ތަފާތު އެކި ކުލަތައް ހިމެނޭ ކެއުންތަކުން ސިއްހަތު ރަނގަޅު، ދިގު އުމުރެއް އުޅެން މަގުފަހިވާނެކަން އެނގޭ ހެއްޔެވެ؟ ކުލަގަދަ މޭވާ އާއި ތަރުކާރީ ގައި ހިމެނޭ ފައިޓޯނިޔުޓްރިއެންޓްސްގެ ސަބަބުން ސިއްހަތު ވެސް އުޖާލާކޮށް ކުލަގަދަކޮށްދެ އެވެ. ފައިޓޯނިޔުޓްރިއެންޓްސްއަކީ ގަހަކަށް ބޭނުންވާ ކުލަތަކާއި، ރަހަތަކާއި ވަސްތައް ލިއްބައިދޭ މާއްދާ އެވެ. އަދި މިއީ ގަހުގެ ދިފާއީ ނިޒާމު ވަރުގަދަކޮށްދީ، ގުދުރަތީ މާހައުލުގައިވާ ބަލިތަކާއި، މާ ބޮޑަށް އަވި ދިނުން ފަދަ ކަންކަމުން ގަސްތައް ރައްކާތެރިކޮށްދޭ މާއްދާ އެކެވެ.
އިންސާނުން ޕްލާންޓް ފުޑް ކެއުމުން، އޭގައިވާ ފައިޓޯނިޔުޓްރިއެންޓްސްގެ އެހީގައި ކްރޯނިކް ނުވަތަ ދިގުދެމިގެންދާ ބޮޑެތި ބަލިތަކުން ރައްކާތެރިކޮށްދެ އެވެ. ފައިޓޯނިޔުޓްރިއެންޓްސްއިން ކެންސަރާ ދެކޮޅު އަދި ހިތުގެ ބައްޔާ ދެކޮޅު އަސަރުތަކެއް ހަށިގަނޑަށް ކޮށްދެ އެވެ. އެޕިޑެމިއޮލޮޖިކަލް ދިރާސާތަކުން ދައްކާ ގޮތުގައި މޭވާ އާއި ތަރުކާރި ގިނައިން ކެއުމުން ކްރޯނިކް ބަލިތަކުގެ ނުރައްކާ ކުޑަވެ އެވެ. އެގޮތުން ހިތުގެ ބަލިތަކާއި ބައެއް ކަހަލަ ކެންސަރުތަކަށް ހުށަހެޅުމުގެ ފުރުސަތު ކުޑަވެ އެވެ.
އެމެރިކާގެ ކެންސާ ސޮސައިޓީން ލަފާދެނީ ކޮންމެ ދުވަހަކު ވެސް 2.5 ޖޯޑުގެ މޭވާ އާއި ތަރުކާރީ ކެއުމަށެވެ. އެމެރިކާއިން އެންމެ ފަހުން ނެރުނު ޑަޔަޓެރީ ގައިޑްލައިންގައި ލަފާދެނީ އެއަށް ވުރެ ވެސް އިތުރަށް ކެއުމަށެވެ. އެގޮތުން ކޮންމެ ދުވަހަކު 2.5 ޖޯޑު ތަރުކާރީ އަދި 2 ޖޯޑު މޭވާ 2000 ކެލޮރީގެ ޑަޔަޓެއްގައި ހިމެނުމަށް ލަފާދީފައި ވެ އެވެ.
ކާތަކެތި ކުލަގަދަ ކުރާނީ ކިހިނެއް؟
މިކަން ކުރުމަށް ވީހާވެސް ގިނައިން މޭވާ އާއި ތަރުކާރީ ކެއުމުގައި ހިމަނާށެވެ. ކޮންމެ ކުލަޔަކުން ވެސް ފޯރުކޮށްދެނީ މުޅިން ތަފާތު ސިއްހީ ފައިދާއެކެވެ. އަދި އެއް ކުލައަށް ވުރެ އަނެއް ކުލައިން ލިއްބައިދޭ ފައިދާ ހަށިގަނޑަށް ވަކިން ހާއްސަކޮށް މުހިއްމެއް ނުވެ އެވެ. ހުރިހާ ކުލައަކުން ލިބޭ ފައިދާ ހަމަހަމަކޮށް ބޭނުންވެ އެވެ. އެކި ކުލަތަކުގެ ބެލެންސްޑް ޑަޔަޓެއް މުހިއްމު ވަނީ އެހެންވެ އެވެ. ގިނައިން ހަށިގަނޑަށް ފައިޓޯނިޔުޓްރިއެންޓްސް ލިއްބައިދެނީ މޭވާ އާއި ތަރުކާރީގެ ތޮއްޓާއެކު ކެއުމުންނެވެ. އެއީ ފައިޓޯނިޔުޓްރިއެންޓްސް އެންމެ ގިނައިން ހިމެނެނީ ތޮށީގައި ކަމަށް ވާތީ އެވެ. އެހެންކަމުން މޭވާ އާއި ތަރުކާރީ ކެއުމުގައި ބޭނުން ކުރާއިރު ތޮށި ނުމަށާ ވޭތޯ ބަލާށެވެ.
