ރާއްޖޭގެ ފޮރިން މިނިސްޓްރީގެ އޮފީސް އިމާރާތް މިއަދު މަރާމާތަށް ފަހު ހުޅުވިގެން ދިޔައިރު، އެތަނުން ކުރީގެ މިނިސްޓަރު ފަތުހުﷲ ޖަމީލް ހަނދާންތައް އެކިގޮތްގޮތުން އާވެ އެވެ. އެ އިމާރާތަށް އެމަނިކުފާނުގެ ނަންފުޅު ދީފައިވުމަކީ، އެމަނިކުފާނުގެ ހިދުމަތްތައް ރަމްޒުކޮށްދޭ ކަމެކެވެ. އެ އިމާރާތް 2005 ވަނަ އަހަރު ބިނާކުރުމަށް ކުރެހިއިރު، ރިޔަލެއްގެ ފަރުމާ ގެނައީ، ފަތުހުﷲގެ ވިސްނުންފުޅުންނެވެ.
ހުޅުވުމުގެ ރަސްމިއްޔާތުގައި، ރާއްޖޭގެ އުއްތަމަ ފަނޑިޔާރު އަހުމަދު މުއުތަސިމް އަދުނާން ތުރުކުރައްވައިގެން ހުންނެވީ ޓައީ އަކީ ވެސް ފަތުހުﷲގެ ހަނދާންތައް އާވާ ޓައީއެކެވެ. ކަޅުރަތް ކުލައިގެ އެ ޓައީއަކީ، ފޮރިން މިނިސްޓްރީގެ ލީގަލް ސެކްޝަނުގެ ޑިރެކްޓަރަކަށް 2001-1994 އަށް މުއުތަސިމް މަސައްކަތްކުރެއްވުމަށް ފަހު ވަކިވެވަޑައިގަތް ދުވަހުގެ ހަދިޔާއެކެވެ. އެތަނުގެ މުވައްޒަފުން ދިން އެ ޓައީ މުއުތަސިމް އަށް ދެއްވީ ފަތުހުﷲގެ އަތްޕުޅުންނެވެ. މުއުތަސިމްގެ ކާފާފުޅު ހުސެއިން ސަލާހުއްދީނާއި ފަތުހުﷲގެ ކާފާފުޅު ދަރަވަންދޫގޭ އަބްދުﷲ ކަމާލުއްދީނަކީ ދެބެންނެވެ.
"މިއަދު އުއްތަމަ ފަނޑިޔާރު މަނިކުފާން އެ ޓައީ ތުރުކުރައްވައިގެން ހުންނެވީތީ އަޅުގަނޑުމެން މަނިކުފާނަށް ޓަކައި ފަހުރުވެރިވަން،" ފޮރިން މިނިސްޓަރު އަބްދުﷲ ޝާހިދު ވިދާޅުވި އެވެ.
ޝާހިދު ވިދާޅުވީ އެއީ ހާރިޖީ ޓީމުގެ މިސާލެއް ކަމަށެވެ. އެ ޓީމުގެ މުޅި ވިސްނުމާއި ގުޅުން އޮންނާނީ ހަމައެކަނި މަގާމުގައި ތިބޭއިރު ނޫން ކަމަށް ޝާހިދު ވިދާޅުވި އެވެ.
"އަޅުގަނޑުމެންނަކީ ދިވެހިރާއްޖޭގެ މިނިވަންކަމާއި ސިޔާސަތު ރައްކާތެރި ކުރުމަށް އަތުރާލާފައިވާ ސަފުތަކުގެ ތެރެއިން ފަސްޓް ލައިން އޮފް ޑިފެންސް. އެހެންވީމާ އެކަމުގައި އަޅުގަނޑުމެން ދެމިތިބޭނަން،" ޝާހިދު ވިދާޅުވި އެވެ.
މިއަދުގެ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހާއި ޝާހިދު ވަނީ ފަތުހުﷲގެ އަގު ވަޒަން ކުރައްވައި ވާހަކަ ދައްކަވައިފަ އެވެ. ރާއްޖޭގެ ހާރިޖީ ދާއިރާ ކުރިއަށް ގެންދަނީ ފަތުހުﷲގެ ސިޔާސަތުގެ މަތިން ކަމަށް ދެ ބޭފުޅުން ވެސް ވިދާޅުވި އެވެ.
މިސްރުގެ އަޒްހަރު ޔުނިވާސިޓީން ތައުލީމު ހާސިލްކުރެއްވުމަށް ފަހު ފަހުތުﷲ ރާއްޖޭގެ ހާރިޖީ ދާއިރާ އަށް ހިދުމަތްކުރައްވަން ފެށްޓެވީ ރައީސް އިބްރާހިމް ނާސިރުގެ ދައުރުގަ އެވެ. އެގޮތުން 1978 މާޗުން ފެށިގެން، ރައީސް މައުމޫން އަބްދުލްގައްޔޫމުގެ ދައުރުގެ ފަހުކޮޅާ ހަމަޔަށް، 2005 ގެ ނިޔަލަށް ފޮރިން މިނިސްޓަރުކަން ކުރެއްވެވި އެވެ.
