ކޮވިޑުގައި ރޭ މަރުވި 10 އަހަރުގެ ކުއްޖާއަށް ފަރުވާ ދިނުން ލަސްވުމުގައި އިހުމާލު އޮތް ކަމަށް ގަބޫލު ކުރައްވާ ކަމަށާއި އެ މަރުގެ ތަހުގީގު މިރޭ ނިމޭނެ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
ކޮވިޑު ޖެހިގެން ރާއްޖެއިން އެންމެ ފުރަތަމަ މަރުވި ކުޑަކުއްޖާ، ހދ. ކުޅުދުއްފުށީ، ލާޖަހާގޭ، ފާތިމަތު މިޝްކާ މުހައްމަދުގެ ފަރުވާގައި އިހުމާލުތަކެއް އާއިލާ އިން ދަނީ ދައްކަމުންނެވެ. ކުއްލިއަކަށް ހާލު ގޯސްވެ، ނޭފަތުން ލޭ އައިސް ނޭވާލާން އުނދަގޫވާތީ އެމްބިއުލާންސެއް ފޮނުވައިދިނުމަށް އެދި ހެލްތު ޕްރޮޓެކްޝަން އެޖެންސީގެ އެމަޖެންސީ ނަންބަރުގައި އެދުމުން އެމްބިއުލެންސް ފޮނުވީ ދެ ގަޑިއިރާ 10 މިނެޓު ފަހުން ކަމަށް އާއިލާ އިން ބުނެ އެވެ.
އެޗްއޯއީސީން މިރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ތަހުގީގު ނިމުމުން ހުރިހާ މައުލޫމާތެއް ހާމަކޮށް އިހުމާލުވެފައިވާ މީހުންނާ މެދު ފިޔަވަޅު އަޅާނެ ކަމަށެވެ.
"އިރާދަކުރެއްވިއްޔާ މިރޭގެ ނިޔަލަށް އެ ތަހުގީގު ނިމޭނެ. ތަހުގީގު ނިންމާފައި އެކަމާ ބެހޭގޮތުން އަޅުގަނޑު ފިޔަވަޅު އަޅާނަން. އަޅާ ފިޔަވަޅު ވެސް އަޅުގަނޑު ހާމަ ކޮށްދޭނަން،" މިނިސްޓަރު ވިދާޅުވި އެވެ.
އިހުމާލުވެފައިވާ މީހުންނާ ދޭތެރޭ ފިޔަވަޅު އަޅާނީ ވަރަށް ރަނގަޅަށް ބެލުމަށް ފަހުގައި ކަމަށް ވެސް މިނިސްޓަރު ވިދާޅުވި އެވެ.
ނޫސްވެރިންގެ ބައްދަލުވުމުގައި ނަސީމް ވާހަކަ ދައްކަވަނީ: ތަހުގީގު މިރޭ ނިމޭނެ ކަމަށް ވިދާޅުވި. -- ފޮޓޯ/އެޗްއީއޯސީ
ފެއިލްވެއްޖެ ކަމަށް ގަބޫލުކޮށް އިސްތިއުފާ ދެއްވަފާނަންތޯ ނޫސްވެރިއަކު ސުވާލު ކުރުމުން މިނިސްޓަރު ވިދާޅުވީ ކަންކަން ހިނގި ގޮތް ބަލަމުން އަންނަ ކަމަށާއި އޭގައި އޭނާގެ އިހުމާލެއްއޮތްތޯ ވެސް ބައްލަވާނެ ކަމަށެވެ. އިސްތިއުފާގެ ސުވާލަށް ޖަވާބު ދޭނީ އޭގެ ފަހުން ކަމަށް ނަސީމް ވިދާޅުވި އެވެ.
