ކޮވިޑް-19 ޖެހިފައި ހުރި މީހަކާ ބައްދަލުވެފައި ތިބި ޑޮކްޓަރުންނާއި ނަރުހުން ކަރަންޓީނު ކުރުމުގެ ބަދަލުގައި އެ ފަރާތްތަކުން ބޭނުންވާ ނަމަ މަސައްކަތްތަށް ނެރުމަށް ހެލްތު އެމަޖެންސީ އޮޕަރޭޝަން ސެންޓަރުން ނިންމައިފި އެވެ.
މި ނޫހުން ކުރި ސުވާލެއްގެ ޖަވާބުގައި އެޗުއީއޯސީގެ ކޮމިއުނިކޭޝަންސް ޑިޕާޓްމަންޓުން ބުނީ މަސައްކަތަށް ނެރެނީ ބަލީގެ އެއްވެސް އަލާމާތެއް ނެތް އަދި އަމިއްލައަށް މަސައްކަތުގައި ދެމި ތިބުމަށް ބޭނުންވާ ހެލްތު ވޯކަރުން ކަމަށެވެ.
ކޮވިޑް-19 އަށް ޕޮޒިޓިވްވާ ހެލްތު ވޯކަރުން މަސައްކަތަށް ނެރެމުންނުދާ ކަމަށް ވެސް އެޗުއީއޯސީގެ ފަރާތުން ބުންޏެވެ.
ބަލި މީހަކާ ދިމާވި ނަމަވެސް ކަރަންޓީނު ކުރުމުގެ ބަދަލުގައި ޑޮކްޓަރުންނާއި ނަރުހުން މަސައްކަތަށް ނެރެން ނިންމާފައި މި ވަނީ ވެރި ރަށް މާލެ އާއި މުޅި ރާއްޖޭގައި ކޮވިޑް-19 ފެތުރޭ މިންވަރު އަދި މީހުން މަރުވާ މިންވަރު ވެސް އާދަޔާ ހިލާފަށް އިތުރުވެފައި އޮއްވަ އެވެ.
ސިއްހީ ދާއިރާގެ މާހިރުން އަބަދުވެސް ބުނަމުންދިޔައީ ކޮވިޑް-19 ފެތުރޭ މިންވަރު ކޮންޓްރޯލްނުވެ އިތުރުވާ ނަމަ އެކަމުގެ އަސަރު ސިއްހީ ދާއިރާއަށް ކުރާނެ ކަމަށެވެ. ބަލިވާ މީހުންނަށް ފަރުވާދޭން ބޭނުންވާ އިންސާނީ ވަސީލަތްތައް ކަމަށްވާ ޑޮކްޓަރުންނާއި ނަރުހުން މަދުވާނެ ކަމަށެވެ.
ކޮވިޑް-19 ފެތުރުން ވަރަށް ބޮޑަށް މައްޗަށް ގޮސްފައިވާއިރު ރާއްޖޭގައި އުޅެނީ ވެކްސިން ހުސްވެގެންނެވެ. ރާއްޖޭގެ ގިނަ އަދަދެއްގެ ބަޔަކަށް ކޮވިޝީލްޑް ވެކްސިންގެ ފުރަތަމަ ޑޯޒު ދީފައިވާއިރު އޭގެ ދެ ވަނަ ޑޯޒު ނުޖެހި 91،000 އަށް ވުރެ ގިނަ އެވެ.
ކޮވިޑް-15 ފެތުރޭ މިންވަރު 500 ދަށުގައި އޮއްވާ ކުއްލިއަކަށް ގިނަވެފައި ވަނީ ލޯކަލް ކައުންސިލްތަކުގެ އިންތިހާބު ބޭއްވި ފަހުންނެވެ. އަދި ބައްޔާ ދެކޮޅަށް އަޅާފައި ހުރި ހުރިހާ ފިޔަވަޅުތަކެއް ރޯދަ މަހަށް
ހެލްތު ޕްރޮޓެކްޝަން އެޖެންސީގެ ހިސާބުތަކަށް ބަލާއިރު މި ދުވަސްކޮޅު ބަލިޖެހޭ މީހުން އުޅެނީ ކޮންމެ ދުވަހު 500 އިން މަތީގަ އެވެ. ބައްޔާއެކު މިވަގުތު 18،221 މީހުން އެބަ އުޅެ އެވެ. އޭގެ ތެރެއިން 268 މީހުން މާ ބޮޑަށް ބަލިވެގެން އޮތީ އެނދުމަތިކޮށްފަ އެވެ. މިހާތަނަށް 105 ކޮވިޑް-19 ޖެހިގެން މަރުވެއްޖެ އެވެ.