ތިރީގައި އެވަނީ މޭވާ އާއި ތަރުކާރީގެ އެކި ކުލަތަކުން ލިއްބައިދޭ އެކި ފައިދާ އެވެ.
ރަތް ކުލަ: މިއީ ކެރޮޓެނޮއިޑް ލައިކޮޕީން މުއްސަނދި ތަކެއްޗެވެ. މިީގެން ޕްރޮސްޓޭޓް ކެންސަރާއި ލަންގް ޑިޒީޒްއާ ދެކޮޅަށް ރައްކާތެރިކަން ހޯދޭނެ އެވެ. މިި ލިބޭނީ ސްޓްރޯބެރީ، ކްރޭންބެރީ، ރާސްޕްބެރީ، ޓޮމާޓޯ، ޗެރީ، އާފަލު، ބީޓްސް، ކަރާ، ރަތް މޭބިސްކަދުރު، ރަތް މިރުސް އަދި ރަތް ފިޔާ ފަދަ ތަކެތިންނެވެ.
އޮރެންޖު އަދި ރީނދޫ: ބީޓާ ކްރިޕްޓޮތޭންކްސިން މިއީ ސެލްތަކުގެ ގުޅުން ބަދަހިކޮށް، ހިތުގެ ބައްޔާ ދުރުކޮށްދޭ ކަމަށް ބެލެވޭ އެއްޗެކެވެ. މި ލިބެނީ ކެރެޓު، ސްވީޓް ޕޮޓޭޓޯ، ރީނދޫ މިރުސް، އޮރެންޖު، ދޮންކެޔޮ، އަލަނާސި، އަނބު، ބަރަބޯ، އެޕްރިކޮޓް، ބަޓާނާ، ޕީޗް، މެލަން އަދި ކޯން ފަދަ ތަކެތިންނެވެ.
ފެހި ކުލަ: ކެންސަރް ބްލޮކް ކުރާ ކެމިކަލް ސަލްފޮރެފޭން، އައިސަޔަނޭޓް އަދި އިންޑޯލްސް ގިނައިން ހިމެނެ އެވެ. ސްޕިނެޗް، ކެބެޖް، ބްރަސެލްސް ސްޕްރައުޓް، ކިވީ ފްރުޓް، ކޮލާޑް ގްރީންސް، ގްރީން ޓީ، މިންޓް، ރޯޒްމެރީ، ސޭޖް، ތައިމް ބެސިލް ފަދަ ހާބްތަކުން މި ލިބޭނެ އެވެ.
ނޫ އަދި ދަނބު: އެންތޮސަޔަނިންސްގެ ނަން ދީފައިވާ ބާރުގަދަ އެންޓިއޮކްސިޑެންޓު މީގައި ހިމެނެ އެވެ. މުސްކުޅިވުން ލަސްކޮށްދީ ލޭ ގަނޑުވުން ދުރުކޮށް ހިތުގެ ސިއްހަތަށް މީގެ ފައިދާ ކުރެ އެވެ. ބްލޫބެރީ، ބްލެކްބެރީ، އެލްޑާބެރީ، މޭބިސްކަދުރު، ރެއިޒިން، ބަށި، ޕްލަމް، ފިގް، ޕްރޫންސް، ލެވެންޑާ، ދަނބު ކެބެޖް ފަދަ ތަކެތިން މި ލިބޭނެ އެވެ.
ހުދު އަދި މުށި: ފިޔާ އާއިލާގައި ހިމެނޭ އަލިސިންއަކީ ޓިއުމަރާ ދެކޮޅަށް މަސައްކަތް ކުރާ މާއްދާ އެކެވެ. ދެން މި ގްރޫޕުގައި ހިމެނޭ ތަކެތީގައި ފެލެވޮނޮއިޑް، ކުއޭސެތިން، ކޭމްޕްފެރޯލް ފަދަ އެންޓިއޮކްސިޑެންޓު އެކުލެވެ އެވެ. ފިޔާ، ކޯލިފްލާވާ، ގާލިކް، ލީކްސް، ޕާސްނިޕްސް، ރެޑިޝް މަޝްރޫމް ފަދަ ތަކެތިން މި ފައިދާތައް ލިބޭނެ އެވެ.
titledesc
