ކޮވިޑް-19 ގައި ރޭ މަރުވި އުމުރުން 10 އަހަރުގެ އަންހެން ކުއްޖާ ބަލާ އެމްބިއުލެންސް ފޮނުވުން ލަސްވި މައްސަލަ ހެލްތު މިނިސްޓްރީން ތަހުގީގު ކުރަން ފަށައިފި އެވެ.
ހދ. ކުޅުދުއްފުށީ، ލާޖަހާގޭ، ފާތިމަތު މިޝްކާ މުހައްމަދު މަރުވީ ރޭ ދަންވަރު އައިޖީއެމްއެޗު ހޮސްޕިޓަލުގައި އެމެޖެންސީކޮށް ފަރުވާދެމުން ދަނިކޮށެވެ. އިމާދުއްދީން ސްކޫލްގައި ކިޔަވަމުންދިޔަ ހާއްސަ އެހީއަށް ބޭނުންވާ މިޝްކާއަކީ ކޮވިޑް ބަލީގައި ރާއްޖޭގައި މަރުވި އެންމެ ހަގު އަދި ފުރަތަމަ ކުޑަކުއްޖާ އެވެ.
އެ މައްސަލައިގައި މިޝްކާގެ އާއިލާގެ މީހަކު ސޯޝަލް މީޑިއާގައި ބުނެފައި ވަނީ ކޮވިޑަށް ޕޮޒިޓިވްވެފައި ހުރި އެ ކުއްޖާގެ ނޭފަތުން ލޭ އައިސް ނޭވާލާން އުނދަގޫވާތީ އެމްބިއުލާންސެއް ފޮނުވައިދިނުމަށް އެދި ހެލްތު ޕްރޮޓެކްޝަން އެޖެންސީގެ އެމަޖެންސީ ނަންބަރުގައި އެދުމުން އެމްބިއުލެންސް ފޮނުވީ ދެ ގަޑިއިރާ 10 މިނެޓު ފަހުން ކަމަށެވެ.
"އެޗްޕީއޭގެ 1676 އަކުން ތަކުރާރުކޮށް ބުނަމުންދިޔައީ މެޑިކަލް ޓީމަށް އަންގައިފީމޭ ކުޑައިރުކޮޅަކުން ދާނެޔޭ. އެކަމަކު އެމްބިއުލޭންސް އައީ 11:40 ގައި. އެއިރު ކުއްޖާ އޮތީ [ހާލުދެރަވެގެން] ވެއްޓިފައި. ވިންދެއް ނެތް. މިކަމުގެ ޒިންމާ ނަގާނީ ކާކު،" މިޝްކާގެ ތިމާގެ މީހަކު ޓުވިޓާގައި ސުވާލުކޮށްފައި އޮތެވެ.
އެ މައްސަލައިގައި ހެލްތު މިނިސްޓްރީން މިއަދު ބުނެފައި ވަނީ މިޝްކާ ބަލައި އެމްބިއުލެންސް ފޮނުވި ވަގުތުގެ މައްސަލަ ބަލަން ފަށާފައިވާ ކަމަށެވެ. އަދި އެމެޖެންސީގައި އެމްބިއުލެންސް ފޮނުވަން ހަމަޖެހިފައިވާ ގޮތްތަކަށް މިހާރު ބަދަލުތަކެއް ގެނެސްފައިވާ ކަމަށް ވެސް މިނިސްޓްރީން ބުންޏެވެ.
ކޮވިޑް ޖެހިގެން ކުޑަކުއްޖަކު މަރުވެފައި މި ވަނީ ރާއްޖޭގައި އެ ބަލީގެ އާ ވޭރިއަންޓެއް އުފެދި ކުޑަކުދިންނާއި މާބަނޑު މީހުންނަށް ބަލިޖެހޭ މިންވަރު އަދި ބަލިން ބޮޑުވަރުވާ މިންވަރު މަތިވެފައި އޮއްވަ އެވެ.
އައިޖީއެމްއެޗުގައި މަސައްކަތް ކުރައްވާ ކުޑަކުދިންގެ ހާއްސަ ޑރ. އަހުމަދު ފައިސަލް ރޭ ވިދާޅުވީ "މިފަހަރުގެ ކޮވިޑް ރާޅުގައި ކުޑަކުދިން ވަރަށް ވަރަށް ބަލިވާން ފަށައިފި" ކަމަށެވެ.
ދިފާއީ ނިޒާމް ދަށް ކުޑަކުދިންނާއި ކިޑްނީ ބަލި ހުންނަ ކުދިންނާއި މާ ބޮޑަށް ބަރު ކުދިންނާއި އެނދުމަތިވެފައި ތިބޭ ކުދިން ހާއްސަކޮށް ކޮވިޑުން ބޮޑުވަރުވާކަން ފާހަގަ ކުރެއްވޭ ކަމަށް ވެސް ޑރ. ފައިސަލް ވިދާޅުވި އެވެ.
ކޮވިޑް ފެތުރުން ބޮއްސުންލައި ކޮންމެ ދުވަހަކު އެ ބަލިޖެހޭ މީހުންގެ އަދަދު 1000 މަތީގައި އުޅުނުއިރު ދުވާލަކު 80 ވަރަކަށް ކުދިންނަށް އެ ބަލިޖެހެމުންދިޔަ ކަމަށް ހެލްތު ޕްރޮޓެކްޝަން އެޖެންސީ ބުނެފައިވެ އެވެ.
އެޗްޕީއޭގެ ހިސާބުތަކަށް ބަލާއިރު މިދިޔަ މަހު އެކަނި ވެސް އުމުރުން އެއް އަހަރު ނުވާ 381 ކުދިންނަށް ކޮވިޑް ޖެހުނެވެ.
މާލޭގެ އިތުރުން އަތޮޅު ތެރޭގައި ކޮވިޑު ފެތުރުން ކޮންޓްރޯލުން ނެއްޓިފައިވާއިރު، އެ ބައްޔާ ދެކޮޅަށް އަޅާފައިވާ ފިޔަވަޅުތައް މިހާރު ވަނީ އަނެއްކާވެސް ހަރުކަށިކޮށްފަ އެވެ.
އެ ފިޔަވަޅުތަކާއެކު ނަންބަރުތައް މިހާރު މަޑުމަޑުން ދަށްވާން ފަށާފައި ވީ ނަމަވެސް، އިއްޔެ އެކަނި 768 މީހަކަށް އަލަށް ބަލި ޖެހުނެވެ.
އެއާއެކު ރާއްޖޭގައި މިވަގުތު ކޮވިޑު ޖެހިފައިތިބި މީހުންގެ އަދަދު ވަނީ 24،000 ހުރަސްކޮށްފަ އެވެ. އޭގެ ތެރެއިން 208 މީހަކަށް ހޮސްޕިޓަލުގައި އެޑްމިޓުކޮށްގެން ފަރުވާދެމުންދާއިރު، ޕޮޒިޓިވް މީހުންގެ އަދަދު އިންތިހާއަށް މައްޗަށް ދާން ފެށުމުން، ސަރުކާރުން ވަނީ އެ ބައްޔަށް ފަރުވާދޭ އެނދުތައް ވެސް އިތުރުކޮށްފަ އެވެ.