މިނިސްޓަރަށް ތުހުމަތުކުރާ މައްސަލައެއް އަމިއްލަ ބެލިދާނެތޯ އެހެން ނޫސްވެރިއަކު އެހުމުން ވިދާޅުވީ އެގޮތަށް ބެލޭނެ ކަމަށް ގަބޫލުކުރައްވާ ކަަމަށެވެ. އެއީ އޭނާ އަކީ އޮޅުވާލުމެއް އެއްވެސް ކަމެއްގައި ގެންގުޅުއްވާނެ ބޭފުޅަކަށް ނުވާތީ ކަމަށް ވެސް ވިދާޅުވި އެވެ.
މިނިސްޓަރު ވިދާޅުވި ގޮތުގަި މިޝްކާގެ އާއިލާއަށް ރައީސް އިބްރާހިމް މުހައްމަދު ސޯލިހް ގުޅުއްވައި ތައުޒިޔާ ވިދާޅުވި އެވެ.
އާއިލާ އިން ބުނެފައިވާ ގޮތުގައި މިޝްކާގެ ހާލު ދެރަވުމުން ތަކުރާރުކޮށް ގުޅީ އެޗްޕީއޭގެ 1676 އަށެވެ. މެޑިކަލް ޓީމު ދާނެ ކަމުގެ ޔަގީންކަން ދިން ނަމަވެސް ގިނައިރުތަކެއް ވި އިރު ވެސް އެމްބިއުލެންސް ނުފޮނުވާ ކަމުގެ ޝަކުވާ އާއިލާ އިން ކުރެ އެވެ.
އިމާދުއްދީން ސްކޫލްގައި ކިޔަވާ މިޝްކާ ކޮވިޑަށް ޕޮޒިޓިވްވީ މީގެ ހަފުތާއެއްހާ ދުވަަސްކުރިންނެވެ. އޭނާގެ އިތުރުން މަންމަ އާއި ބައްޕަ ވެސް ތިބީ ކޮވިޑަށް ޕޮޒިޓިވްވެ ކަރަންޓީންގަ އެވެ.
މިނިސްޓަރު ވިދާޅުވީ ކަންކަން ރަނގަޅު ކުރުމަށް ދިރާސާތައް ކުރަމުން އަންނަ ކަމަށާއި މިރޭގެ ނިޔަލަށް އެކަންކަން ސާފު ވާނެ ކަމަށެވެ. ކޯލް ސެންޓަރުން ވެސް ހާއްސަ ސަމާލުކަން ދޭން ޖެހޭ ކޯލްތައް ދެނެގަތުމަށް ކުރަން ޖެހޭ ކަންކަން ވެސް ކުރަމުން އަންނަ ކަމަށް ވިދާޅުވި އެވެ.
ނޫސްވެރިން ވަނީ އެމްބިއުލާންސްގެ ހިދުމަތާ ގުޅޭގޮތުން ގިނަ ސުވާލުތަކެއް ކޮށްފަ އެވެ. އެމަޖެންސީގައި އެޓެންޑް ކުރުމަށް ފަސް އެމްބިއުލާންސް މާލޭގައި ގެންގުޅޭ ކަމަށާއި އެއީ ރަނގަޅު އަދަދެއް ކަމަށް ވެސް މިނިސްޓަރު ވިދާޅުވި އެވެ. އަދި މިހާރު 105 މިލިއަން ރުފިޔާ ހަރަދުކޮށްގެން 96 އެމްބިއުލާންސަަށް އޯޑާ ކޮށްފައިވާ ކަމަށް ވިދާޅުވި އެވެ. މިނިސްޓަރު ވިދާޅުވީ އެ އެމްބިއުލާންސްތައް ޖުލައި މަހުގެ ކުރީކޮޅު ލިބޭނެ ކަމަށެވެ.
"އެ ހިސާބުން އެމްބިއުލާންސްގެ ދަތިކަމެއް ރާއްޖޭގެ ރަށެއްގައި ވެސް ނޫޅޭނެ،" މިނިސްޓަރު ވިދާޅުވި އެވެ.
މިސްކާގެ މަރުގައި އިހުމާލެއްވޭތޯ ހިއުމަން ރައިޓްސް ކޮމިޝަން (އެޗްއާރުސީއެމް) އިން ވެސް އަންނަނީ ތަހުގީގު ކުރަމުންނެވެ.
