދު އާތިފެވެ.
ރައީސް މިއަދު އެ ސިޓީއަށް ކުރައްވާ ދަތުރުފުޅުގައި ހޮސްޕިޓަލަށް ޒިޔާރަތްކުރައްވައި، އެތަނުގައި ކުރިއަށްދާ މަސައްކަތްތައް ބައްލަވާލައްވާނެ އެވެ. އަދި، އެ ސިޓީ ބައެއް އެހެން ތަންތަނަށް ވެސް ޒިޔާރަތް ކުރެއްވުމަށް ހަމަޖެހިފައިވެ އެވެ.
ކުޅުދުއްފުށީ ހޮސްޕިޓަލަކީ މި ސަރުކާރުން ހާއްސަ އިސްކަމެއް ދީގެން ތަރައްގީ ކުރަމުން ގެންދާ ހޮސްޕިޓަލެކެވެ. އަދި، ކުޅުދުއްފުށީގައި ޓާޝަރީ ހޮސްޕިޓަލެއް ގާއިމް ކުރަން ވެސް ސަރުކާރުން ނިންމާފައިވެ އެވެ.
ރައީސް ސޯލިހު ކުޅުދުއްފުއްޓަށް ކުރައްވާ މި ދަތުރުފުޅަކީ އެ ރަށް ސިޓީއަކަށް ބަދަލުކުރި ފަހުން ކުރައްވާ ފުރަތަމަ ދަތުރުފުޅެވެ.
ކޮވިޑުގެ ސަބަބުން އަތޮޅު ތެރެއަށް ކުރައްވާ ދަތުރުފުޅުތައް މަޑުޖައްސަވާލެއްވުމަށްފަހު، ރައީސްގެ މި ދަތުރުފުޅުގައި ވަޑައިގަންނަވަނީ ހދ. ކުޅުދުއްފުއްޓަށާއި އެ އަތޮޅުގެ ހަނިމާދޫގެ އިތުރުން ކުމުންދޫއަށެވެ.
ތިން ދުވަހުގެ މި ދަތުރުފުޅުގައި އެ ތިން ރަށުގެ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއާ ރައީސް ބައްދަލު ކުރައްވާނެ އެވެ. އަދި އެ ރަށްރަށުގެ ސަރުކާރު މުއައްސަސާތަކަށް ވެސް ޒިޔާރަތް ކުރެއްވުމަށް ވަނީ ނިންމަވައިފަ އެވެ.
މިދަތުރުފުޅުގައި ފޮރިން މިނިސްޓަރު އަބްދުﷲ ޝާހިދުވެސް ބައިވެރިވެ ވަޑައިގެންނެވި އެވެ.
މި ރަސްމީ ދަތުރުފުޅު ނިންމަވާލެއްވުމަށް ފަހު ރައީސްގެ ދެ ކަނބަލުން މާލެ ވަޑައިގަތުމަށް ނިންމާފައިވަނީ އަންނަ އާދިއްތަ ދުވަހު އެވެ.
