އާބާދީގެ 60 ޕަސެންޓު މީހުން ވެކްސިންގެ ދެ ޑޯޒު ފުރިހަމަކޮށްފައިވާ ރަށްތަކަށް ކަރަންޓީން ނުވެ އިއްޔެ އިން ފެށިގެން ދަތުރުކުރެވޭނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިއުލާންކޮށްފައިވީ ނަމަވެސް އާބާދީގެ 60 ޕަސެންޓަށް އެއްވެސް ރަށެއްގައި އަދި ވެކްސިން ފުރިހަމައެއް ނުވެ އެވެ.
އެޗްޕީއޭގެ އޮފިޝަލަކު "އަދަދު"އަށް އިއްޔެ ވިދާޅުވީ އެއްވެސް ރަށެއްގައި އާބާދީގެ 60 ޕަސެންޓަށް ދެ ޑޯޒު ފުރިހަމަ ނުކުރެވި ވަނީ ފުރަތަމަކޮޅު ވެކްސިން ޖެހި މީހުންގެ އަދަދު މަދުވުމުން ކަމަށެވެ. މިދިޔަ ފެބުރުއަރީ މަހުގެ ތެރޭގައި ކޮވިޑް ވެކްސިނޭޝަން ޕްރޮގްރާމް ރާއްޖޭގައި ފެށި ނަމަވެސް ކުރީކޮޅު ތަރުހީބު ކުޑަ ކަމަށް އޭނާ ވިދާޅުވި އެވެ.
ގިނަ ބަޔަކު ފުރަތަމަ ޑޯޒު ޖަހަން ފެށީ، އޮފިޝަލް ވިދާޅުވި ގޮތުގައި، ރޯދަމަހާ ދިމާކޮށެވެ.
ރާއްޖޭގައި ފެށި ކޮވިޝީލްޑް ވެކްސިންގެ ދެ ވަނަ ޑޯޒް ޖަހަނީ ފުރަތަމަ ޑޯޒު ޖަހާތާ އަށް ހަފުތާ ފަހުންނެވެ. ސިނޯފާމް އާއި ފައިޒާ ވެކްސިންގެ ދެ ވަނަ ޑޯޒު ޖަހަނީ ފުރަތަމަ ޑޯޒަށް ހަތަރު ހަފުތާ ފަހުންނެވެ.
އެޗްޕީއޭ އިން ލަފާކުރަނީ މާލެ އާއި ރަށްރަށުގައި ވެސް އާބާދީގެ 60 ޕަސެންޓަށް ވެކްސިންގެ ދެ ވަނަ ޑޯޒު ޖަހައި ނިމޭނީ އަންނަ މަހުގެ ފަހުކޮޅަށެވެ.
ކަރަންޓީން ނުވެ ދަތުރުކުރުމުގެ އުސޫލް
ކޮވިޑާ ގުޅިގެން ދަތުރުފަތުރުކުރަން ކުރިމަތިވި އުނދަގޫތަކަށް ލުއި ދީ ނެރެފައިވާ ގައިޑްލައިންގައި ކަރަންޓީނާ ނުލައި ދަތުރުކުރަން ހުއްދަ ދީފައި އޮތީ އާބާދީގެ 60 ޕަސެންޓަށް ދެ ޑޯޒު ވެކްސިން ދީފައިވާ ރަށްތަކަށް އެކަންޏެވެ. މި ރަށްތަކަށް ދާ މީހުން ޕީސީއާރު ޓެސްޓެއް ބޭނުމެއް ނުވެ އެވެ.
އެކަމަކު އެ ރަށެއްގައި ބަލި އުޅޭ ނިސްބަތް ފަހެއް ޕަސެންޓަށް ވުރެ މަތި ރަށަކުން އެހެން ރަށަކަށް ދަތުރުކުރާ ނަމަ ދެ ޑޯޒު ފުރިހަމަކުރުމަށް ފަހު ދެ ހަފުތާ އަށް މަޑުކުރުމުގެ އިތުރުން ޕީސީއާރު ނެގެޓިވް ޓެސްޓެއް ބޭނުންވެ އެވެ.
ރާއްޖޭގައި ވެކްސިން ނުދެވޭ އުމުރުގެ މީހުންނަށް ވެސް ދަތުރުކުރެވޭނީ ޕީސީއާރު ޓެސްޓަކާ އެކުގަ އެވެ. މި ޓެސްޓު އެކި ތަންތަނުން ހަދައިދެނީ އެކި އަގުގަ އެވެ. ބައެއް ތަންތަނުގެ އަގު އުޅެނީ 700-1000ރ. އާ ދެމެދުގަ އެވެ.
ޕޮޒިޓިވިޓީ ރޭޓް ފަސް ޕަސެންޓަށް ވުރެ މަތި ރަށްތައް
ޅ.ނައިފަރު
ބ.މާޅޮސް
ތ.ވޭމަންޑޫ
ކ.ހުރާ
ކ.ދިއްފުށި
އދ.މާމިގިލި
މާލެ
ރާއްޖެ އިން މިހާތަނަށް 26،667 މީހުންނަށް ބަލި ޖެހިފައިވެ އެވެ. ބަލީގައި 71 މީހަކު މަރުވެފައިވެ އެވެ. މާލޭގެ އިތުރުން 17 ރަށެއްގައި ވަނީ ބަލިފެތުރިފަ އެވެ. އެންމެ ހާލަތު ގޯހީ ތ. އަތޮޅުގަ އެވެ.
