ރައީސް މުހައްމަދު ނަޝީދު އަވަހާރަކޮށްލަން ބުރާސްފަތި ދުވަހުގެ ރޭ ގޮއްވާލި ބޮމުގެ އަޑުފައްގަނޑާ އެކު ބިރުވެރިކަމެއްގެ ތެރޭގައި ހުރި ކުޑަ ކުއްޖާއަށް ނަފްސާނީ ގޮތުން އެހީތެރިވުމަށް ޖެންޑާ މިނިސްޓްރީން ނިންމައިފި އެވެ.
އެ ހަމަލާއަށް ފަހު އުމުރުން ދެ އަހަރުގެ މާހިލް ބިން ޝިފާއުއަށް ނަފްސާނީ ގޮތުން ވަނީ އަސަރުކޮށްފަ އެވެ. ނީލޯފަރު ހިނގުމުގައި ބޮމެއް ގޮއްވާލިއިރު މާހިލް ހުރީ މަންމައާ އެކު ކޮޓަރި ތެރޭގަ އެވެ. ފަސް މީހުން ދިރިއުޅޭ އެ ގެ ހުންނަނީ ބޮމުގެ ހަމަލާ އަމާޒުކުރި ނަޝީދުގެ ގެކޮޅު، ގ. ކެނެރީގެއާ ޖެހިގެން ކަނާތަށް ހުންނަ ގޯޅީގެ ތެރޭގަ އެވެ. އެއީ އައިއީޑީ ގޮއްވާލިތާ ވަރަށް ކައިރި އެވެ.
ޖެންޑާ މިނިސްޓްރީގެ އޮފިޝަލަކު ވިދާޅުވީ މާހިލްގެ ވާހަކަ "އަދަދު" އިން މިއަދު ގެނެސްދިނުމާއެކު އެ މިނިސްޓްރީގެ ސަމާލުކަމަށް އެކަން އައިސް އެހީތެރިވާން ނިންމާފައިވާ ކަމަށެވެ.
"ސައިކޯ ސޯޝަލް ސަޕޯޓް ފޯރުކޮށްދޭން ނިންމީ. ފެމިލީއާ ގުޅައިގެން އެހީވުމުގެ މަސައްކަތް މިކުރަނީ،" އޮފިޝަލް ވިދާޅުވި އެވެ.
އޭނާ ވިދާޅުވި ގޮތުގައި އެ ހާދިސާއިން ގެއްލުންވި އެހެން މީހުން ވެސް ދެނެގަނެ މިނިސްޓްރީއަށް ވެދެވެން އޮތް އެހީތެރިކަމެއް ފޯރުކޮށްދިނުމުގެ މަސައްކަތް ކުރާނެ އެވެ.
ބޮމުގެ ހަމަލާއަށް ފަހު ދަރިފުޅަށް އައި ބަދަލާ ގުޅޭ ގޮތުން ޝިފާއު "އަދަދު"އާ ވާހަކަ ދައްކަނީ. -- ފޮޓޯ: ހުސެއިން ޝަޔާހް/ އަދަދު
މި ބާރު އަޑާ އެކު މާހިލްގެ މިޒާޖަށް ބަދަލު އައިސްފައިވާ އިރު އެކަނި ކޮޓަރިތެރޭގައި ހުންނަން މާހިލް ބިރުގަންނަ ކަމަށް އޭނާގެ މަންމަ އާއި ބައްޕަ ބުންޏެވެ.
މާހިލްގެ މިޒާޖަށް އައި ބޮޑު ބަދަލެއްގެ ގޮތުގައި ބައްޕަ ޝިފާއު ސޯލިހަށް ފާހަގަކުރެވުނީ، އަޑެއް އިވޭއިރަށް ކަންފަތުގައި އަތް އެޅުމާއި ސިއްސަ ސިއްސައިގެން ދިއުމެވެ. ކާއްޓެއް ބިނދެލިޔަސް ބިރުން ކަންފަތުގައި އަތްއަޅަ އެވެ.
މާހިލްގެ މައިންބަފައިން ގަބޫލުކުރާ ގޮތުގައި ބާރުއަޑާ އެކު މާހިލަށް އެ ކުރިމަތިވި ބިރު ދުވަސްކޮޅަކުން ރަނގަޅުވާނެ އެވެ.
އައިއީޑީ ގޮއްވާލައި ދިން ޓެރަރިސްޓު ހަމަލާގައި، ނަޝީދުގެ އިތުރުން ތިން ބޮޑީގާޑުންނާއި ބިދޭސީއެއްގެ އިތުރުން ދިވެއްސަކު ޒަހަމްވި އެވެ. އެންމެންގެ ހާލު ވެސް މިހާރު ރަނގަޅެވެ. ޓެރަރިޒަމްގެ ހަމަލާއާ ގުޅިގެން ތިން މީހަކު ވަނީ ހައްޔަރު ކޮށްފަ އެވެ.
