އެހެން އަހަރު ތަކަށް ވުރެ މި އަހަރު، ދިރާސީ އާ އަހަރުގެ ކިޔެވުން ފެށުމަށް ގދ ގައްދޫގައި ވަމުން އަންނަ ތައްޔާރީތައް ތަފާތެވެ. ފޮތް ލިސްޓުތައް ލިބުމާ އެކު އެ ރަށުގެ ބެލެނިވެރިންގެ މެދުގައި ހިފާފައި އޮތީ ފޮތްތަކަށް ފޮތިން އެކި ގޮތްގޮތަށް ކަވަރު ފެހުމުގެ ތަފާތު "ފޯރި" އެކެވެ. މިއީ، ކުރިން ބައެއް އެހެން ރަށްރަށުގައި ވެސް ބެލެނިވެރިންނާއި ދަރިވަރުން އަމިއްލަ ޝައުގުވެރިކަމަށް ކުރަމުން އަންނަ ކަމެކެވެ.
އެކަމަކު ގައްދޫ ސްކޫލުން މިކަން މިކުރަނީ ހާއްސަ ކެމްޕޭނެއްގެ ދަށުންނެވެ. މި ކެމްޕޭންގައި، ކުދިންގެ ފޮތްތަކުގައި ލާނީ ފޮއްޗާއި ކަރުދާހުގެ ކަވަރެވެ. ހާއްސަކޮށް ފޮތީގެ ކަވަރެވެ.
"މިއީ ޕްލާސްޓިކް މަދުކުރުމަށް ސްކޫލުން ބައިވެރިވެގެން އުޅޭ ޗެލެންޖެއްގެ ދަށުން ޕްލާސްޓިކް މަދު ކުރުމަށް ކުރާ މަސައްކަތުގެ ބައެއް. މިހާރު ވެސް ރަށުން ކުނީގެ ގޮތުގައި އުކާލާ ޕްލާސްޓިކް ފުޅި އެއްކޮށްގެން ހަ ވަރަކަށް ގޯނި ޕާލޭ މޯލްޑިވްސް އަށް މި އަހަރު ތެރޭގައި ފޮނުވައިފިން،" ސްކޫލްގެ ޕްރިންސިޕަލް، ފާތުމަތު ނާހިދާ ވިދާޅުވި އެވެ.
ޕާލޭ އަކީ ތިމާވެށި ހިމާޔަތްކުރުމަށް ބައިނަލްއަގުވާމީ ފެންވަރުގައި ހިންގާ ބޮޑު ނެޓްވޯކެކެވެ. ދާދި ފަހުން ޕާލޭ މޯލްޑިވްސް އާއި އެޑިއުކޭޝަން މިނިސްޓްރީ ގުޅިގެން ވަނީ ސްކޫލްތައް މެދުވެރިކޮށް ތިމާވެށި ހިމާޔަތްކުރުމާ ގުޅޭ މައިލްސްޓޯންތަކެއް ހާސިލްކުރެވޭ ގޮތަށް "އެއާ ސްޓްރެޓެޖީ" ޗެލެންޖް ގެ ނަމުގައި ކެމްޕޭނެއް ލޯންޗުކޮށްފަ އެވެ. މި ޗެލެންޖުގައި ބައިވެރިވެގެން ސްކޫލްތަކުން ހާސިލްކުރާ ކޮންމެ މައިލްސްޓޯނަކަށް އިނާމުގެ ގޮތުގައި ސްކޫލަށް ބޭނުންވާ އިކުއިޕްމަންޓާއި މެޓީރިއަލް ހަދިޔާކުރާނެ އެވެ.
ނާހިދާ ވިދާޅުވީ، ގިނަ އަދަދަކަށް ބޭނުންކުރާ ސެލޯފިން ދޫކޮށްލަން ނިންމުމުން ކުރީ ކޮޅުގައި ބެލެނިވެރިންނާއި ކުދިންނަށް އުނދަގޫ ވެދާނެ ކަމަށެވެ. ނަމަވެސް މީގެ ސަބަބުން ދުރު ރާސްތާގައި ކުދިންނާއި ސްކޫލަށް ގިނަ ފައިދާތަކެއް ލިބޭނެ ކަމަށް ގަބޫލުކުރައްވާ ކަމަށެވެ.
