މާލޭގައި ކޮންޓްރޯލެއް ނެތި ކޮވިޑު ފެތުރި ގިނަ އަދަދެއްގެ ބަޔަކު ބަލީގައި ބޮޑުވަރުވާތީވެ މާދަމާ ހަވީރު ހަތަރަކުން ފެށިގެން ރޭގަނޑު ފަތިހު ހަތަރަކަށް ބޭރަށް ނުކުތުން މަނާކޮށްފި އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު އިއުލާންކުރި ގޮތުގައި ކޮވިޑުން ރައްކާތެރިވާން އެޅި ފިޔަވަޅުތައް އިތުރަށް މި ހަރުދަނާކުރީ ހަފުތާއަކަށެވެ. މިހާރު ކާފިއު އޮތީ ރޭގަނޑު ނުވައަކުން ފަތިހު ހަތަރަކަށެވެ.
ހަފުތާއެއްގެ މުއްދަތަށް އިއުލާންކުރި ފިޔަވަޅުތައް:
ކާބޯތަކެތީގެ ހިދުމަތް ދޭ ތަންތަނުގެ އެތެރޭގައި ތިބެގެން ކެއިންބުއިން މަނާ.
މިސްކިތްތަކުގައި ޖަމާއަތުގައި ނަމާދުކުރުން ހުއްޓާލުން.
ދެކުނު އޭޝިއާގެ ގައުމުތަކުގެ ފަތުރުވެރިންނަށް އަންނަ ބުރާސްފަތިދުވަހު ފެށިގެން ޓޫރިސްޓު ވިސާ ދިނުން ވަގުތީ ގޮތުން މެދުކަނޑާލުން.
އެޗްޕީއޭ އިން ބުނި ގޮތުގައި ފިޔަވަޅުތައް ހަރުކަށިކުރި މުއްދަތުގައި ފުލުހުންގެ ހުއްދައާ އެކު މެންދަމު 12އާ ހަމައަށް ޑެލިވަރީކުރުމުގެ ފުރުސަތު ދޭނެ އެވެ. ގައިޑްލައިންއާ ހިލާފުވާ ވިޔަފާރިތައް 24 ގަޑިއިރަށް ބަންދުކުރަން ވެސް ވަނީ ނިންމައިފަ އެވެ.
ކޮވިޑުގެ އާ ވެރިއަންޓަކާ އެކު ރާއްޖޭގެ ހާލަތު އޮތީ ވަަރަށް ބޮޑަށް ގޯސްވެފަ އެވެ. އެޗްޕީއޭ އިން ރޭ އާއްމުކުރި ހިސާބުތަކުން ދައްކާ ގޮތުގައި 1،204 މީހުން ޕޮޒިޓިވްވެފައިވެ އެވެ. މީގެތެރެއިން މާލެ ސަރަހައްދުން އެކަނި 961 މީހަކަށް ބަލި ޖެހިފައިވެ އެވެ.
މި ބަލީގައި ޒުވާނުންނަށް ވެސް ދަނީ ބޮޑުވަރުވަމުންނެވެ. ހާއްސަކޮށް ވެކްސިންގެ ދެ ޑޯޒު ނުޖަހާ ތިބި މީހުންގެ ހާލަތު ދަށްވާކަން ފާހަގަވެފައިވާ ކަމަށް ޑޮކްޓަރުން ވިދާޅުވެ އެވެ.
ކޮވިޑު ޖެހިގެން އެޑްމިޓްވާ މީހުންގެ އަދަދު ވެސް ދަނީ އިތުރުވަމުންނެވެ. މި ބައްޔަށް ހާއްސަކުރި ދަރުމަވަންތަ ހޮސްޕިޓަލުގެ އައިސީޔޫ ފުރިގެން މިހާރު އަންނަނީ އެނދުތައް ވެސް އިތުރުކުރަމުންނެވެ. އެގޮތުން ދަރުމަވަންތަ ހޮސްޕިޓަލް 17 ވަނަ ފްލޯ އާއި ހުޅުމާލެ ހޮސްޕިޓަލް ވެސް ވަނީ ބޭނުންކުރަން ފަށައިފަ އެވެ.
މާލޭގެ އިތުރުން ރަށްރަށުގައި މި ބަލި ފެތުރެމުންދާ އިރު 36 ރަށެއް މިވަގުތު އޮތީ މޮނިޓަރިންގަ އެވެ.
މި ބަލީގައި މިހާތަނަށް 244 މީހުން އެޑްމިޓްކޮށްފައި ތިބިއިރު އެކްޓިވް ކޭސްގެ އަދަދަކީ 10،376 އެވެ. މި ބަލި ޖެހިގެން ރާއްޖެ އިން 87 މީހަކު ވަނީ މަރުވެފަ އެވެ.
