މެޑްރިޑް (މެއި 21) - އެތުލެޓިކޯ މެޑްރިޑްގައި މަޑުކުރުމާ މެދު ގޮތެއް ނިންމުމުގެ އިހުތިޔާރު އޮތީ ލުއިސް ސުއަރޭޒް އަތުގައި ކަމަށް އެ ކްލަބްގެ ރައީސް އެންރީކޭ ސެރޭޒޯ ވިދާޅުވެއްޖެ އެވެ.
މި ސީޒަނުގައި ސުއަރޭޒް އެންމެ ފުރަތަމަ ބާސެލޯނާ ދޫކޮށް ބަދަލުވާން އުޅުނީ އިޓަލީގެ ޗެމްޕިއަން ޔުވެންޓަސްއާ އެވެ. އެކަމަކު އެ ޓީމަށް ބަދަލުވާން ހަދަން ޖެހޭ ޕާސްޕޯޓް ހެދޭހާ މުއްދަތު އޮއްވައި ބާސެލޯނާ އިން އޭނާ ދޫކޮށްލުމުގެ ކަންތައްތައް ނިންމައިނުދޭތީ އެ ޑީލް ނުހިނގި އެވެ. ސުއަރޭޒް ޔުވެންޓަސް އަށް ބަދަލުވާން މަސައްކަތް ކުރިއިރު އޭނާ ބޭނުންވީ ބާސެލޯނާގެ ކޮންޓްރެކްޓްގެ ބާކީ އޮތް މުއްދަތަށްވާ 14 މިލިއަން ޔޫރޯ ހޯދާށެވެ. އެކަމަކު އެ ދޭން ބޭނުންނުވާތީ ބާސެލޯނާ އިން ފަހުން ހަތް މިލިއަން ޑޮލަރުގެ އަގަކަށް އެތުލެޓިކޯ އަށް ސުއަރޭޒް ވިއްކާލީ އެވެ.
އުމުރުން 34 އަހަރުގެ ސުއަރޭޒް އެތުލެޓިކޯއާ އެކު ސޮއިކުރީ ދެ އަހަރުގެ އެއްބަސްވުމެއްގަ އެވެ. އެކަމަކު އެ ކޮންޓްރެކްޓްގައިވާ ގޮތުން ފުރަތަމަ ސީޒަން ނިމުމުން ވަކި މާއްދާ އަކަށް ބެލުމަށް ފަހު ކޮންޓްރެކްޓް އުވާލުމުގެ އިހުތިޔާރު ދެ ފަރާތަށް އޮވެ އެވެ.
އެ ކަމަށް އިޝާރާތްކޮށް އެތުލެޓިކޯގެ ރައީސް ސެރޭޒޯ ވިދާޅުވީ މުސްތަގުބަލާ ބެހޭގޮތުން ގޮތެއް ނިންމާނީ ސުއަރޭޒް އަމިއްލަ އަށް ކަމަށެވެ.
"އަހަރެމެން ބޭނުންވަނީ ސުއަރޭޒް މަޑުކުރަން. ކޮންޓްރެކްޓެއް އެބައޮތް. އޭގެއާ މެދު ގޮތެއް ނިންމުމުގެ ބާރު އޮތީ އޭނަ (ސުއަރޭޒް) އަތުގައި. މީގެ އެންމެ ފަހުގެ ގޮތެއް ނިންމާނީ ސުއަރޭޒް،" ސެރޭޒޯ ވިދާޅުވި އެވެ.
އެތުލެޓިކޯ އިން ސުއަރޭޒްގެ ސޮއި ހޯދުން ވެގެން ގޮސްފައި މި ވަނީ 2014 ވަނަ އަހަރަށް ފަހު ފުރަތަމަ ފަަހަރަށް އެ ޓީމުން ސްޕެނިޝް ލީގު ކާމިޔާބުކުރަން ލިބިގެންދިޔަ ބޮޑު ހިތްވަރަކަށެވެ. އެތުލެޓިކޯ ލީގުގެ އެއް ވަނައިގައި އޮތީ ދެ ވަނައިގައި އޮތް ރެއާލް މެޑްރިޑަށް ވުރެ އެއް ޕޮއިންޓް އިތުރަށް ހޯދައިގެންނެވެ.
މާދަމާރޭ ރެއާލް ވަލޮޑޮލިޑް އަތުން އެތުލެޓިކޯ މޮޅުވެއްޖެނަަމަ އެ ޓީމަށް ލީގު ޗެމްޕިއަންކަން ލިބޭނެ އެވެ. ސުއަރޭޒް ވަނީ މި ފަހަރު ލީގުގައި 31 މެޗުން 20 ގޯލު ޖަހައިފަ އެވެ.