އާދައިގެ މޮނިޓަރު ފޮތެއްގައި ފޮތި ކަވަރެއް ލައްވާފައި
"ފުރަތަމަ ކަމަކީ މި ކަންކަން ރަނގަޅަށް ކުރުމުން ސްކޫލަށް ތަރައްގީ ލިބުމުގެ ފުރުސަތު އެބަ އޮތް. ދެވަނަ ކަމަކީ ކުދިންނަށް ރަނގަޅު އާދައެއްގެ ޕްރެކްޓިސް އަކަށް ވެސް މިކަން އެބަ ބަދަލުވޭ. ގިނަ ފަހަރަށް ފޮތުގައި ސެލޯފިން ލައްވާފައި ހުންނާތީ ފޮތުގެ ހައިޖީން އާއި ރީތިކަމަށް ކުދިން މާ ބޮޑަކަށް ސަމާލުކަމެއް ނުދޭ. އެކަމަކު ފޮތި ލެއްވީމަ ކުދިންނަށް އެނގޭނެ ހަޑި ވާ ކަން، އެހެންވީމަ ރީތގިކޮށް ގެންގުޅެން ބާރު އަޅަންޖެހޭ ކަން،" ނާހިދާ ވިދާޅުވި އެވެ.
ބެލެނިވެރިންނަށް ޗެލެންޖެއް، އެކަމަކު ތަރުހީބު އެބަ އޮތް
ރަށުގެ ބެލެނިވެރިން ސްކޫލާއި ޕްރިންސިޕަލްގެ ނިންމުމަށް ތާއީދެވެ. އެކަމަކު ގްރޭޑް ފަހަކުން ދަށުގެ ބެލެނިވެރިންގެ ކަންބޮޑުވުންތަކެއް އެބަ ހުއްޓެވެ. އެ މީހުން ގަބޫލުކުރާ ގޮތުގައި ހުރިހާ ފޮތެއްގައި ފޮތި ކަވަރު ބޭނުންކުރުމަކީ ކުޑަކުދިންނަށް ފަސޭހަ ކަމަކަށް ނުވާނެ އެވެ.
"ވަރަށް ރަނގަޅު އިނީޝިއޭޓެއް. އެކަމަކު ގްރޭޑް އެކެއް ދޭއްގެ ކުދިންނަށް އެ ކަވަރުތައް ހަޑިކޮށްނުލައި ގެންގުޅެން އުނދަގޫވާނެ ވަރު ހިތަށް އަރަނީ. އެހެން ނޫން، ތަންކޮޅެއް ބޮޑެތި ކުދިންނަށް ހަމަ ވަރަށް ރަނގަޅު ޗެލެންޖެއް މިއީ." ނާސިހާ މުޣުނީ ބުންޏެވެ.
ޝަހުމީމާ ޑިޒައިންކޮށްފައިވާ ކަވަރުތަކެއް
އެކަމަކު ނާސިހާ ވެސް ހުރީ އާ ޗެލެންޖުގެ އަޖުމަބަލާލަން ބޭނުންވެފަ އެވެ. ޕްރައިމަރީގައި ކިޔަވަމުންދާ އޭނާގެ ދަރިފުޅަށް ވެސް އާ އަހަރުގެ ފޮތްތަކަށް ފޮތިން ކަވަރު ފަހާނެ ކަމަށް ބުންޏެވެ.
ފޮތްތަކަށް ކަވަރު ފަހައި ދިނުމުގައި އުޅޭ ޝަހުމީމާ ބުނީ މިހާރުވެސް ވަރަށް ގިނަ އޯޑަރު ލިބިފައިވާ ކަމަށެވެ. އޭނާ އަކީ ފޮތީގައި އެމްބްރޮއިޑް ވެސް ކުރާ މީހަކަށް ވާތީ ގިނަ ކަވަރު ތަކުގައި ކުއްޖާގެ ނަން އެމްބްރޮއިޑްކޮށް ޑިޒައިން ވެސް ކުރާ ކަމަށް ބުންޏެވެ.
"އަޅުގަނޑަށް ހީވަނީ ވަރަށް ރަނގަޅު ކަމެއްހެން މިއީ. ސަބަބަކީ މި ކަވަރުތައް ހުންނަނީ ބާލީސް ނުވަތަ ވާހަކަ ފޮތްތަކުގެ ބޭރުގައި ހުންނަ ކަވަރު ގޮތަށް މުޅި ފޮތަށް ލެވޭ ގޮތަށް. ހަޑި ވީމަ ދޮވެވޭނެ. ކޮންމެ އަހަރަކަށް މުޅިން އާ ރީތި ކަވަރު ލެއްވުމުގެ ބަދަލުގައި ގިނަ އަހަރު ތަކަކަށް ކަވަރުތައް ބޭނުންކުރެވޭނެ. ރީ-ޔޫސް ކުރުމުގެ ރަނގަޅު އާދަޔަކާ ދިމާލަށް ބޮޑެތިވާ ކުދިންގެ ވިސްނުން ދީލާލެވޭނެ ކަހަލަ އިނީޝިއޭޓެއް މިއީ." ޝަހުމީމާ ބުންޏެވެ.
ކޮންމެއަކަސް މި ތަފާތު އާ ޗެލެންޖާ އެކު ގައްދޫގެ ބެލެނިވެރިންގެ މެދުގައި އާ އަހަރުގެ ޖޯޝު ވަރަށް ގަދަ އެވެ.
