މި މަހުގެ ކުރީކޮޅު ބޭއްވި ލޯކަލް ކައުންސިލް އިންތިހާބުގައި ވޯޓު އެއްވަރުވި ހަތަރު ރަށެއްގެ އިންތިހާބު ރޯދަ މަސް ތެރޭގައި ބާއްވާނެ ކަމަށް އިލެކްޝަންސް ކޮމިޝަންގެ ރައީސް އަހްމަދު ޝަރީފް މިއަދު ވިދާޅުވެއްޖެ އެވެ.
ޝަރީފް "އަދަދު"އަށް ވިދާޅުވީ ވޯޓު އެއްވަރުވި ރަށްތަކާއި ނަތީޖާއަށް އަސަރުކޮށްފާނެ ކަމަށް ބެލެވޭތީ ލ. މާވަށާއި ތ. ގާދިއްފުށީގައި އަލުން ވޯޓު ކުރިއަށް ގެންދަން ކޮމިޝަނުން ނިންމާފައިވާ ކަމަށެވެ. އެ ދެ ރަށުގައި ދިމާވި މައްސަލައަކީ ދާއިރާގައި ނުހިމެނޭ މީހުން ވޯޓުލާފައި ވުމެވެ.
އޭނާ ވިދާޅުވި ގޮތުގައި އެހެންވެ ނަތީޖާއަށް އަސަރުކޮށްފާނެ ކަމަށް ބެލެވެ އެވެ.
ވޯޓު އެއްވަރުވި ގޮނޑިތަކުގެ އިންތިހާބު ބާއްވާއިރު ރަށްރަށުގެ އިތުރުން މާލޭގައި ވެސް ވޯޓު ފޮށި ބަހައްޓާނެ އެވެ.
ވޯޓު އެއްވަރުވެ އިންތިހާބު ބާއްވާ ރަށްތައް
- ހއ. ތަކަންދޫ (އެއްވަރުވީ އަންހެނުންނަށް ހާއްސަ ކުރި ގޮނޑިއެއް)
- ފ. ދަރަނބޫދޫ
- މ. ރަތްމަންދޫ
- ބ. ކިހާދޫ
އިންތިހާބުގެ ރަސްމީ ނަތީޖާ ރޭ ވަނީ އިއުލާންކޮށް ނިމިފަ އެވެ.
ކޮވިޑުގެ ބަލިމަޑުކަމުގެ ތެރޭގައި ބޭއްވި އިންތިހާބަކީ މިހާތަނަށް ކޮމިޝަނުން ބޭއްވި އެންމެ ބުރަ ބޮޑު އިންތިހާބެވެ. މި އިންތިހާބުގައި ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ އެކު ޖުމްލަ 1912 މީހުން އިންތިހާބު ކުރަން ޖެހުނެވެ.
މި އިންތިހާބާ ގުޅޭ ގޮތުން 80 އަށް ވުރެން ގިނަ ޝަކުވާ ހުށަހަހެޅި އެވެ. އޭގެތެރޭގައި އާދަޔާ ހިލާފަށް ބާތިލު ވޯޓު ގިނަވުމާއި ކައުންޓާ ފޮއިލް ދިމާ ނުވުމާއި ވާދަކުރާ ކެންޑިޑޭޓުންގެ ފަރަގު ކުޑަވުން ފަދަ ޝަކުވާތައް ހިމެނެ އެވެ.
