ވަކި ގައުމުތަކަކުން ސިއްހީ ހިދުމަތްތެރިން ރެކްރޫޓުކުރަން ހެލްތު މިނިސްޓްރީން ހުޅުވާލާފައިވާތީ އެމްޕްލޯއިމަންޓް އޭޖެންސީތަކުގެ ޔޫނިއަނުން ނުރުހުން ފާޅުކޮށްފި އެވެ.
ކޮވިޑް-19ގެ ހާލަތު ރާއްޖޭގައި އިންތިހާއަށް ގޯސްވެފައިވާއިރު ހޮސްޕިޓަލުތައް ފުރި ސިއްހީ ހިދުމަތްތެރިންނަށް ވަނީ ނުތަކާ ވަރަށް ބާރުބޮޑުވެފަ އެވެ.
އެއާއެކު، މިދިޔަ އަންގާރަ ދުވަހު ހެލްތު މިނިސްޓްރީން ވަނީ އިންޑޮނީޝިއާ އަދި ފިލިޕީންސުން 100 ނަރުހުން އޭޖެންސީތައް މެދުވެރިކޮށް ހޯދަން ހުޅުވާލައިފަ އެވެ.
އެކަމާ ގުޅިގެން އެމްޕްލޯއިމަންޓް އޭޖެންސީތަކުގެ ޔޫނިއަނުން ނެރުނު ބަޔާނެއްގައި ބުނީ ނަރުހުން ހޯދަން އިއުލާނުކޮށްފައިވާ ދެ ގައުމަކީ ވެސް މައިގްރަންޓް ވާކާސްގެ ކަންކަމުގައި އޭޖެންސީތަކުން ބައިވަރު ފީތަކެއް ނަގާ ދެ ގައުމު ކަމަށެވެ.
އަދި މި ވަގުތަކީ އެ ދެގައުމުގެ ސިއްހީ ހިދުމަތްތެރިންނަށް ގައުމުން ބޭރަށް ނުދެވޭނެކަމަށް ކަނޑައަޅާފައިވާ ވަގުތެއް ކަން ވެސް އެ ބަޔާނުގައި ފާހަގަކޮށް، އެކަން ކޮށްފައިވަނީ އޭޖެންސީތަކުގެ ނާގާބިލުކަން ދެއްކުމަށް ކަމަށް ތުހުމަތުކޮށްފައިވެ އެވެ.
މީގެ ކުރިން ދުވަހަކުވެސް ވަކި ގައުމަކުން މީހުން ގެނައުމަށް މިނިސްޓްރީން އަންގާފައިނުވާކަން ފާހަގަކުރަމުން، މިފަދަ ދަތި ދަނޑިވަޅެއްގައި ހާލަތަށް އެއްވެސް ވަރަކަށް ބެލުމެއް ނެތި ވަކި ދެގައުމަކުން މީހުން ގެންނަން މިނިސްޓްރީން ކަނޑައަޅާފައިވަނީ ވަރަށް ޒިންމާދާރުކަން ކުޑަކޮށް ކަމަށް ވެސް އެ ބަޔާނުގައި ބުނެފައިވެ އެވެ.
"އޭޖެންސީތަކަށް ފުރުސަތު ދިންކަމަށް ދައްކައި، މިފަދަ ހާލަތެއްގައި ކުރެވެން ނެތް ކަމެއް އޭޖެންސީންތައް ލައްވައި ކުރުވަން މަސައްކަތްކޮށް، އޭޖެންސީތަކުގެ ގާބިލުކަމާމެދު ރައްޔިތުންގެ ހިތްތަކުގައި ޝައްކު އުފައްދައި، ހެލްތު މިނިސްޓްރީން ވަކި ބަޔަކަށް މިކަމުގެ ތެރެއިން ނާޖާއިޒު ފައިދާ ނެގުމަށް ފުރުސަތު ދިނުން ކަމުގައި މި އެސޯސިއޭޝަނުން ގަބޫލުކުރަމެވެ،" އެ ބަޔާނުގައި ބުންޏެވެ.
ކޮވިޑުގެ ހާލަތާ ގުޅިގެން ރާއްޖެއަށް ސިއްހީ ހިދުމަތްތެރިން ނުހަނު ބޭނުންވެފައިވާ ދަނޑިވަޅެއްގައި, ރާއްޖޭގެ ކަމާގުޅޭ ކައުންސިލުތަކުން ގަބޫލުކުރާ ސަނަދެއްއޮތް ކޮންމެ ގައުމަކުން ސިއްހީ ހިދުމަތްތެރިން ގެނެވޭނެ ގޮތަށް ހުޅުވާލުމަން އެ ޔޫނިއަނުން ވަނީ ގޮވާލައިފަ އެވެ.
އެކަމާ ގުޅޭގޮތުން ހެލްތު މިނިސްޓްރީގެ ބަހެއް ލިބޭ ގޮތް އަދި ވަނީ ނުވެފަ އެވެ.
މީގެ ކުރިން ރާއްޖޭގެ އޭޖެންސީތަކަށް ނުދީ އިންޑިއާގެ އޭޖެންސީއެއް މެދުވެރިކޮށް 500 އަށް ވުރެ ސިއްހީ ހިދުމަތްތެރިން ހޯދަން ހުޅުވާލި މައްސަލަ ވެސް ވަރަށް ބޮޑަށް ހޫނުވި އެވެ.
އެކަމުގެ ޝަކުވާ ރާއްޖޭގެ އެމްޕްލޯއިމަންޓް އޭޖެންސީތަކުގެ ޔޫނިއަނުން ކުރުމުގެ އިތުރުން، ދިވެހި ސިއްހީ ހިދުމަތްތެރިން ވޮލަންޓިއާ ކުރުމަށް އެދުމަށްފަހު، ބޮޑު މުސާރަ ދީގެން ބޭރުން މީހުން ގެންނާތީ އެކަމުގެ ފާޑުކިޔުން ވެސް ހެލްތު މިނިސްޓްރީ އަށާއި ސަރުކާރަށް އަމާޒުވި އެވެ.
